नवा व्हेरिएंट आढळल्यानंतर मोदींनी घेतली तातडीची बैठक; अधिकाऱ्यांना दिल्या ‘या’ सूचना

आज झालेल्या बैठकीत पंतप्रधान मोदी यांनी अधिकाऱ्यांकडून विविध प्रकारची माहिती घेतली. यामध्ये भारतात कोणते व्हेरिएंट आहेत? त्याबद्दल जाणून घेतलं. विदेशी पर्यटकांचे नमुने जिनोम सिक्वेन्सिंगसाठी पाठवण्यात यावेत असंही म्हटलं आहे.

आधी अल्फा, मग बीटा, मग डेल्टा आणि आता ‘ओमिक्रॉन..’कोरोनाच्या नव्या विषाणूंची ही साखळी थांबता थांबेना..आता आफ्रिकेत कोरोनाच्या नव्या विषाणूनं सध्या सगळ्या जगाची चिंता वाढवली आहे. WHO नं या व्हेरिएंट ऑफ कन्सर्नच्या यादीत टाकलंय. अनेक देशांनी खबरदारीच्या उपाययोजना सुरु केल्या आहेत. भारतातही आज पंतप्रधान मोदींनी या नव्या विषाणूच्या पार्श्वभूमीवर कोरोनाच्या स्थितीचा आढावा घेण्यासाठी उच्चस्तरीय बैठक बोलावली.

भारतात सध्या या कोरोनाच्या नव्या ‘ओमिक्रॉन’ विषाणूचा एकही रुग्ण सापडलेला नाही. पण मागच्या लाटेत आपल्याला जोरदार तडाखा बसला होता. हा नवा विषाणू डेल्टापेक्षाही भयानक मानला जात आहे. त्याच पार्श्वभूमीवर पंतप्रधानांनी यावेळी उशीर होऊ नये यासाठी ही उच्चस्तरीय बैठक बोलावली. कॅबिनेट सचिव राजीव गौबा, आरोग्य सचिव राजेश भूषण नीती आयोगाचे सदस्य व्ही के पॉल यांच्या उपस्थितीत ही बैठक पार पडली.

अमेरिका, रशिया, कॅनडा, ब्रिटन, ऑस्ट्रेलिया यासारख्या अनेक देशांनी आफ्रिकेतून येणाऱ्या फ्लाईटसवर बंदी घातलीय. न्यूयॉर्कमध्ये हेल्थ एमर्जन्सी लागू करण्यात आली आहे. भारतातही तातडीनं फ्लाईटस बंदी लागू करण्यात यावी अशी मागणी मुंबईच्या महापौरांनी, दिल्लीच्या मुख्यमंत्र्यांनी पंतप्रधानांकडे केली आहे.

Omicron Variant: दक्षिण आफ्रिकेतील ओमिक्रॉन व्हेरिएंट किती धोकायदायक? लस प्रभावी आहे का?

ओमिक्रॉन हा डेल्टापेक्षाही प्रचंड वेगानं पसरतोय. आत्तापर्यंत या विषाणूचे 50 म्युटंटस सापडल्याचं डॉ. रमण गंगाखेडकर यांनी एका मुलाखतीत म्हटलं आहे.. पण सोबतच अजून या विषाणूमुळे नेमकी हॉस्पिटलायझेशनची गरज किती, मृत्यूचं प्रमाण किती आहे याचा अभ्यासपूर्ण निष्कर्ष समोर आलेला नाहीय. पण कमी संख्या असतानाही जगात यावेळी सतर्कता अधिक आहे ही त्यात चांगली गोष्ट म्हणायला हवी असंही त्यांनी म्हटलंय.

मार्च 2020 पासून बंद असलेल्या आंतरराष्ट्रीय फ्लाईटस भारतात 15 डिसेंबरपासून सुरु होतील असं शुक्रवारीच जाहीर करण्यात आलंय. अर्थात त्यात वेगवेगळ्या देशांचे तीन गट धोका पातळीनुसार करण्यात आले आहेत. पण आफ्रिकन विषाणूच्या वाढत्या उद्रेकामुळे या फ्लाईटसबंदीबाबत पुन्हा गांभीर्यानं विचार करण्याची वेळ आली आहे