जळगाव: शिवसेना-राष्ट्रवादीमध्ये जुंपली, खडसेंकडून जीवाला धोका; शिवसेना आमदाराचा गंभीर आरोप

मुक्ताईनगरात काल (25 डिसेंबर) रात्री वाद होऊन परस्परविरोधात गुन्हे दाखल करण्यात आले आहेत. यावर रोहिणी खडसे माध्यमांशी बोलताना असं म्हटलं की, महिलांवर जर अशाच पध्दतीने अन्याय होत राहिला तर वेळप्रसंगी आमदाराला चोप देऊ अशी प्रतिक्रिया दिली.

यावर आमदार चंद्रकांत पाटील यांनी पत्रकारांशी संवाद साधला. खडसे परिवाराकडून यापूर्वीही खोट्या गुन्ह्यांमध्ये अडकवणे तसेच हल्ले झाल्याचा प्रकार घडला आहे. आता रोहिणी खडसेंनी थेट चोप देण्याची भाषा केल्याने माझ्या जीवाला धोका असून याबाबत पोलीस अधीक्षकांना तक्रार दिली असल्याचे आमदार चंद्रकांत पाटील म्हणाले.

एकनाथ खडसेंमुळेच शिवसेना-भाजपची युती तुटली होती. आता महाविकास आघाडी तुटू नये. असं वक्तव्यही यावेळी आमदार चंद्रकांत पाटील यांनी व्यक्त केली आहे.

काही दिवसांपूर्वी राष्ट्रवादी कॉंग्रेसने मुक्ताईनगरात शिवसेनेच्या पदाधिकाऱ्यांचे अवैध धंदे असल्याचा आरोप करत पोलीस अधीक्षकांना निवेदन दिले होते. त्यावर शिवसेना पदाधिकाऱ्यांनी जिल्हाधिकाऱ्यांना निवेदन देत असा कुठलाही प्रकार नसल्याचे उत्तर दिले होते. आता रोहिणी खडसेंच्या आमदाराला चोप देण्याच्या वक्तव्यामुळे पुन्हा राजकीय वातावरण तापलं आहे.

‘शिवसैनिक आमच्या अंगावर धावून आले’, रोहिणी खडसेंचा आरोप

‘शिवसैनिकांनी काल रात्री महिलांचा विनयभंग करून धमकावले. आपण त्या ठिकाणी गेलो असता ते आमच्या अंगावरही धावून आले. हा सर्व प्रकार पोलिसांसमोर घडलेला आहे. तर बोदवड येथे देखील माझ्या अंगावर शिवसेनेचे पदाधिकारी धावून आले होते. यामुळे मतदारसंघात दहशतीचे वातावरण असून महिला सुरक्षित नाही.’ असा प्रत्यारोप जिल्हा बँकेच्या माजी अध्यक्षा रोहिणी खडसे-खेवलकर यांनी केला.

काल सायंकाळी आमदार चंद्रकांत पाटील यांनी एकनाथराव खडसे आणि त्यांच्या मुलीकडून आपल्या जीवाला धोका असल्याचा आरोप केल्यानंतर पत्रकारांशी बोलताना रोहिणी खडसे यांनी आमदार आणि त्यांच्या समर्थकांवर पलटवार केला.

महाराष्ट्राच्या राजकारणात चाललंय काय? आता एकनाथ खडसे शरद पवारांच्या भेटीला

एकनाथ खडसेंचीही शिवसेना आमदारावर टीका

‘आमदार चंद्रकांत पाटील यांच्या ड्रायव्हरनेच महिलेशी अश्‍लील भाषेत संभाषण केले असून त्या ऑडिओ क्लीप्स आपल्याकडे आहेत. यातील एका क्लीपमध्ये महिलेच्या नवर्‍यास तो व्यक्ती त्याच्या पत्नीला आमदारांकडे पाठविण्याचे स्पष्टपणे सांगत आहे. यामुळे आमदारांनी राजीनामा द्यावा’ अशा शब्दात एकनाथ खडसे यांनी आमदारांवर पलटवार केला आहे.

‘मुक्ताईनगर तालुक्यातील सर्व दोन नंबरचे धंदे हे आमदारांच्या समर्थकांचेच आहेत. आम्ही याबाबत तक्रार केल्यामुळे आता पोलीस कारवाई सुरू झाल्याने त्यांचे धाबे दणाणले आहे. यातूनच ते निरर्थक आरोप करत आहे.’ असंही एकनाथ खडसे यांनी म्हटलं आहे.