Women Reservation : पवारांवर ‘बाण’, सुप्रिया सुळेंना चिमटा; नवनीत राणांनी चढवला हल्ला

लोकसभेत महिला आरक्षण विधेयकावर लोकसभेत चर्चा झाली. यावेळी नवनीत राणांनी विधेयकाला पाठिंबा दिला. राणांनी काही मुद्द्यांचा उल्लेख आपल्या भाषणात केला.

नवनीत राणा लोकसभेत काय बोलल्या?

खासदार नवनीत राणा म्हणाल्या, “आज सगळे चर्चा करताहेत की आरक्षण असायला हवे. आम्हा सगळ्या महिलांची इच्छा आहे. पण, ही गोष्टही खरी आहे की, आमच्यापेक्षाही जास्त पुरुषांचीही इच्छा आहे. त्याचं सगळ्यात मोठं उदाहरण पंतप्रधान मोदी आहेत. महिलांना समानतेची वागणूक दिली जावी, अशी त्यांची इच्छा आहे. केवळ भाषणातच महिलांच्या सन्मान केला जाऊ नये, तर त्यांच्या अधिकारासाठीही हे विधेयक संसदेत यायला हवं म्हणून पंतप्रधानांचे मी आभार मानते.”

सुप्रिया सुळेंना काढला चिमटा

याच विधेयकावर बोलताना सुप्रिया सुळेंनी वडील शरद पवारांच्या काही निर्णयाचा उल्लेख केला. यात शरद पवारांनी मुलगी असो वा मुलगा… एकच आपत्य जन्माला घालायचं असा निर्णय घेतल्याचा त्यांनी उल्लेख केला. त्यावरून राणांनी चिमटा काढला.

हेही वाचा >> Mohammed Siraj : हैदराबाद ते टीम इंडिया… असा घडला सिराज! प्रवास तुम्हाला देईल ऊर्जा

खासदार राणा म्हणाल्या, “खूप आव्हांनाचा सामना करून महिला इथपर्यंत पोहोचतात. पण, विरोधी पक्षातील काही नेत्यांनी असंही म्हटलं की, महाराष्ट्र आणि बंगालमध्ये आम्ही सर्वात आधी आरक्षण आणलं. मी घरात एक मुलगी आहे किंवा एक मूल असं बोलताना मी माझ्या संसदेतील काही सहकाऱ्यांना ऐकलं. आनंद होतो की, मोठ्या नेत्यांनी असे निर्णयाची सुरूवात आपल्या कुटुंबापासून केली. महाराष्ट्रात तर ग्रामपंचायत, जिल्हा परिषदेत महिलांना आरक्षण मिळालं आहे.”

“माझा एक प्रश्न आहे. काँग्रेसच्या सोनिया गांधींनी विधेयकाला पाठिंबा दिला. त्या म्हणाल्या की, हे विधेयक आम्ही आणलं होतं. आमचं हे स्वप्न होतं. मला त्यांनाही विचारायचं की, हे तुमचं स्वप्न होतं, तर 27 वर्षात तुम्ही हे पूर्ण का करू शकला नाहीत. मोदीजींच्या सरकारला 9 वर्षे झाली आणि महिलांच्या अधिकारांसाठी हे विधेयक आणलं. मांडलं. देशातील महिलांना आत्मविश्वास आहे की, हे विधेयक मंजूर होईल. देशातील महिलांना कळतंय की, मोदींनी मतदानासाठी महिलांचा वापर नाही केला, तर अधिकार देण्याचं काम संसदेतून केलं”, असं नवनीत राणा लोकसभेत बोलताना म्हणाल्या.

उल्लेख न करता शरद पवारांना केलं टार्गेट

नवनीत राणा म्हणाल्या की, “महिलांचा वापर राजकीय व्यासपीठावर केला गेला, पण त्यांना अधिकार देण्याबद्दल कुणीही बोललं नाही. तुमचे उद्देश इतके नितळ होते, तर महाराष्ट्रातील राजकारणाबद्दल बोलुयात… जेव्हा आपण आरक्षणावर बोलतो, तेव्हा त्यांना हेही उत्तर द्यावं लागेल की, आजपर्यंत महिलेला ना कधी मुख्यमंत्री पद दिलं गेलं ना उपमुख्यमंत्री पद.”

हेही वाचा >> Women Reservation : 5 कारणं… जी सांगतात महिलांना राजकारणात 33 टक्के आरक्षण का आवश्यक?

“त्यांना हेही उत्तर द्यावं लागेल की, महिलांबद्दल इतकं प्रेम आणि विश्वास आहे, तर महाराष्ट्रात महिलांवर विश्वास का टाकला नाही. केवळ बोलण्यातच विश्वास… महिलांचा वापर केला गेला”, असं टीकास्त्र नवनीत राणांनी डागलं.