Irshalwadi Landslide : “आम्ही हाताने माती उकरून लेकरं बाहेर काढली”

इर्शाळगडाच्या पायथ्याला लागून 48 कुटुंबाची एक वाडी आहे. नाव आहे इर्शाळवाडी. मिळालेल्या माहितीनुसार लहानथोरांसह 250 च्या जवळपास लोक इथे वास्तव्यास आहेत. पण, गुरुवारी (20 जुलै) इर्शाळवाडीवर काळाने झडप घातली अन् सर्व काही उद्ध्वस्त झालं. या दुर्घटनेत वाचलेल्या काहींनी नेमकं काय घडलं? याबद्दल थरकाप उडवणारा प्रसंग सांगितला.

वाचा >> इर्शाळवाडी : दरडीने गिळलं गाव, 5 जणांचा मृत्यू, अनेक लोक ढिगाऱ्याखाली

या दुर्घटनेतून जीव वाचलेल्या इर्शाळवाडीतील नागरिकांनी नेमकं काय घडलं, याची आपबीती सांगितली. एका महिलेने सांगितले की, आम्ही झोपलेलो होतो. नेमकं काय घडलं हे माहितीच नाही. पण, आम्ही ढिगाऱ्याखालून स्वतःच बाहेर आलो. आम्ही आमची लेकरं ढिगाऱ्याखालून बाहेर काढली आणि खाली आलो.

दुसऱ्या एका महिलेने सांगितलं की, आम्ही झोपलेलो होतो. त्यामुळे कसं घडलं याबद्दल माहिती नाही. आम्ही झोपेत होतो. त्यावेळी आवाज आला आणि आम्ही उठलो. मग भाऊ आणि वहिनीने दोन मुलं ढिगाऱ्याखाली दबली गेली होती. मग आम्ही त्यांना माती उकरून बाहेर काढलं आणि घरातून बाहेर पळालो. जेव्हा आम्ही बाहेर आल्यानंतर आजूबाजूला बघितलं, तेव्हा सर्व घरं बुजली गेली होती. मोठी झाड पडलेली होती.

या दुर्घटनेतून वाचलेल्या एका व्यक्तीने सांगितलं की, आम्हाला झोपेत काहीच समजलं नाही. आमचं घर खचलं म्हणून आम्हाला हे कळलं. आमचं घर खालच्या बाजूने आहे. दरड कोसळली.

दरड कोसळल्यानंतर इर्शाळवाडीतील परिस्थिती काय?

इर्शाळवाडीत दरड कोसळल्यानंतर काही स्थानिक नागरिक वरती जाऊन उद्ध्वस्त वाडी बघून आले. एका व्यक्तीने सांगितलं की,प्रचंड नुकसान झालं आहे. काही लोक ढिगाऱ्याखाली दबले गेले आहे. चार मृतदेह सापडले आणि दोघांना जिवंत बाहेर काढलं. इर्शाळवाडी गावात 250 च्या जवळपास लोक वास्तव्याला आहेत. पण, काही लोक शेतात होते. काही लोक मासे पकडायला गेलेले होते. ते सगळे आल्याशिवाय नेमकं कळणार नाही.