त्र्यंबकेश्वर मंदिरात जबरदस्तीने घुसण्याचा प्रयत्न?, फडणवीसांकडून थेट SIT चौकशीचे आदेश

नाशिक पोलिसांनी याप्रकरणी एफआयआर नोंदवला आहे, तर महाराष्ट्राचे उपमुख्यमंत्री आणि गृहमंत्री देवेंद्र फडणवीस (Devendra Fadnavis) यांनी या प्रकरणाची एसआयटी चौकशी करण्याचे आदेश दिले आहेत. फडणवीस यांनी अतिरिक्त पोलिस महासंचालक दर्जाच्या अधिकाऱ्यांच्या अध्यक्षतेत एसआयटी स्थापन करण्याचे सुद्धा आदेश दिले आहेत. ही एसआयटी केवळ यावर्षीच्या घटनेची चौकशी करणार नाही, तर गेल्यावर्षीच्या घटनेचीही चौकशी करेल, ज्यावेळी एक विशिष्ट जमाव त्र्यंबकेश्वर मंदिर परिसरात मुख्य प्रवेशद्वारातून आतमध्ये शिरल्याची कथित घटना घडली होती.

पोलिसांनी 5 तरुणांना केली अटक

त्याचबरोबर या प्रकरणी नाशिक पोलिसांनी पाच तरुणांना ताब्यात घेतले आहे. नाशिकचे आयजी बीजी शेखर यांनी सांगितले की, ‘त्र्यंबकेश्वर मंदिरात जबरदस्तीने प्रवेश केल्याप्रकरणी पोलिसांनी पाच जणांना ताब्यात घेतले आहे. ही घटना 13 मे रोजी घडली होती. 10 ते 12 तरुणांनी जबरदस्तीने मंदिरात प्रवेश केल्याची माहिती मंदिर ट्रस्टकडून पोलिसांना मिळाली. त्यांच्याकडे चादर आणि फुलांचे गुच्छ होते.’

हे ही वाचा >> Honeymoon च्या आधी नवरीने दिल्या प्रचंड शिव्या, नेमकं घडलं काय?

याआधी ही घडली होती अशी घटना

त्र्यंबकेश्वर मंदिरात गैर-हिंदू समाजाच्या लोकांनी प्रवेश करण्याचा प्रयत्न करण्याची ही पहिलीच वेळ नाही. यापूर्वीही असा प्रयत्न झाला होता. खरे तर गेल्या वर्षी एका विशिष्ट समाजाच्या लोकांनी मुख्य दरवाजातून मंदिरात प्रवेश करण्याचा प्रयत्न केला होता. या घटनेच्या तक्रारीवरून पोलिसांनी गुन्हा दाखल केला होता.

हे ही वाचा >> Ulhasnagar : मासिक पाळीचं रक्त पाहून खवळला अन् भावाने 12 वर्षाच्या बहिणीला संपवलं!

त्र्यंबकेश्वर देवस्थान ट्रस्टने पोलिसांना दिलेलं पत्र जसंच्या तसं…

दरम्यान, या संपूर्ण प्रकरणी श्री त्र्यंबकेश्वर देवस्थान ट्रस्टच्या प्रशासकीय अधिकाऱ्याने त्र्यंबकेश्वर पोलिसांना याबाबत तात्काळ तक्रारीचं पत्र दिलं आहे. तेच पत्र जसंच्या तसं..

दिनांक 13/05/2023 रोजी रात्री सुमारे 9.41 मिनिटांच्या दरम्यान, श्री त्र्यंबकेश्वर मंदिराच्या उत्तर महाद्वार येथे स्थानिक संदल निमित्त निघालेल्या मिरवणुकीतील काही इतर धर्मीय व्यक्तींनी उत्तर महाद्वार येथून श्री त्र्यंबकेश्वर मंदिरात प्रवेश करण्याचा प्रयत्नवजा हट्ट केला असता सदर ठिकाणी नियुक्त असलेल्या महाराष्ट्र सुरक्षा रक्षकांनी सदर व्यक्तींना मज्जाव करून त्यांना अडवले.

वास्तविक श्री त्र्यंबकेश्वर मंदिरात घटनेप्रमाणे दर्शनाचे अधिकार हे हिंदू धर्मातील व्यक्तींना देण्यात आलेले आहे. वरील झालेल्या प्रकारामुळे सामाजिक सलोख्यास तेढ निर्माण होण्याचा प्रयत्न होत असल्याचे आम्ही सदर पत्राद्वारे आपल्या निदर्शनास आणून देऊ इच्छितो. तरी श्री त्र्यंबकेश्वर देवस्थान ट्रस्टच्या मा. विश्वस्त मंडळाच्या सुचनान्वये मी आपणास विनंती करतो की, आपण कृपया झालेल्या प्रकरणाचा योग्य तो तपास करून संबंधितांवर योग्य ती कायदेशीर कारवाई करावी. तसेच भविष्यात अशा प्रकारच्या घटना उद्भवणार नाही याची दक्षता घ्यावी, ही विनंती.

तरी सामाजिक सलोखा व शांतता राखण्याची जबाबदारी असल्याने हा तक्रार अर्ज आपणाकडे विनंतीपूर्वक सादर.