Hindenburg Report : भारतात खळबळ! "सेबी अध्यक्षांच्या परदेशात बनावट कंपन्या; अदाणी समूहाशी संबंध"

10 ऑगस्ट रोजी हिंडनबर्ग रिसर्चने वेबसाईटवर यासंदर्भातील रिपोर्ट प्रसिद्ध केला आहे. एका व्हिसलब्लोअरच्या कागदपत्रातून सेबी अध्यक्ष माधवी पुरी बुच, धवल बुच आणि अदाणी समूहाचे घोटाळ्यात कनेक्शन असल्याचे हिंडनबर्ग रिसर्चने म्हटले आहे. 

हिंडनबर्ग रिसर्चने काय म्हटलंय?

हिंडनबर्गने रिपोर्टमध्ये म्हटलं आहे की, अदाणी ग्रुप आणि सेबी अध्यक्ष यांच्यात संबंध आहेत. भारताबाहेरील ज्या संस्थांमधील पैशांचा वापर अदाणी समूहातील विनोद अदाणींनी आर्थिक गैरव्यवहारासाठी केला. त्या दोन देशातील संस्थांमध्ये सेबी अध्यक्ष माधवी पुरी बुच यांची भागीदारी होती.

हेही वाचा >> उद्धव ठाकरेंच्या सभेदरम्यान ठाण्यात तुफान राडा, काय घडलं? 

माधवी पुरी बुच आणि त्यांचे पती धवल बुच यांनी 5 जून 2015 रोजी सिंगापूरमधील आयपीई प्लस फंड 1 चे खाते उघडले होते. आयआयएफएल फंडाच्या घोषणेत गुंतवणुकीचा स्त्रोत पगार असल्याचे म्हटले गेले. बुच दाम्पत्याची एकूण गुंतवणूक 10 मिलियन डॉलर आहे. बर्म्युडा आणि मॉरिशस फंडामध्ये दोघांची छुपी हिस्सेदीरी होती, असेही हिंडनबर्गने रिपोर्टमध्ये म्हटले आहे. 

सेबी अध्यक्ष माधवी बुच, अदाणी समुहात संबंध -हिंडनबर्ग

"अदाणी समूहाच्या हे लक्षात आले की आपले कामकाज सुरू ठेवल्यास, त्यामध्ये कोणताही गंभीर हस्तक्षेप होण्याची जोखीम नाही. अदाणींना वाटणारा आत्मविश्वास आमच्या आधी लक्षात आला होता. त्यामुळे अदाणींचे माधवी पुरी बुच यांच्याशी संबंध असल्याचे सूचित होत होते", असेही हिंडनबर्ग रिसर्चने म्हटले आहे.

हेही वाचा >> ''ठाकरे पवारांच्या घरी बैठका, फडणवीसांसह 'या' नेत्यांना अटक करण्याचा होता प्लॅन''

मॉरिशस फंडची स्थापना इंडिया इन्फोलाईनच्या माध्यमातून अदाणी समूहाच्या एका संचालकांनी केली होती. त्यात माधवी पुरी बुच यांची हिस्सेदारी होती. आजपर्यंत सेबीने अदाणी समूहाविरोधात कोणतीही कारवाई केली नाही, असेही हिंडनबर्गने म्हटले आहे.  

हिंडनबर्ग रिसर्चचे आरोप निराधार -माधवी पुरी बुच

वृत्तसंस्थेने दिलेल्या वृत्तानुसार, सेबी अध्यक्ष माधवी पुरी बुच आणि त्यांचे पती धवल बुच यांनी हिंडनबर्ग रिसर्चने केलेले आरोप फेटाळले आहेत. आरोप निराधार असून, आमचे आर्थिक व्यवहार उघड आहेत, असे त्यांनी म्हटले आहे.

हेही वाचा >> म्हाडाचा फॉर्म भरण्यासाठी तुमच्याकडे 'ही' कागदपत्रे हवीच! 

हे दुर्दैवी आहे की, हिंडनबर्ग रिसर्च, ज्याच्याविरोधात सेबीने कारवाई केली आहे आणि कारण दाखवे नोटीस बजावली आहे. याचे प्रत्युत्तर म्हणून चारित्र्य हनन करण्याचा पर्याय निवडला आहे, असे बुच दाम्पत्याने म्हटले आहे.