Rajkot Fire : सुट्टीचा दिवस, 99 रुपयांची स्कीम अन्  27 जणांचा जळून कोळसा, काय घडलं?

शनिवारी आगीची माहिती मिळताच अग्निशमन दलाच्या पथकाने बचावकार्य सुरू केले. आग लागली तेव्हा गेमिंग झोनमध्ये मोठ्या संख्येने लोक होते, कारण सुट्टीच्या दिवशी गर्दी आकर्षित करण्यासाठी गेमिंग झोनच्या व्यवस्थापनाने प्रवेश शुल्क फक्त 99 रुपये केले होते. सुट्टीचा दिवस असल्याने आणि फी फक्त 99 रुपये असल्याने प्रचंड गर्दी उसळली होती. 

इतकी भीषण आग का लागली?

आगीला चिथावणी दिली ती, या गेमिंग झोनमध्ये असलेल्या डिझेल आणि पेट्रोलच्या मोठ्या साठ्याने. गेमिंग झोनमध्ये 1500 ते 2000 लिटर डिझेल आणि गो कार रेसिंगसाठी 1000 ते 1500 लिटर पेट्रोल ठेवण्यात आले होते. पोलीस महानिरीक्षक अशोक कुमार यादव यांनी आतापर्यंत 27 जणांचा मृत्यू झाले असल्याची माहिती दिली.

हेही वाचा >> भाजप, काँग्रेसला इतक्या जागा मिळणार; योगेंद्र यादवांनी मांडलं सगळं गणित

गुजरातचे गृहमंत्री हर्ष सांघवी यांनी रात्री उशिरा घटनास्थळाची पाहणी केली. त्यांनी प्रसारमाध्यमांशी संवाद साधताना सांगितले की, "राजकोटमध्ये एक अतिशय दुःखद घटना घडली आहे. या घटनेत अनेक कुटुंबातील सदस्यांचा मृत्यू झाला आहे. आज पहाटे ३ वाजेपर्यंत तपास सुरू करण्याचे निर्देश एसआयटीला देण्यात आले आहेत. ज्या विभागांतर्गत गेम झोनच्या बांधकामाची जबाबदारी सोपविण्यात आली आहे, त्यांनी आज पहाटे ३ वाजेपर्यंत जिल्हाधिकारी कार्यालयात हजर राहण्याचे निर्देश दिले आहेत. आजपासूनच सर्व प्रकारची चौकशी सुरू होणार असून लवकरच न्याय मिळवून देण्यासाठी कार्यवाही केली जाईल."

हेही वाचा >> महाराष्ट्रात मतदान वाढलं.. नेमका कोणाला बसणार फटका? संपूर्ण आकडेवारी एका क्लिकवर...

गेमिंग झोनमध्ये आगीच्या घटनेची माहिती देताना जिल्हाधिकारी म्हणाले की, "प्राथमिक तपासात आगीचे कारण इलेक्ट्रिकल असल्याचे सांगण्यात येत आहे. मात्र आगीचे मुख्य कारण अद्याप समजू शकलेले नाही. या गेमिंग झोनला अग्निशमन विभागाकडून एनओसी मिळाली नसल्याचेही समोर आले आहे. ना हरकत प्रमाणपत्रासाठी कधीही अर्ज केलेला नाही. याबाबतची अधिक माहितीही अग्निशमन विभागाकडूनच येणार आहे."

बाहेर पडण्यासाठी एकच मार्ग

गेम झोनमधून बाहेर पडण्यासाठी आणि प्रवेश करण्यासाठी 6 ते 7 फुटांचा एकच मार्ग होता. शनिवारी 99 रुपयांची ऑफर स्कीम होती, त्यामुळे अपघाताच्या वेळी गेमिंग झोनमध्ये मोठ्या संख्येने लोक उपस्थित होते.

पहिल्या मजल्यावरून बाहेर पडण्याचा एकच मार्ग

शनिवारी सायंकाळी हा अपघात झाला. अपघातापूर्वी गेम झोनमधून बाहेर आलेल्या मुलांनी सांगितले की, अचानक तेथील कर्मचारी आले आणि आम्हाला आग लागली आहे, तुम्ही बाहेर या असे सांगितले. यानंतर सर्वजण धावत बाहेर आले मात्र पहिल्या मजल्यावरून एकच मार्ग असल्याने काही लोकांना बाहेर पडताच आले नाही.

गेमिंग झोनचा मालक आणि व्यवस्थापकाला अटक

पोलिसांनी राजकोट गेम झोनचा ऑपरेटर आणि मालकासह 3 जणांना अटक केली आहे. वरिष्ठ आयपीएस अधिकारी सुभाष त्रिवेदी यांच्या नेतृत्वाखाली एसआयटी 5 अधिकाऱ्यांची चौकशी करणार आहे. 

एसआयटी ७२ तासांत प्राथमिक अहवाल देईल. आग का लागली, गेमिंग झोनला मंजूरी दिली गेली होती की नाही, अग्निशमन विभागाची एनओसी होती की नाही, बांधकामाचे नियम पाळले गेले की नाही? आपतकाळीन बचावाचे मार्ग काय होते? या घटनेला सरकारी यंत्रणा जबाबदार होती की गेम झोनचे मालक? या सर्व प्रकरणांचा प्राथमिक तपास केला जाणार आहे. 

त्यानंतर एसआयटी 10 दिवसांत सविस्तर अहवाल देईल. याशिवाय पोलिसांनी कारवाई केली असून गेमिंग झोनचा मालक युवराज सिंग सोलंकी असून नितीन जैन व्यवस्थापक आहेत. या दोघांशिवाय पोलिसांनी आणखी एकाला अटक केली आहे.

डीएनए अहवालानंतर मृतदेहाची पटणार ओळख 

टीआरपी गेम झोनमध्ये लागलेल्या आगीमुळे लोकांचा अत्यंत वेदनादायी मृत्यू झाला आहे. जळून कोळसा झालेल्या मृतदेहांची ओळख पटवण्यासाठी गुजरात सरकारने आरोग्य विभागाची एक विशेष टीम राजकोट सिव्हिल हॉस्पिटलमध्ये पाठवली, जी डीएनए नमुने गोळा करून अहवाल देणार आहे.