शनिवार-रविवार शहरात लसीकरण बंद, मुंबई महापालिकेची माहिती

लसीकरणाबद्दलची पुढची माहिती नागरिकांना लवकरच कळवण्यात येईल असं महापालिकेने आपल्या सोशल मीडिया अकाऊंटवरुन जाहीर केलंय.

लसीचा पहिला डोस घेतल्यानंतर दुसरा डोस कधी घ्यायचा यावरुन सध्या लोकांमध्ये बराच गोंधळ निर्माण झालाय. एकीकडे महापालिका लसीच्या तुटवड्यामुळे लसीकरण बंद ठेवत असताना शहरात लसीकरणावरुन श्रेयवादाची लढाई सुरु झाली आहे.

भाजपला सत्तेतून दूर करण्यासाठी ३ पक्षांनी मिळून बनवलेल्या महाविकास आघाडी सरकारमध्ये सर्वकाही आलबेल आहे असं चित्र दिसत नाहीये. मुंबईतील वांद्रे पूर्व मतदार संघात कोरोना लसीकरण केंद्राच्या उद्घाटनावरुन पोस्टरबाजी करणाऱ्या शिवसेनेला काँग्रेस आमदार झिशान सिद्दीकी यांनी खडे बोल सुनावले आहेत.

झिशान सिद्दीकी यांनी आपल्या ट्विटर अकाऊंटवर वांद्रे पूर्व मतदार संघात लसीकरण केंद्राच्या उद्घाटनासाठी शिवसेनेने लावलेल्या पोस्टर्सचे फोटोग्राफ टाकत प्रश्न विचारला आहे. “इथे लसींपेक्षा तुम्हाला पोस्टर्सच जास्त दिसतील. या लसी शिवसेना स्वतःच्या पार्टी फंडातून आणते आहे का? कारण मला कुठेही महाविकास आघाडी सरकारचा उल्लेख दिसत नाहीये. लसीकरण केंद्राच्या उद्घाटनाचा गाजावाजा करणं थांबवा, ते आपलं कामच आहे”, असं म्हणत सिद्दीकी यांनी सेनेला टोला लगावला आहे.