'वाल्मिक कराडचा 'तो' मेसेज आणि सुदर्शन घुलेने दुसऱ्या दिवशी...', उज्वल निकमांचा युक्तिवाद जसाच्या तसा

विष्णू चाटे याने वाल्मिक कराडचा एक मेसेज सुदर्शन घुले याला दाखवला. ज्यामध्ये वाल्मिक कराड याने जो आडवा येईल त्याला कायमचा धडा शिकवा. असं म्हटलं होतं. यानंतर दुसऱ्याच दिवशी संतोष देशमुख यांचं अपहरण करून त्यांची अत्यंत निर्घृण हत्या करण्यात आली. 

सरकारी वकील उज्वल निकम यांनी कोर्टात युक्तिवाद करताना खंडणी प्रकरण, मारहाण प्रकरण आणि हत्या प्रकरण पूर्ण घटनाक्रम हा वेळ आणि तारीख यानुसार कोर्टाला माहिती दिली. तब्बल 32 मिनिटं त्यांनी आपला युक्तिवाद केला.

उज्वल निकम यांनी केलेला युक्तिवाद जसाच्या तसा..

आवादा ही एक ऊर्जा कंपनी आहे.. या कंपनीने मस्साजोग शिवारात 32 एकर जमिनीवर गोडाऊन केले. सुनील शिंदे हे प्रोजेक्ट मॅनेजर आहेत तर शिवाजी थोपटे हे कंपनीचे भूसंपादन अधिकारी आहेत.

हे ही वाचा>> साताऱ्याच्या 'त्या' पोरांनी थायलंडमध्ये जाऊन केला बलात्कार, त्या रात्री काय घडलं?

8 ऑक्टोबर पासून खंडणी प्रकरणाला सुरुवात झाली. आठ ऑक्टोबर रोजी परळी येथील जगमित्र कार्यालयात विष्णू चाटे, वाल्मिक कराड यांच्यासोबत कंपनीचे अधिकारी शिवाजी थोपटे यांची बैठक झाली. सायंकाळी सात वाजता झाली. वाल्मिक कराड याने दोन कोटीची खंडणी मागणी करून काम थांबवा असे सांगितले. (या ठिकाणचे टॉवर लोकेशन आणि सीडीआर पुरावे)

9 ऑक्टोबर 2024 थोपटे यांनी अवादा कंपनीचे उपाध्यक्ष अल्ताफ तांबोळी यांना फोनवरून दोन कोटीची खंडणी मागितल्याचे माहिती दिली. यावेळी त्यांनी पोलीस तक्रार द्यावी का? अशी विचारणा केली. त्यावेळी अल्ताफ तांबोळी यांनी तक्रार देऊ नका असे सांगितले त्यामुळे या घटनेचा गुन्हा त्यावेळी नोंद झाला नाही.

26 नोव्हेंबर 2024 सुदर्शन घुले हा गँगचा प्रमुख आहे. तो कराडचा निकटवर्ती आहे. साडेअकरा वाजता तो साइटवर गेला आणि शिवाजी थोपटे याला धमकी दिली. कराडची मागणी पूर्ण न केल्यास काम बंद करा असे सांगितले. वाल्मिक कराडने सुदर्शन घुलेमार्फत हा मेसेज दिला.

हे ही वाचा>> Sambhajiraje : संभाजीराजेंनी दाखवले 3 जुने फोटो, वाघ्या कुत्र्याचा पुरावा नाही, हाकेंच्या 'त्या' आरोपालाही उत्तर

29 नोव्हेंबर 2024 सकाळी साडेअकरा वाजता वाल्मिक कराड यांनी विष्णू चाटेच्या मोबाइलवरून सुनील शिंदे यांना फोन केला. घुलेने सांगितले त्या पद्धतीने काम करा. अन्यथा कंपनी बंद करा असे सांगितले. यावेळी सुनील शिंदे यांनी आपला फोन स्पीकरवर ठेवला होता. तो शिवाजी थोपटे हे ऐकत होते. थोपटे यांनी वाल्मिक कराड यांचा आवाज ओळखला.(वाल्मीक कराडच्या आवाजाच्या नमुनाचे पुरावे) शिवाय हा कॉल सुनील शिंदे यांनी रेकॉर्डही केला होता.

29 तारखेला दुपारी एक वाजता सुदर्शन घुले हा पुन्हा येथील कार्यालयात गेला आणि कराड यांना भेटा, त्यांची मागणी पूर्ण करा असा मेसेज सुनील शिंदे आणि शिवाजी थोपटे यांना दिला. याची व्हिडिओ रेकॉर्डिंग सुनील शिंदे यांच्याकडे आहे.

29 तारखेला दुपारी सव्वा दोन वाजता. वाल्मिक कराड व इतर सर्व आरोपी विष्णू चाटे याच्या केज येथील पक्षाच्या कार्यालयात भेटले. त्याचे सीसीटीव्ही फुटेज, टॉवर लोकेशन, पुरावे आहेत. 

6 डिसेंबर रोजी सुदर्शन घुले प्रतीक घुले सुधीर सांगळे, हे साडेबारा वाजता अवादा कंपनीच्या मस्साजोग येथील ऑफिसमध्ये आले. यावेळी त्यांनी सुरक्षा रक्षकाला शिवीगाळ केली, मारहाण केली. त्यावेळी शिवाजी थोपटे बाहेर आले. तेव्हा सुदर्शन घुलेने सांगितले  दोन कोटीची मागणी पूर्ण करा किंवा काम बंद करा. हा कंपनीच्या ऑफिस समोर होत असलेला वाद. 

यासंदर्भात त्या ठिकाणच्या कोणीतरी ही माहिती सरपंच संतोष देशमुख यांना दिली. हा वाद मिटवण्यासाठी सरपंच संतोष देशमुख आणि गावातील काही लोक आले. यावेळी सुदर्शन घुले यांनी संतोष देशमुख यांना धमकी दिली. त्यानंतर याची पोलिसांना माहिती देण्यात आली. 

दुपारी दीड वाजता पोलीस घटनास्थळी दाखल झाले. घुले व इतर आरोपींना ताब्यात घेऊन गेले. पण या सर्व आरोपीला प्रत्यक्ष अटक 7 डिसेंबर रोजी पहाटे दाखवण्यात आली. पोलिसांनी हे प्रकरण गांभीर्याने घेतली नाही. असे निकम यांनी न्यायालयाला सांगितले.

7 डिसेंबर 2024 रात्री आठ वाजता वाल्मिक कराड याला घुलेने फोन केला आणि घडलेली संपूर्ण हकीकत सांगितली. यावेळी कराड यांनी अडथळा आणतील त्यांना संपवा असे सांगितले. अशी कबुली घुले यांनी दिली आहे. (त्याचे सीडीआर आणि इतर पुरावे सादर केले आहेत)

8 डिसेंबर रोजी विष्णू चाटे सुदर्शन घुले व अन्य एक गोपनीय साक्षीदार असे सर्वजण केज मांजरसुंबा रोडवर नांदूर फाटा येथे तिरंगा हॉटेलवर रात्री नऊ वाजेच्या सुमारास एकत्रित भेटले व त्यांची बैठक झाली. यावेळी विष्णू चाटे संतापला होता. यावेळी घुले यांनी चाटेला सांगितले, 'मी त्या ठिकाणी गेलो होतो पण संतोष देशमुख आडवे आले.' यावेळी विष्णू चाटे यांनी वाल्मिक कराडचा मेसेज सुदर्शन घुलेला दाखवला. आडवे आले तर कायमचा धडा शिकवा. (या संपूर्ण प्रकरणाचे टॉवर लोकेशन व इतर पुरावे सादर केले आहेत)

9 डिसेंबर 2024 दुपारी साडेतीन वाजता संतोष देशमुख केज बीड रोडवर उमरी फाटा टोल नाका येथून अपहरण करून क्रूर पद्धतीने हत्या करण्यात आली. किती क्रूर पद्धतीने मारले याचे फोटो आणि व्हिडिओ यातून दिसत आहे. आरोपी यावेळी हसून आनंद घेत होते. आमचे काही होऊ शकत नाही. आमच्यावर यापूर्वीही केसेस आहेत अशा धारणा होत्या. चार्ज फ्रेमसाठी ही केस तयार आहे. असा तब्बल 32 मिनिटं युक्तिवाद उज्वल निकम यांनी केला.

वाल्मिक कराड आरोपीचे वकील विकास खाडे यांचा युक्तिवाद

उज्वल निकम यांनी सांगितलेली सर्व घटना याचे सीडीआर आणि लोकेशन पुरावे वारंवार सांगितले जात आहेत. परंतु यातील काहीच आम्हाला मिळालेले नाही. हे मिळावं यासाठी आम्ही मागील तारखेला अर्ज केलेला आहे. आजही अर्ज केला आहे. 

हे सर्व पुरावे, कागदपत्र मिळाल्याशिवाय  पुढे जाता येणार नाही. चार्ज फ्रेम करता येणार नाही

यावर माननीय न्यायाधीशांनी सर्व कागदपत्र आरोपीच्या वकिलांना उपलब्ध करून देण्यात यावेत असे आदेश दिले.

यावर निकम यांनी कागदपत्र आम्ही देतो केस पुढे घेऊन जाऊ शकतो असे म्हणणे मांडले

यावर आरोपीचे वकील विकास खाडे यांनी आपण म्हणता म्हणून केस ओपन झाले असे होत नाही.

यावेळी आरोपीचे वकील यांनी गोपाल कृष्ण केसचा संदर्भ दिला. एक तासात संपूर्ण मागणी केलेले कागदपत्र दिले जातील असं उज्वल निकम यांनी सांगितलं.

यावर कागदपत्र मिळाल्यानंतर आम्हाला अभ्यास करण्यासाठी वेळ द्यावा अशी मागणी केली. त्यानंतर माननीय न्यायालयाने मागणी मान्य करत पुढील सुनावणीची तारीख 10 एप्रिल दिली.