NCP: राष्ट्रवादी कुणाची? कोणी घेतला निकालाआधीच निवडणूक आयोगावर संशय?

काँग्रेस पक्षाबाबत निवडणूक आयोगाचा निकाल 30 सप्टेंबरपर्यंत येणे अपेक्षित आहे.आणि आमदारांच्या पाठिंब्याच्या आधारे राष्ट्रवादी काँग्रेस पक्षाचे नाव आणि चिन्ह अजित पवार यांना दिले जाईल, असा विश्वास प्रफुल पटेल यांनी व्यक्त केला आहे.

शरद पवार गटाचे नेते जितेंद्र आव्हाडांनी आता निवडणूक आयोगावर संशय व्यक्त केला आहे. जितेंद्र आव्हाडांनी एक ट्विट केले आहे. या ट्विटच्या सुरुवातीला जितेंद्र आव्हाडांनी प्रफुल पटेल यांचे विधान लिहले आहे. राष्ट्रवादी काँग्रेस पक्ष आणि त्याची निशाणी ही आम्हांलाच मिळणार आणि ती देखील 30 सप्टेंबरच्या अगोदर..असे आव्हाडांनी लिहले आहे.

आतापर्यंत मॅच फिक्सिंग ऐकलं होतं, पण आता निवडणूक आयोगातही फिक्सिंग होत आहे, हा सर्वात मोठा पुरावा असल्याचा आरोप जितेंद्र आव्हाड यांनी केला आहे. अशा वक्तव्यांमुळे निवडणूक आयोगाची भूमिका ही संशयास्पद वाटते, असे आव्हाड यांनी म्हटले आहे. या देशामध्ये संस्थांचे स्वातंत्र्य जिवंत आहे की नाही? असा सवाल देखील जितेंद्र आव्हाड यांनी उपस्थित केला.

प्रफुल पटेल काय म्हणाले?

राष्ट्रवादी पक्षाबाबत येत्या 30 सप्टेंबरपर्यंत निर्णय येणे अपेक्षित असल्याचा दावा प्रफुल पटेल यांनी केला आहे. प्रफुल्ल पटेल म्हणाले, लोकांच्या मनात शंका, राष्ट्रवादी पक्ष हा खऱ्या अर्थाने कोणाकडे राहणार आहे.मी तुम्हाला आवर्जुन सांगतो. राष्ट्रवादी काँग्रेस पक्षाबाबत निवडणूक आयोगाचा निकाल 30 सप्टेंबरपर्यंत येणे अपेक्षित आहे.आणि आमदारांच्या पाठिंब्याच्या आधारे राष्ट्रवादी काँग्रेस पक्षाचे नाव आणि चिन्ह अजित पवार यांना दिले जाईल, असा विश्वास प्रफुल पटेल यांनी व्यक्त केला आहे. प्रफुल पटेल (Praful Patel) बीडच्या सभेत बोलत होते.