Pune : राहुल हंडोरे दर्शना पवारचा नातेवाईक होता का? ओळख झाली तरी कशी?

दर्शना पवार हत्याकांड प्रकरणात ज्याचा पोलीस पाच दिवसांपासून शोध घेत होते, त्या राहुल हंडोरेला अंधेरी रेल्वेस्थानकात मोठ्या शिताफीने पकडण्यात आले. दर्शना पवार हत्येप्रकरणी 19 जून रोजी गुन्हा दाखल झाल्यापासून पोलीस त्याच्या मागावर होते. या काळात राहुल हंडोरे पश्चिम बंगालमध्येही गेला होता. अंधेरीवरून पुन्हा तो पुढे जाणार होता. पण, त्याआधीच त्याच्या हातात बेड्या पडल्या.

राहुल हंडोरे आणि दर्शना पवार नातेवाईक होते का?

या हत्या प्रकरणानंतर राहुल हंडोरे हा दर्शना पवारचा दूरचा नातेवाईक असल्याचंही म्हटलं गेलं. पण, याबद्दल पुणे पोलीस अधीक्षक अंकित गोयल यांनीच अधिकृत माहिती दिली. त्यांनी दिलेल्या माहितीप्रमाणे राहुल हंडोरे आणि दर्शना पवार हे एकमेकांचे नातेवाईक नव्हते.

हेही वाचा >> Patna : 17 पक्ष, अजेंडा आणि… विरोधकांसमोर आहेत ‘ही’ मोठी आव्हानं

अंकित गोयल यांनी दिलेल्या माहितीप्रमाणे दर्शना पवारचे मामा जिथे राहतात, त्यांच्या घरासमोरच राहुल हंडोरेचं घर आहे. त्यामुळेच दर्शना पवार आणि राहुल हंडोरे हे एकमेकांना लहानपणापासूनच ओळखत होते. तिथूनच त्यांची ओळख पुण्यात वाढत गेली.

मिळालेल्या माहितीनुसार राहुल हंडोरे हा पुण्यात स्पर्धा परीक्षेची तयारी करण्यासाठी आला. दर्शनाही कोपरगावातून पुण्यात आली. तिथेच त्यांचे संबंध अधिक घट्ट झाले.

काम करून स्पर्धा परीक्षेची तयारी

राहुल हंडोरे हा पुण्यात अर्धवेळ काम करून स्पर्धा परीक्षेची तायरी करत होता. फूड डिलिव्हरी बॉय म्हणून तो काम करायचा आणि उर्वरित वेळेत अभ्यास करायचा. त्यातच एमपीएससी परीक्षेचा निकाल लागला आणि दर्शना पवार उत्तीर्ण झाली. राहुल हंडोरे मात्र नापास झाला. त्यातच राहुलने दर्शनाला लग्नाबद्दल बोलला आणि तिने नकार दिला. त्यातूनच त्याने हे कृत्य केले.

हेही वाचा >> क्लासमेट, अफेअर आणि MPSC पास झाल्यावर दूर गेली… म्हणून राहुलने केली दर्शनाची हत्या!

कोण आहे राहुल हंडोरे?

पुणे पोलिसांच्या कोठडीत असलेला राहुल हंडोरे हा मूळचा नाशिक जिल्ह्यातील सिन्नर तालुक्यात असलेल्या शाह गावाचा रहिवाशी आहे. त्याने बीएससीपर्यंतचं शिक्षण पूर्ण केलेले आहे. त्यानंतर तो पुण्यात स्पर्धा परीक्षेची तयारी करण्यासाठी आला होता. 12 जून रोजी राहुल हंडोरे दर्शनाला राजगड बघण्यासाठी घेऊन गेला. तिला राजगडावर न नेता सीतेचा माळ घेऊन गेला आणि तिची हत्या केली.