शिंदेंच्या दोन नेत्यांमध्ये राजकीय कुस्ती, अनिल परबांकडून थेट विजयी उमेदवाराचं घोषित

गजानन किर्तीकर आणि रामदास कदमांच्या वादावर बोलताना अनिल परब यांनी दोन्हीही ज्येष्ठ नेत्यांना दिवाळी सोबतच पुढील भांडणांसाठी शुभेच्छा देत टोला लगावला. तसेच आम्ही यांना गद्दार म्हटलं की राग येतो, पण आता तेच एकमेकांचा बायोडेटा वाचून दाखवतायत. शिवसेनेत असताना यांनी काय काय केले ते लोकांसमोर आणतातय, हे दोघेही शिवसेनेचे ज्येष्ठ नेते असल्याचेही अनिल परब यांनी यावेळी अधोरेखीत केले.

हे ही वाचा :Gautam Singhania : रेमंडचे अध्यक्ष गौतम सिंघानिया यांचा पत्नीशी काडीमोड

अनिल परब पुढे म्हणाले की, जे बाळासाहेबांच्या विचारांचा दाखले देतायत, त्यांची ही प्रकरणे बाळासाहेब ह्यात असतानाची आहेत. त्यामुळे बाळासाहेब असताना ह्यांची निष्ठा किती मजबूत होती, याचे दाखले ते देतायत. त्यामुळे बाळासाहेब जीवंत असताना यांनी काय काय केले आहे, हे आता तमाम शिवसैनिकांना कळाल्याचे अनिल परब यांनी सांगितले. तसेच रामदास कदम गजाभाऊच्या निष्ठेचे पाढे वाचतायत आणि पण कोणी कोणाला कसं पाडलं, हे आम्हाला सगळं माहिती आहे, असे देखील अनिल परब म्हणाले.

या वादात गजाभाऊंनी प्रेसनोट काढून रामदार कदमांवर आणखीणच गंभीर आरोप केले होते. गजाभाऊंच्या या आरोपावर बोलताना अनिल परब म्हणाले, या गोष्टी आम्हाला माहितीच आहेत. पण गजाभाऊंनी प्रसिद्धी पत्रक काढून अख्ख्या महाराष्ट्राला सांगितलं. तसेच हे उद्धव ठाकरेंच्या कारकिर्दीत नव्हे तर बाळासाहेबांच्या वेळेस हे घडलं असल्याचेही परब म्हणाले आहेत.

रामदास कदमांचा आरोप खोडला

अनिल परब यांनी यावेळी रामदास कदमांचा आरोप देखील खोडून काढला. रामदास कदम म्हणतात ना कफन बांधुन गेलो. काय कफन बांधुन नाही, त्यावेळेस नारायण राणेंसोबत पहिलं नाव रामदास कदमांचं होतं. त्यांना विरोधी पक्षनेता केला म्हणून ते शिवसेनेत राहिल्याचा गौप्यस्फोट अनिल परब यांनी केला.

शिवसेनेचाच उमेदवार विजयी होणार

उत्तर पश्चिम लोकसभा मतदार संघाच्या निवडणूकीवर बोलताना अनिल परब म्हणाले की, दोन्हीही नेत्यांनी भांडण संपून एकत्र येऊन निवडणूक जरी लढली तरीही अमोल कीर्तिकर आमच्या पक्षातून विजयी होणार आहेत. गजानन किर्तीकर असो किंवा रामदास कदमांचा मुलगा, जिंकणार अमोल किर्तीकरच हे मी छातीठोकपणे सांगतो,असे अनिल परब यांनी सांगितले.

हे ही वाचा :Video : ‘टायगर’ची एन्ट्री होताच थिएटरमध्ये फोडले फटाके, सलमान चाहत्यांवर प्रचंड भडकला

तसेच हा मतदार संघ शिंदे गटाला मिळणार का? असा सवाल अनिल परबांना केला असता ते म्हणाले, मला वाटते भाजप यांच्यातला वाद वाढवून ती सिट स्वत:कडे घेईल. आणि यांच्यामध्ये कोणामध्येच हिम्मत नाही की भाजपला डोळे मोठे करून पाहायची, जी काही दादागिरी करतात ती आमच्याकडेच करतायत, अशी टीका देखील शिंदे गटावर केली.

उद्या जर भाजपकडे मतदार संघ गेला, तर रामदास कदमांकडे देवेंद्र फडणवीसांकडे जाऊन बोलायची हिम्मत आहे का? हे दोघे काय करणार आहेत? याच्या मुख्यमंत्र्यांची तरी हिम्मत आहे का? असे रोखठोक सवालच यावेळी अनिल परबांनी उपस्थित केले. त्यासोबत पुढच्या निवडणूकीत शिंदेंसोबत किती लढतील हे देखील तपासून बघा. काही जण कमळावर लढतील, तर काहींना तिकीटच मिळणार नाही. 13 जण त्यांच्यातले असतील तर त्यातले यांचे 3 पण लढणार नाहीत,असे भाकीत देखील अनिल परबांनी केले.