उस्मानाबाद : काँग्रेसचा स्वबळाचा आग्रह शेवटपर्यंत टिकेल असं वाटत नाही – जयंत पाटील

राष्ट्रवादी पक्ष स्वबळाची चाचपणी करत नाहीये पण तीन पक्षापैकी एक पक्ष जर स्वबळाचा आग्रह धरत असेल तर राष्ट्रवादी आणि शिवसेनेचा एकत्र लढण्याचा विचार पक्का आहे. काँग्रेसचा स्वबळाचा आग्रह शेवटपर्यंत टिकेलं असं वाटत नाही. काँग्रेसला आम्ही सोबत घेण्याचा प्रयत्न करु, तिन्ही पक्ष समजुतदार आहेत. जयंत पाटील उस्मानाबाद दौऱ्यावर पत्रकारांशी बोलत होते.

यावेळी बोलत असताना जयंत पाटील यांनी भाजपमधून राष्ट्रवादीत येणाऱ्या इच्छुकांची संख्या जास्त असल्याचं सांगितलं. मंदिर उघडल्यानंतर त्यांच्या पक्षप्रवेशाचा मुहुर्त सापडेल. अनेक नेते स्वगृही परतण्यास उत्सुक आहेत परंतू कोरोनामुळे त्यांचे पक्षप्रवेश रखडले आहेत. स्थानिक पातळीवरील कार्यकर्त्यांशी चर्चा करुन बेरजेचं राजकारण करत या सर्व नेत्यांना टप्प्या टप्प्याने प्रवेश दिला जाईल असंही पाटील यांनी स्पष्ट केलं.