Chhatrapati Sambhajinagar : बोटाला शाई लावून पैसे वाटप, शिरसाटांच्या फोननंतर पोलिसांनी 2 कोटी सोडले? प्रकरण काय?

हे ही वाचा >> Balasaheb Thackeray : "उद्धव आणि नितीन गडकरींना...", 2011ला बाळासाहेब सेना-भाजप युतीबद्दल काय म्हणाले होते पाहा!

राज्यात उद्या 20 नोव्हेंबरला एकाच टप्प्यात विधानसभा निवडणुकीचं मतदान आहे. मात्र आता ऐन निवडणुकीच्या एक दिवस आधी एक धक्कादायक प्रकार समोर आला आहे. बोटाला शाई लावून, मतदान कार्ड जमा करुन पैसे वाटप होत असल्याचा प्रकार समोर आला आहे. यावरुन छत्रपती संभाजीनगरच्या जवाहर नगर पोलीस ठाण्याच्या हद्दीत काहीवेळ चांगलाच गोंधळ झाल्याचं समजतंय. तसंच पोलिसांनी 18 लाखांची रक्कम जमा करुन 2 कोटी सोडून दिलेत असं म्हणत संजय शिरसाट यांनी फोन केल्याचा आरोप केला आहे. 

अंबादास दानवे यांनी काय आरोप केलेत? 

अंबादास दानवे यांनी छत्रपती संभाजीनरमध्ये घडलेल्या या प्रकारावरुन थेट एकनाथ शिंदेंच्या शिवसेनेचे नेते आणि पश्चिम विधानसभा मतदारसंघाचे आमदार संजय शिरसाट यांच्यावर गंभीर आरोप केले आहेत. "छत्रपती संभाजीनागरच्या जवाहर नगर पोलीस ठाण्याच्या हद्दीत बोटाला शाई लावून, निवडणूक ओळखपत्र जमा करून घेऊन पैसे वाटप होत असल्याची बाब समोर आली आहे. या दरम्यान पोलिसांनी साधारण १८ लाखांची रक्कम जमा करून घेत अंदाजे २ कोटींची रक्कम आमदार संजय शिरसाट यांच्या फोननंतर सोडण्यात आल्याची माझी माहिती आहे. याचा अर्थ बहुदा निवडणूक आयोगाला संभाजीनगरात निःपक्षपाती निवडणूक घ्यायची नाही. 'कर्तव्यदक्ष' जिल्हाधिकारी आणि सगळी निवडणूक यंत्रणा असताना शाई कोणाच्या सांगण्यावरून आणि कशी बाहेर आली, हा प्रश्न आहे. याचा तातडीने निवडणूक आयोगाने खुलासा करायला हवा आणि प्रकरणात तातडीने कायदेशीर कारवाई करावी." अशी मागणी केली आहे.