Dhananjay Munde Profile : फडणवीसांच्या मंत्रिमंडळातील पहिली विकेट, कोण आहेत धनंजय मुंडे? A टू Z कारकीर्द

धनंजय मुंडे यांच्या कारकीर्दीची सुरुवात...

स्वर्गीय भाजप नेते गोपीनाथ मुंडे हे आपल्या राजकीय कारकीर्दीच्या मध्यावधीमध्ये असताना धनंजय मुंडे यांची राजकीय कारकीर्द सुरू झाली. गोपीनाथ मुंडे राज्याचे उपमुख्यमंत्री असताना, धनंजय मुंडे हे काही वादांचे कारण ठरले होते. त्यानंतर बीडमध्ये गोपीनाथ यांच्या कन्या पंकजा मुंडे या गोपीनाथ मुंडेंच्या वारसदार म्हणून उदयास आल्यानंतर, धनंजय मुंडे यांनी आपली वेगळी चूल मांडायचं ठरवलं. 2009 ला पंकजा मुंडेंना तिकीट मिळाल्यापासूनच धनंजय मुंडे हे भाजपमध्ये नाराज होते.

गोपीनाथ मुंडेंची साथ सोडली... 

काका गोपीनाथ मुंडे यांची साथ सोडून धनंजय मुंडे यांनी 2012 ला राष्ट्रवादीमध्ये प्रवेश केला. शरद पवार, अजित पवार यांच्या नेतृत्वात धनंजय मुंडे यांनी काम सुरू केलं. त्यानंतर धनंजय मुंडे यांना राष्ट्रवादीकडून विधान परिषदेची जबाबदारी देण्यात आली. डिसेंबर 2014 ते ऑक्टोबर 2019 पर्यंत धनंजय मुंडे हे विधान परिषद सदस्य होते. विधान परिषदेत त्यांना विरोधी पक्षनेतेपद देण्यात आलं होतं, ते त्यांनी सरकारविरोधात आक्रमक भूमिका घेत चांगलंच गाजवलं होतं. 

हे ही वाचा >>तीन महिन्यातील सर्वात मोठी बातमी, CM फडणवीसांनी कॅमेऱ्यासमोर येऊन केली घोषणा.. सरकारला हादरा

पंकजा मुंडेंचा पराभव केला... 

2019 ची विधानसभा निवडणूक परळीसाठी आणि एकूणच बीडचं सत्ताकेंद्र ज्यांच्या कुटुंबात होतं, त्या मुंडे कुटुंबासाठी ऐतिहासिक होती. या विधानसभा निवडणुकीत राष्ट्रवादीकडून धनंजय मुंडे आणि भाजपकडून पंकजा मुंडे मैदानात होत्या. या लढतीमध्ये धनंजय मुंडे यांचा विजय झाला आणि त्यांची राजकीय घोडदौड सुरू झाली. 

महाविकास आघाडीमध्ये मंत्री... 

महाविकास आघाडीचं सरकार आलं तेव्हा धनंजय मुंडे यांना मंत्रि‍पदाची जबाबदारी देण्यात आली. त्यांच्याकडे सामाजिक न्याय व विशेष सहाय्यची जबाबदारी देण्यात आली. या कालावधीतही त्यांनी सभागृहामध्ये, पक्षाच्या सभांमध्ये आक्रमक भाषणं करत, विशेष स्थान मिळवलं होतं. 

कृषिमंत्रिपदाच्या काळात भ्रष्टाचाराचे आरोप...

2022 ला अजित पवार यांनी महाविकास आघाडी आणि शरद पवार यांची साथ सोडत वेगळी भूमिका घेतली, तेव्हा सुद्धा धनंजय मुंडे यांची मोठी भूमिका होती. अजित पवार यांना भक्कम साथ देण्याचं काम धनंजय मुंडेंनी केलं होतं. त्यानंतर आलेल्या महायुती सरकारमध्ये धनंजय  मुंडे यांना कृषिमंत्रिपदाची जबाबदारी देण्यात आली होती. महायुतीत आल्यानंतर पंकजा मुंडे आणि धनंजय मुंडे हे पुन्हा एकत्र झाले. कृषी मंत्री असताना धनंजय मुंडे यांनी साहित्य खरेदीमध्ये घोटाळा केल्याचा आरोप सामाजिक कार्यकर्त्या अंजली दमानिया यांनी काही दिवसांपूर्वी केला. त्यावरूनही त्यांच्या राजीनाम्याची मागणी करण्यात आली होती.

2024 ला विक्रमी मतांनी विजयी... 

 

हे ही वाचा >> Dhananjay Munde Resigns : अखेर धनंजय मुंडे यांचा राजीनामा, रात्री उशिरा झालेल्या बैठकीत काय चर्चा झाली होती?

2024 च्या विधानसभा निवडणुकीमध्ये मुंडे भाऊ बहीण  एकत्र निवडणूक लढले. लोकसभेला धनंजय मुंडे यांनी भाजप महायुतीच्या उमेदवार असलेल्या पंकजा मुंडे यांच्यासाठी मोठी ताकद लावली. मात्र, पंकजा मुंडे निवडणूक पराभूत झाल्या. तर काही दिवसानंतर लगेचंच विधानसभेची निवडणूक जाहीर झाली, त्या निवडणुकीत धनंजय मुंडे हे विक्रमी मतांनी विजयी झाली. धनंजय मुंडे यांना महायुतीच्या नव्या सरकारमध्ये पुन्हा मंत्रिपद मिळालं. त्यांच्याकडे अन्न, नागरी पुरवठा व ग्राहक संरक्षण विभागाची जबाबदारी देण्यात आली. 

दरम्यानच्या काळात धनंजय मुंडे हे करूणा मुंडे यांच्यामुळेही अडचणीत आले होते. करूणा मुंडे यांनी त्यांच्यावर अनेक आरोप केले होते. त्यावेळी धनंजय मुंडे अडचणीत आले होते.

महायुती सरकारमधला पहिला राजीनामा...

गेल्या वर्षी 9 डिसेंबरला बीडमधील मस्साजोगमध्ये संतोष देशमुख यांची हत्या झाल्यानंतर या प्रकरणात धनंजय मुंडे यांची अत्यंत नीकटवर्तीय असलेल्या वाल्मिक कराडचा संबंध समोर आला. तसंच इतर आरोपीही धनंजय मुंडे यांच्या प्रत्यक्ष किंवा अप्रत्यक्षपणे संबंधीत असल्याचे आरोप झाले. आतापर्यंत या प्रकरणाच्या तपासात चार्जशीट दाखल झाली असून, धनंजय मुंडेंचा नीकटवर्तीय वाल्मिकला मास्टरमाईंड आरोपपत्रात करण्यात आलं आहे. त्यामुळे धनंजय मुंडे यांच्यावर राजीनाम्यासाठी दबाव येत होता. मात्र, तेव्हाही धनंजय मुंडे राजीनामा दिला नाही. अखेर संतोष देशमुख यांना मारतानाचे फोटो व्हायरल झाले आणि महाराष्ट्रात संतापाची लाट उसळली. त्यानतंर आज 4 मार्च 2025 ला धनंजय मुंडे यांनी राजीनामा दिला. मुख्यमंत्री देवेंद्र फडणवीस यांच्या सरकारमधला हा पहिला राजीनामा ठरला.