भाजपशी जवळीक? अजित पवार नागपूरच्या वज्रमूठ सभेत भाषण करणार का?

महाविकास आघाडीच्या वज्रमुठ सभेमध्ये एक सूत्र मांडण्यात आलेला आहे. त्या सूत्रानुसार प्रत्येक पक्षाकडून 2 वक्ते भाषण करतात. म्हणजे एकूण 6 जणांचं भाषण होतं. अशात नागपूरच्या सभेमध्ये राष्ट्रवादी काँग्रेसकडून पक्षाचे प्रदेशाध्यक्ष जयंत पाटील आणि काटोलचे आमदार, माजी गृहमंत्री अनिल देशमुख यांचं भाषण होणार असल्याची माहिती आहे. प्रदेशाध्यक्ष म्हणून जयंत पाटील आणि विदर्भातील मोठे नाव, महत्वाचा चेहरा म्हणून देशमुख यांचं भाषण होणार असल्याचं सांगितलं जात आहे. मात्र विरोधी पक्षनेते म्हणून अजित पवार यांचं भाषण का नाही असा सवाल आता उपस्थित होऊ लागला आहे.

अजित पवार पुन्हा भाजपसोबत जाणार? शरद पवारांनी काय सांगितलं, राऊतांनी दिलं उत्तर

अजित पवार आणि राष्ट्रवादीच्या भूमिका :

मागील काही दिवसांपासून अजित पवार आणि राष्ट्रवादीच्या भूमिका भाजपला पुरक असल्याचं दिसून येत आहे. यात मग काँग्रेसने उपस्थित केलेला पंतप्रधान नरेंद्र मोदी यांचा डिग्रीचा मुद्दा असो किंवा अदाणींच्या मुद्द्यावरुन शरद पवार यांनी काँग्रेसला फटकारणं असो. पंतप्रधान नरेंद्र मोदी यांच्या डिग्रीचा मुद्दा कसा गैर लागू आहे चुकीच्या पद्धतीने तो मुद्दा घेतला जातो त्या मुद्द्यात काही अर्थ नाही, अशा पद्धतीची भूमिका अजित पवार यांनी मांडली. त्यानंतर अजित पवार 17 तास नॉट रिचेबल होते. यावर त्यांनी पित्ताचा त्रास होतं असल्याने आराम करत असल्याचं सांगितलं होतं. त्याच दरम्यान, अजित पवार यांच्या पत्नी सुनेत्रा पवार यांना जरंडेश्वर कारखाना प्रकरणात क्लिनचीट मिळाल्याच्या बातम्या आल्या होत्या.. याच सगळ्या घडामोडींमुळे अजित पवार यांचंं भाषण न होणं ही मोठी राजकीय घडामोड म्हणून पाहिलं जातं आहे.

मुंबई Tak बैठक: अजित पवार नॉट रिचेबल असताना कुठे होते?, फडणवीसांनी खरं काय ते सांगूनच टाकलं!

अजित पवार संशयाच्या फेऱ्यात :

दरम्यान, अजित पवार हे स्वतः संशयाच्या फेऱ्यात अडकल्याचं मत ज्येष्ठ पत्रकार संजय जोग यांनी ‘मुंबई तक’सोबत बोलताना व्यक्त केलं. जोग म्हणाले, आधी ते १७ तास ते नॉट रिचेबल होते. त्यानंतर, दक्षिण मुंबईच्या एका हॉटेलमध्ये अजित पवार, सुनिल तटकरे, धनंजय मुंडे आणि प्रफुल्ल पटेल यांची एक खाजगी बैठक झाल्याच्या बातम्या बाहेर येत आहेत. त्याचवेळी मुंबई तकच्या बैठकीत उपमुख्यमंत्री देवेंद्र फडणवीस यांनीही मान्य केलं की, काँग्रेस आणि राष्ट्रवादीमधील काही नेते आमच्या संपर्कात आहेत आणि ते योग्यवेळी आमच्यासोबत येतील. त्यामुळे हे संशयाचं वातावरण तयार झालं आहे.

2019 मध्ये झालेला शपथविधी आणि त्यानंतर घडलेल्या घडामोडीनंतर आता मात्र अजित पवार हे खुलेपणाने भाजपसोबत जातील, असा ठाम दावा जोग यांनी मुंबई तकसोबत बोलताना व्यक्त केला. सर्वोच्च न्यायालयाचा निकाल येईपर्यंत वाटाघाटी सुरु राहतील. त्यानंतर एकनाथ शिंदेंसह १६ जण अपात्र ठरले तर पर्यायी सरकारमध्ये अजित पवार असतील. वाटाघाटीमध्ये या चर्चा होतील की मुख्यमंत्री कोण, उपमुख्यमंत्री, अजित पवार मुख्यमंत्री होणार का? याबाबत कल्पना येईल असंही मत जोग यांनी व्यक्त केलं.

राष्ट्रवादी, काँग्रेसचे अनेक आमदार संपर्कात, पण…; फडणवीसांनी सांगितली प्रवेशाची वेळ

जोग म्हणाले, अजित पवार यांच्या कार्यालयाकडून काही गोष्टी सांगण्यात आल्या आहेत. यात बाजार समित्याच्या निवडणुका आहेत, त्यात अजित पवार व्यस्त आहेत. आधीच पवार यांच्या स्टाफमधील काही लोक नागपूरमध्ये गेले आहेत. तिसरी गोष्ट म्हणजे अजित पवार उद्या बारामती असणार असून ते रविवारी सकाळी नागपूरला जातील. तर चौथा मुद्दा म्हणजे नाव दिलेल्या वक्त्यांना पुरेसा वेळ मिळावा यासाठी अजित पवार यांचं नाव देण्यात आलेलं नाही.

शरद पवार यांचा आमदारांना इशारा :

जोग म्हणाले, नुकतंच शरद पवार यांनी एबीपी माझा वृत्तवाहिनीला दिलेल्या मुलाखतमीध्ये एक बोलकं वाक्य वापरलं. ते म्हणाले, ज्यांना कोणाला जायचं आहे, त्यांनी आताच जावा. पण तो त्याचा वैयक्तिक निर्णय असेल. त्या निर्णयाचं आणि महाविकास आघाडीशी काहीही देणं-घेणं नसेल. यातून एक प्रकारे शरद पवार यांनी आमदारांना एक इशारा दिला आहे. जे आमदार अस्वस्थ आहेत, जे आमदार ईडी, सीबीआयला घाबत आहे त्यांना शरद पवार यांनी इशारा दिला आहे.

दोन तृतीयांश आमदार अजित पवारांसह जाणं अशक्य :

शरद पवार यांची सहमती नसताना अजित पवार यांना भाजपसोबत जायचं असल्यास त्यांना दोन-तृतीयांश म्हणजेच 36 आमदारांची आवश्यकता भासेल. अन्यथा हे सर्वजण अपात्र ठरतील. पण अजित पवार यांच्यासोबत एक गठ्ठा दोन-तृतीयांश आमदार जातील यामध्ये मला काहीही तथ्य वाटतं नसल्याचं जोग यांनी म्हटलं आहे. राष्ट्रवादीमध्ये काही आमदार अस्वस्थ नक्कीच आहेत. पण आताच्या घडीला 36 आमदार अजित पवार यांच्यासोबत जातीय यात तथ्य नाही.