कुत्र्याचे रात्री रडणे शुभ असते की अशुभ... तुमच्या मनातही तीच भीती?

लोकमानसातील समजूत

हिंदू धर्मात आणि लोकपरंपरेत कुत्र्याच्या रडण्याला अनेकदा अशुभ घटनांशी जोडले जाते. विशेषतः रात्रीच्या वेळी कुत्रा जर सतत आणि जोरजोरात रडत असेल, तर त्याला आसपास नकारात्मक ऊर्जा किंवा अघटित घटनेची पूर्वसूचना मानले जाते.

हे ही वाचा>> 'ही' आहे घरातील सर्वात शुभ वस्तू, नाही आणली घरी तर...

ज्योतिषशास्त्रात असे सांगितले जाते की, कुत्र्यांना सूक्ष्म शक्तींचा अनुभव येतो, ज्या माणसांना दिसत नाहीत. अनेक ठिकाणी अशी मान्यता आहे की कुत्र्याचे रडणे हे मृत्यू किंवा संकटाचे संकेत असू शकते. उदाहरणार्थ, गावांमध्ये आजही असे म्हटले जाते की जर कुत्रा रात्री घरासमोर रडत असेल, तर त्या घरात काहीतरी वाईट घडण्याची शक्यता आहे.

याउलट, काही ठिकाणी कुत्र्याचे रडणे शुभ मानले जाते. काहींच्या मते, कुत्रा रडून आपल्या आसपासच्या नकारात्मक शक्तींना हुसकावून लावत असतो. विशेषतः जर कुत्रा घराच्या मुख्य प्रवेशद्वाराजवळ रडत असेल, तर तो संरक्षणाचे प्रतीक मानला जाऊ शकतो. ही परस्परविरोधी मते लोकांच्या स्थानिक परंपरा आणि विश्वासांवर अवलंबून असतात.

वैज्ञानिक दृष्टिकोन

ज्योतिष आणि शकुनशास्त्रापलीकडे गेलो तर कुत्र्याच्या रडण्यामागे वैज्ञानिक कारणेही आहेत. पशुवैद्यक तज्ज्ञांच्या मते, कुत्रे रात्री रडतात तेव्हा त्यामागे त्यांची शारीरिक किंवा मानसिक स्थिती कारणीभूत असू शकते. उदाहरणार्थ: 

• एकटेपणा: कुत्रा हा सामाजिक प्राणी आहे. जर तो एकटा पडला किंवा त्यांच्या मालकापासून दूर असेस, तर तो रडून आपली भावना व्यक्त करतो.
• आजारीपणा किंवा वेदना: कुत्र्याला जखम झाली असेल किंवा त्याला शारीरिक त्रास होत असेल, तर तो रडू शकतो.
• हवामानातील बदल: थंडी, उष्णता किंवा पावसाळ्यातील गडगडाट यांसारख्या बदलांमुळे कुत्र्यांना अस्वस्थ वाटू शकते, ज्यामुळे ते रडतात.
• आसपासच्या आवाजांचा त्रास: रात्रीच्या वेळी इतर प्राणी, वाहने किंवा अनोळखी आवाजांमुळे कुत्रे भुंकतात किंवा रडतात.

ज्योतिष आणि वास्तुशास्त्रातील मत

ज्योतिषतज्ज्ञांच्या मते, "कुत्र्याचे रडणे हे शुभ की अशुभ हे ठामपणे सांगता येत नाही, कारण याचा अर्थ परिस्थितीवर अवलंबून असतो. जर कुत्रा रात्री सतत रडत असेल आणि त्याचवेळी घरात कोणीतरी आजारी असेल, तर ते संकटाचे संकेत मानले जाऊ शकते. पण जर कुत्रा रडून शांत होत असेल, तर तो फक्त आपली उपस्थिती दर्शवत असण्याची शक्यता आहे."

हे ही वाचा>> Astro Tips: रस्त्यावर पडलेली नोट किंवा नाणी उचलावी का... शुभ असतं की अशुभ?

शुभ की अशुभ?

कुत्र्याचे रात्री रडणे शुभ आहे की अशुभ, हे पूर्णपणे तुमच्या विश्वासावर आणि परिस्थितीवर अवलंबून आहे. शास्त्रीयदृष्ट्या, हे त्याच्या नैसर्गिक वर्तनाचा भाग असू शकते, तर पारंपरिक दृष्टिकोनातून याला शकुन-अपशकुनाशी जोडले जाते. 

जर तुम्हाला कुत्रा रडताना दिसला, तर त्याला गोंजारून त्याच्या रडण्याचे कारण शोधण्याचा प्रयत्न करा. त्याला खायला देऊन किंवा त्याची काळजी घेऊन तुम्ही त्याला शांत करू शकता. शेवटी, हे शुभ की अशुभ मानायचे, हा तुमचा वैयक्तिक निर्णय आहे.

टीप: ही माहिती ज्योतिषशास्त्र आणि त्याभोवती असलेल्या श्रद्धा आणि युक्तिवादांवर आधारित आहे. मुंबई Tak अशा समजुती आणि उपायांचे समर्थन करत नाही.