Narendra Modi: शपथविधीची तारीख आणि वेळ ठरली, 'इथे' होणार सोहळा!

राष्ट्रपतींकडून मोदींना सरकार स्थापनेचे निमंत्रण

राष्ट्रपती द्रौपदी मुर्मू यांनी पंतप्रधान पदाच्या नियुक्तीसाठी आणि सरकार स्थापन करण्यासाठी निमंत्रण दिलं आहे. आता एनडीए नवीन सरकार स्थापन करणार असून 9 जून (रविवार) रोजी शपथविधी होणार आहे. राष्ट्रपतींच्या भेटीनंतर पंतप्रधान मोदी यांनी प्रसारमाध्यमांशी संवाद साधला आणि यादरम्यान त्यांनी सरकार स्थापनेचे निमंत्रण मिळाल्याची माहिती दिली.

हे ही वाचा>> 'ही' यादी खरीच ठरली.. कोणी सांगितलेले महाराष्ट्राचे एवढे नेमके आकडे?

हा शपथविधी सोहळा हा राष्ट्रपती भवनाच्या प्रांगणात होणार असल्याची माहिती मिळते आहे. 2014 आणि 2019 साली सरकार आल्यावरही इथेच मोदींनी शपथ घेतली होती. आता तिसऱ्यांदा पंतप्रधान पदाची शपथ घेऊन नरेंद्र मोदी हे नवा इतिहास रचणार आहेत.

'नव्या ऊर्जेसह सज्ज आहे 18वी लोकसभा' 

यावेळी पीएम मोदी म्हणाले, '18 वी लोकसभा ही एकप्रकारे नवी तरुण ऊर्जा आणि काहीतरी साध्य करण्याच्या इराद्याने असलेली लोकसभा आहे. स्वातंत्र्याच्या अमृतमहोत्सवानंतरची ही पहिलीच निवडणूक असून ही 25 वर्षे म्हणजे अमृत काळातील 25 वर्षे आहेत. जेव्हा देश 2047 मध्ये स्वातंत्र्याची शताब्दी साजरी करत आहे, तेव्हा ही स्वप्नं पूर्ण करण्यासाठी हा एक मैलाचा दगड आहे.'

हे ही वाचा>> बाळासाहेब ठाकरे, अटलबिहारी वाजपेयींचा उल्लेख, मोदी NDA च्या बैठकीत काय बोलले?

'समाजातील प्रत्येक क्षेत्रात बदल दिसून येत आहे'

ते म्हणाले, 'मी देशवासियांना खात्री देतो की, गेल्या दोन टर्ममध्ये देशाने ज्या गतीने प्रगती केली आहे, त्यात समाजातील प्रत्येक क्षेत्रात बदल स्पष्टपणे दिसत आहे. 25 कोटी लोकांचे गरिबीतून बाहेर येणे ही देशवासियांसाठी अभिमानाची बाब आहे. भारताची जागतिक प्रतिमा उदयास आली असून भारत जगासाठी विश्वबंधू म्हणून उदयास आला आहे. त्याचा जास्तीत जास्त फायदा आता होऊ लागला आहे. जागतिक वातावरणातही ही पाच वर्षे भारतासाठी अतिशय उपयुक्त ठरणार आहेत, असा माझा ठाम विश्वास आहे.'

9 जून रोजी शपथविधी

नरेंद्र मोदी पुढे म्हणाले की, 'आज सकाळी एनडीएची बैठक झाली. या जबाबदारीसाठी माझ्या सर्व सहकाऱ्यांनी मला पुन्हा पसंत केले आहे. आणि सर्व सहकाऱ्यांनी अध्यक्षांना याची माहिती दिली. राष्ट्रपतींनी मला बोलावून पंतप्रधानपदासाठी नियुक्त केले आहे आणि शपथविधीसाठी 9 जून ही तारीख मला कळवली आहे. संध्याकाळी सहा वाजेच्या सुमारास शपथविधी होईल.' असं मोदी यावेळी म्हणाले.