आर्यन खानची दिवाळी ‘मन्नत’वर; बॉम्बे हायकोर्टाने केला जामीन मंजूर

आर्यन खान, मुनमुन धमेचा आणि अरबाझ मर्चंट या तिघांनाही जामीन मंजूर करण्यात आला आहे. डिटेल ऑर्डर उद्या दिली जाणार आहे. दिवाळीच्या आधी या तिघांना जामीन मंजूर करण्यात आला आहे. त्यामुळे आर्यन खान, मुनमुन धमेचा आणि अरबाझ मर्चंट यांना उद्या किंवा परवा तुरुंगाबाहेर येता येणार आहे. आर्यन खानला 3 ऑक्टोबरला अटक करण्यात आली होती.

आर्यन खानला सत्र न्यायालयाने दोनदा जामीन नाकारला होता. एवढंच नाही तर हायकोर्टानेही मागचे दोन दिवस सुनावणी राखून ठेवली होती. जर आर्यनला आज किंवा उद्या जामीन मंजूर झाला नसता तर त्याची दिवाळी तुरुंगातच होणार होती. मात्र मुकुल रोहतगी यांनी आज ही माहिती दिली आहे की उद्या किंवा परवा म्हणजेच शुक्रवारी किंवा शनिवारी आर्यन खानला तुरुंगाबाहेर येता येणार आहे. तीन दिवस हे प्रकरण सुनावणीसाठी मुंबई हायकोर्टात होती.

Aryan Khan Case: आर्यन खान केस प्रकरणात चर्चेत आलेली पूजा ददलानी नेमकी आहे कोण?

आर्यन खान या पाच कारणांमुळे होता तुरुंगात

1. कोर्टाने म्हटले, ‘आर्यन आणि अरबाज बऱ्याच काळापासून मित्र आहेत. ते एकत्र जात होते आणि क्रूझवर एकत्र पकडले गेले. दोघांनीही त्यांच्या जबाबात ड्रग्स घेतल्याची कबुली दिली आहे. हे सर्व दर्शवते की, आर्यनला माहित होते की अरबाजच्या शूजमध्ये ड्रग्स होते.

2. आर्यनच्या वकिलांनी असा युक्तिवाद केला की त्याच्याकडे ड्रग्स सापडले नाहीत, त्यामुळे तो नशेमध्ये नव्हता. यावर न्यायालयाने म्हटले की, ‘आरोपी क्रमांक -1 (आर्यन खान) कडून कोणताही प्रतिबंधित पदार्थ सापडला नसला तरी आरोपी क्रमांक -2 (अरबाज मर्चंट) 6 ग्रॅम चरससह सापडलेला आहे. म्हणून असे म्हणता येईल की, दोघांनाही याबद्दल माहिती होती.

3. न्यायाधीश व्ही व्ही पाटील म्हणाले, ‘व्हॉट्सअॅप चॅटवरून असे दिसून येते की, आरोपी क्रमांक -1 अज्ञात व्यक्तींशी ड्रग्जबद्दल बोलत होता. म्हणून, प्रथमदर्शनी असे दिसते की अर्जदार आणि आरोपी क्रमांक-1 ने अज्ञात व्यक्तींसोबत बंदी असलेल्या अंमली पदार्थांची डील करत होता.’

4. ते म्हणाले, ‘व्हॉट्सअॅप चॅटवरून असे दिसून येते की आरोपी क्रमांक -1 आणि ड्रग पेडलर्समध्ये संबंध होते. त्याने आरोपी क्रमांक -2 सोबत चॅटिंग केली आहे. या व्यतिरिक्त, आरोपी क्रमांक 1 ते 8 यांना अटक करण्यात आली आणि त्यांच्यासोबत काही प्रमाणात बंदी घातलेले पदार्थ सापडले आहेत.’

NCB ला क्रूजवरील रेव्ह पार्टीची माहिती मिळाली होती. चौकशी दरम्यान आरोपींनी पुरवठादारांची नावे उघड केली आहेत. हे काही गुन्हेगारी कटात आरोपींचा सहभाग असल्याचे सूचित करते. प्रथमदर्शनी रेकॉर्डवर ठेवलेली सामग्री दर्शवते की NDPS चे कलम 29 या प्रकरणात लागू आहे.

5. न्यायाधीश पाटील यांना आढळले की, हे प्रकरण रिया चक्रवर्तीचा भाऊ शोविक चक्रवर्तीसारखे आहे. शोविकच्या व्हॉट्सअॅप चॅटवरून तो ड्रग्ज तस्करांच्या संपर्कात असल्याचेही उघड झाले होते. न्यायाधीश पाटील म्हणाले, ‘प्रथमदर्शनी असे दिसते की, आरोपी एका मोठ्या नेटवर्कचा भाग आहे. जसं शोविक चक्रवर्तीच्या बाबतीत होतं. आरोपी हा षडयंत्राचा भाग असल्याने, जे काही ड्रग्ज जप्त केले गेले आहेत त्याला तो जबाबदार आहे. प्रत्येक आरोपीचे प्रकरण एकमेकांपासून वेगळे करता येत नाही.’