Kurla Accident: चालक संजय मोरेने 'हत्यारा'सारखा केला बसचा वापर?, पोलिसांचा खळबळजनक दावा...

नेमकी घटना काय?

पीटीआयने दिलेल्या माहितीनुसार, या भीषण अपघातात सहभागी असलेल्या बसचा चालक संजय मोरे याने हे कृत्य करण्यासाठी मुद्दाम बसचा शस्त्र म्हणून वापर केल्याचा पोलिसांचा अंदाज आहे. तपासात सुसूत्रता आणण्यासाठी न्यायालयाने ५४ वर्षीय बसचालक संजय मोरे याला २१ डिसेंबरपर्यंत पोलीस कोठडी सुनावली आहे.

हे ही वाचा>> Mumbai Kurla BEST Bus Accident : अपघातग्रस्त BEST बस चालक 9 दिवसाआधीच नोकरीला लागला? धक्कादायक माहिती उघड

ही घटना सोमवारी रात्री ९.३० वाजताच्या सुमारास मुंबईतील कुर्ला परिसरात घडली. बृहन्मुंबई इलेक्ट्रिक सप्लाय अँड ट्रान्सपोर्ट (बेस्ट) द्वारे चालवल्या जाणाऱ्या या बसने दाट लोकवस्तीच्या परिसरात अनेक वाहने आणि पादचाऱ्यांना धडक दिली.

घटनेनंतर लगेचच बस चालक संजय मोरे याला घटनास्थळाहून ताब्यात घेऊन नंतर अटक करण्यात आली. त्याच्यावर भारतीय न्याय संहितेच्या कलम 105 (हत्येचे प्रमाण नसून दोषी मनुष्यवध) आणि 110 (हत्येचे प्रमाण नसून दोषी हत्या करण्याचा प्रयत्न) तसेच मोटार वाहन कायद्याच्या संबंधित कलमांखाली आरोप ठेवण्यात आले आहेत.

न्यायालयीन सुनावणीदरम्यान, पोलिसांनी युक्तिवाद केला की कथित गुन्हा गंभीर स्वरूपाचा आहे, ज्यासाठी संजय मोरेच्या हेतूचा सखोल तपास करणे आवश्यक आहे. लोकांचा जीव धोक्यात घालण्यासाठी ही बस जाणीवपूर्वक आणि बेपर्वाईने चालवली गेली होती की नाही हे ठरवण्याची गरज पोलिसांनी व्यक्त केली.

हे ही वाचा>> Kurla Accident Today : लेकीचा फोन आला, रिक्षा मिळत नाही म्हणाली अन् नंतर थेट मृतदेह... बापानं जड अंतकरणानं सांगितली आपबीती

मोरे याने योग्य प्रशिक्षण घेतले आहे का, याचाही तपास करणार असल्याचेही पोलिसांनी सांगितले. त्यावेळी तो ड्रग्जच्या प्रभावाखाली होता का? आणि या घटनेमागे काही षडयंत्र होते का? या सगळ्या गोष्टींचा तपास केला जाणार आहे.

परिवहन विभागाने अद्याप अपघातग्रस्त बसची तांत्रिक तपासणी केली नसल्याचे पोलिसांनी नमूद केले. गजबजलेल्या शहरी भागात संजय मोरे याच्या ताब्यातील बस शस्त्रास्त्रासारखी आहे का?, हे सिद्ध करण्याची गरज पोलिसांनी व्यक्त केली.

मात्र, संजय मोरे याचे बचाव पक्षाचे वकील समाधान सुलेंनी पोलिसांच्या युक्तिवादाला प्रतिवाद करत बसमधील तांत्रिक बिघाड किंवा शॉर्ट सर्किटमुळे हा अपघात झाला असावा, असा युक्तिवाद केला. वाहन चालकांच्या ताब्यात देण्यापूर्वी ते वाहन रस्त्यावर धावण्यासाठी योग्य आहे की नाही याची खात्री करणे ही प्रशासनाची जबाबदारी असल्याचे मत त्यांनी मांडले.

आरोपी बस चालकाचे वकील सुलेन यांनी न्यायालयाला सांगितले की, संजय मोरेला योग्य प्रशिक्षण देण्यात आले असून त्याचा रेकॉर्डही स्वच्छ आहे, तो पूर्वी कोणताही अपघात न होता नियमितपणे बस चालवत असे.