राज्यातल्या सुपरमार्केटमध्ये मिळणार वाईन, राज्य सरकारची परवानगी

सध्या राज्यात वाईनची दरवर्षी ७० लाख लिटरच्या घरात विक्री होते. सरकारच्या या नव्या धोरणामुळं हा आकडा आता १ हजार कोटी लिटरपर्यंत वाढण्याची अपेक्षा आहे. मात्र, त्या आधी राज्य सरकारनं वाईनवर प्रति लिटरमागे १० रुपयांचा अबकारी कर जाहीर केला आहे. त्यामुळे वाईन च्या दरांमध्ये वाढ होणार आहे. याव्यतिरीक्त किराणा दुकानात होणाऱ्या वाईनची विक्री ही बीअरच्या धर्तीवर कॅनमधून करण्याची मागणी होत आहे. गेल्या काही दिवसांपासून राज्य सरकार नवीन वाईन पॉलिसी राबवण्याच्या तयारीत होतं. त्या दृष्टीकोनातून आज हे पाऊल टाकण्यात आलंय.

याबद्दल बोलताना राज्याचे अल्पसंख्याक मंत्री नवाब मलिक म्हणाले, “महाराष्ट्रात बऱ्याच वाईनरी असताना आता १००० चौरस फुटांच्या छोट्या दुकानांमध्ये वाईन विक्रीला परवानगी देण्यात आली आहे. शेतकऱ्यांच्या फळ उत्पादनावर वाईनरी चालते. त्यांना चालना देण्यासाठी वाईन विक्री करता येणार आहे.” उत्पादन शुल्कानं या आधीच आयात व्हिस्कीवरील शुल्क ३०० टक्क्यांवरून १५० टक्क्यांवर आणले आहे. आता सुपर मार्केटमध्ये वाईन विक्रीचा निर्णय जाहीर करण्यात आला आहे.