दक्षिण अफ्रिकेतून येणाऱ्या प्रत्येक प्रवाशाला केलं जाणार क्वारंटाईन, मुंबई महापालिकेचा निर्णय

काय म्हणाल्या आहेत मुंबईच्या महापौर?

दक्षिण अफ्रिका, जर्मनी, ऑस्ट्रिया, बेल्जिअम, रशिया या देशातून येणाऱ्या प्रवाशांना क्वारंटाईन करण्यात येईल असं महापौर किशोरी पेडणेकर यांनी सांगितलं. या देशामधून येणारा प्रवासी पॉझिटिव्ह आढळला तर जिनोम सिक्वेन्सिंग करण्यात येईल असंही किशोरी पेडणेकर यांनी सांगितलं. नव्या कोरोना व्हेरिएंट संसर्गाच्या पार्श्वभूमीवर आवश्यक उपाययोजना तसंच नियोजन यासाठी मुंबई महापालिकेच्या वरिष्ठ अधिकाऱ्यांची एक बैठकही आयोजित करण्यात आली आहे.

WHO ने कोरोनाचा नवा विषाणू चिंताजनक असल्याचं अर्थात व्हेरिएंट ऑफ कन्सर्न असल्याचं जाहीर केलं आहे. त्यामुळे राज्यांनी आता प्रतिबंधात्मक पावलं उचलण्यास सुरूवात केली आहे.

व्हेरिएंट आणि म्युटेशन म्हणजे काय?

व्हायरसचाही जिनोम सिक्वेन्स (जनुकीय रचना) असतो. व्हायरच्या जिनोममध्ये सातत्याने बदल होतं जातो, त्यालाच म्युटेशन असं म्हटलं जातं. कोरोना व्हायरच्या जिनोममध्येही सातत्याने बदल होत असून, जगभरात चार व्हेरिएंट ऑफ कन्सर्न (अल्फा, बीटा, गामा, डेल्टा ), तर दोन व्हेरिएंट ऑफ इंटरेस्ट (ल्युम्ब्डा, म्यू) आढळून आले आहेत. यातच आता दक्षिण आफ्रिकेत B.1.1.529 हा व्हेरिएंट आढळून आला असून, तो व्हेरिएंट ऑफ कन्सर्न आहे. B.1.1.529 या कोरोना व्हेरिएंट जागतिक आरोग्य संघटनेनं ओमिक्रॉन व्हेरिएंट असं नाव दिलं आहे.

दक्षिण आफ्रिकेतील नेटवर्क फॉर जिनोमिक्स निगराणी नेटवर्क अर्थात NGS-SA (Network for Genomics Surveillance in South Africa) ला सोमवारी (22 नोव्हेंबर) हा नवीन व्हेरिएंट आढळून आला आहे. हा व्हेरिएंट आल्याचं प्रथम जाहीर करण्यात आलं. या व्हेरिएंटमध्ये SARS-CoV-2 संबंधित व्हायरस आढळून आले आहेत.

ओमिक्रॉन व्हेरिएंटमध्ये कोरोनाचे अनेक म्युटेशन आढळून आले आहेत. त्यामुळे या व्हेरिएंटचा संसर्गांचा वेग प्रचंड असल्याचं शास्त्रज्ञांकडून सांगितलं जात आहे. दक्षिण आफ्रिकेत गेल्या दोन आठवड्यात कोरोना रुग्णांच्या संख्येत तब्बल चार पटीने वाढ झाली असून, ही वाढ B.1.1.529 चा आढळून आल्यानंतर झाल्याचं दिसून आलं आहे.

NGS-SA ने सांगितलं की जोहान्सबर्ग आणि प्रिटोरियाचा समावेश असलेल्या गौतंग प्रातांत रुग्णसंख्या प्रचंड वाढली आहे. कोरोना उद्रेक झाल्यानं ही रुग्णवृद्धी झाली असल्याचंही संस्थेनं म्हटलं आहे.

ओमिक्रॉन व्हेरिएंट का धोकादायक मानला जातोय?

NGS-SA ने नव्या व्हेरिएंटच्या म्युटेशनबद्दल सांगितलं की ‘B.1.1.529 म्युटेशनची जिनोम सिक्वेन्स (जनुकीय रचना) खूप दुर्मिळ आहे. 30 म्युटेशन व्हायरसच्या स्पाईक प्रोटीनमध्ये आहेत. स्पाईक प्रोटीन हा असा भाग असतो, जिथे लस परिणामकारक ठरते. त्याचबरोबर स्पाईक प्रोटीनद्वारेच व्हायरस मानवी शरीरात प्रवेश करून शरीरातील पेशी संक्रमित करण्यास सुरूवात करतो.