क्रोनोलॉजी समझिये… पाहा आर्यन खानसाठी पुढे सरसावलेले नवाब मलिक कसे सापडले ईडीच्या जाळ्यात!

आर्यन खानची अटक ते नवाब मलिकांची अटक नेमकं काय-काय घडलं?

• 2 ऑक्टोबर 2021- NCB ने कॉर्डिलिया क्रूझवर छापा टाकला. या ठिकाणी होणारी रेव्ह पार्टी आणि ड्रग्ज पार्टी त्यांनी उधळून लावली. त्यावेळी एनसीबीने आर्यन खान, त्याचा खास मित्र अरबाझ मर्चंट याच्यासहीत एकूण आठ जणांना ताब्यात घेतलं.

• 9 ऑक्टोबर 2021- 9 ऑक्टोबरला नवाब मलिक यांनी पुन्हा पत्रकार परिषद घेऊन आणखी एक गंभीर आरोप केला. ज्यामध्ये त्यांनी म्हटलं होतं की, आर्यन खानसोबतच रिषभ सचदेवा यालाही क्रूझवरुन अटक करण्यात आली होती. रिषभ सचदेवा हा भाजपच्या युवा मोर्चाचे माजी अध्यक्ष मोहित कंबोज ऊर्फ मोहित भारतीय यांचा मेहुणा आहे. रिषभला अटक केल्यानंतर भाजपची सूत्र हलली आणि या तिघांना सोडून देण्यात आलं. आर्यन खान प्रकरणात भाजप कशा प्रकारे सक्रीय आहे हे दाखवून देण्याचा प्रयत्न नवाब मलिक हे यावेळी सातत्याने करत होते.

• 31 ऑक्टोबर 2021- ‘समीर वानखेडे जन्माने मुस्लिमच आहेत. बोगस दाखला दाखवून समीर वानखेडे यांनी नोकरी मिळवली. मी माझ्या दाव्यावर ठाम आहे की ते जन्माने मुस्लिम आहेत.’ असा दावा नवाब मलिक यांनी केला होता.

• 1 नोव्हेंबर 2021- नवाब मलिक यांनी 1 नोव्हेंबर रोजी पत्रकार परिषद घेऊन पहिल्यांदाच देवेंद्र फडणवीस यांच्या पत्नी अमृता फडणवीस यांनी नदी स्वच्छता मोहिमेविषयी जे गाणं केलं होतं त्यावर आक्षेप घेतले होते. त्या गाण्याचा फायनान्स हेड जयदीप राणा आहे. नवाब मलिक यांनी यावेळी ट्विटरवर काही फोटो शेअर केले होते. यात जयदीप राणाचाही फोटो होता. जयदीप राणाला ड्रग्ज प्रकरणात अटक झालेली असून, त्यावरून मलिकांनी थेट फडणवीसांना ड्रग्ज पेडलरसोबत कनेक्शन असल्याचा आरोप केला होता.

• 1 नोव्हेंबर 2021- ‘दिवाळीच्या सुरुवातीला लवंगी फटाका वाजवून फार मोठा आवाज केल्याचा आवाज नवाब मलिक आणत आहेत. ते कोणत्या मानसिकतेत आहेत, हे सगळ्यांना माहिती आहे. मलिक यांनी जाणीवपूर्वक माझ्या पत्नीसोबतचा फोटो शेअर केला. यापाठीमागे त्यांची मानसिकता स्पष्टपणे दिसत आहे. त्यामुळे आता खरा बॉम्ब हा मी दिवाळीनंतर फोडणार.’ असा दावा देवेंद्र फडणवीस यांनी केला होता.

• 5 नोव्हेंबर 2021- दुसरीकडे आर्यन खान प्रकरणात NCB ची प्रतिमा फारच मलीन झाली होती. त्यामुळे 5 नोव्हेंबर 2021 रोजी एनसीबीचे तत्कालीन झोनल हेड समीर वानखेडे यांच्याकडून आर्यन खानसह पाच केसेसची चौकशी करण्याचे अधिकार काढून घेण्यात आले.

• 7 नोव्हेंबर 2021- 7 नोव्हेंबर 2021 रोजी नवाब मलिक यांनी पुन्हा पत्रकार परिषद घेऊन असा आरोप केला होता की, ‘आर्यन खानचं अपहरण करून खंडणी वसुलीचा भाजपच्या मोहित कंबोजने कट रचला होता. समीर वानखेडे आणि मोहित कंबोज यांचे चांगले संबंध आहेत. आर्यन खानला अडकवायचं, त्या बदल्यात 25 कोटी रूपये मागायचे.’

• 9 नोव्हेंबर 2021- नवाब मलिक यांनी 1993 च्या स्फोटातील आरोपी सरदार शाहवली खान या दहशतवाद्याकडून कुर्ला भागात एक मालमत्ता खरेदी केली होती. कोट्यवधींची किंमत असलेली ही मालमत्ता नवाब मलिकांनी अवघ्या 30 लाखांत खरेदी केली होती. या सगळ्यात मोठा अपहार झाला होता. असा आरोप विरोधीपक्ष नेते देवेंद्र फडणवीस यांनी पत्रकार परिषद घेऊन नवाब मलिकांवर केला होता.

• 9 नोव्हेंबर 2021- देवेंद्र फडणवीस बॉम्ब फोडणार होते अशी त्यांनी गर्जना केली होती. मात्र आज त्यांची पत्रकार परिषद मी पाहिली त्यांचे सगळे फटाके भिजलेले निघाले. मी कोणत्याही चौकशीला घाबरत नाही. मी कोणत्याही बॉम्बस्फोटमध्ये सहभागी असलेल्या व्यक्तीकडून कवडी मोल दराने जमीन खरेदी केलेली नाही. असं स्पष्टीकरण तात्काळ नवाब मलिक यांनी दिलं होतं.

• 23 फेब्रुवारी 2022- या आरोप-प्रत्यारोपानंतर देवेंद्र फडणवीस यांनी पुढे काहीही फारसं भाष्य केलं नव्हतं. मात्र, आज (23 फेब्रुवारी 2022) पहाटे ईडीच्या अधिकाऱ्यांनी अचानक मलिकांच्या घरी धाड मारली आणि तब्बल आठ तासांच्या चौकशीनंतर जमीन खरेदी-विक्री प्रकरणी त्यांना अटक करण्यात आली.

दाऊदच्या भावामुळे नवाब मलिक सापडले ईडीच्या जाळ्यात?

2017 साली इक्बाल कासकर, अनिस इब्राहिम, आणि दाऊद इब्राहिम यांच्याविरोधात ठाण्यात एक एफआयआर दाखल करण्यात आली होती. याच प्रकरणी खंडणीविरोधी पथकाने इक्बाल कासकरला अटक केली होती. काही वर्षांपूर्वी ठाणे पोलिसांनी इकबाल कासकर आणि अनीस इब्राहिम आणि इतरांविरुद्ध रिकव्हरी प्रकरणात गुन्हा दाखल केला होता ज्यांची कागदपत्रे ईडीने ताब्यात घेतली होती

• 15 फेब्रुवारी 2022- दाऊद इब्राहिमविरोधात नुकत्याच दाखल झालेल्या तक्रारीनंतर ईडीने 14 आणि 15 फेब्रुवारीला मुंबईतील अनेक ठिकाणांवर छापे टाकले होते. यावेळी ईडीची एक टीम हसीना पारकर हिच्या घरी देखील पोहचली होती. इथे ईडीच्या टीमने काही कागदपत्रं देखील तपासली होती.

• 17 फेब्रुवारी 2022- ईडीने छोटा शकीलचा मेव्हणा सलीम फ्रुटला देखील चौकशीसाठी हजर राहण्याचं समन्स बजावलं होतं. सलीम फ्रुटने काही काळापूर्वी पाकिस्तानला जाऊन आल्याची ईडीला माहिती मिळाली होती. तसेच भेंडी बाजारात चालत असलेल्या एका गँगसाठी सलीम फ्रुट काम करत असल्याचंही ईडीला समजलं होतं.

• 18 फेब्रुवारी 2022- ईडीने जी कागदपत्रं ताब्यात घेतली त्या कागदपत्रांच्या आधारे एनआयएने (NIA) नुकताच गुन्हा नोंदवला होता या प्रकरणाच्या आधारे ईडीने देखील मनी लाँड्रिंगचा गुन्हा दाखल केला.

• 18 फेब्रुवारी 2022- भारतीय तपास संस्थेने (NIA) अंडरवर्ल्ड डॉन दाऊद इब्राहिम आणि छोटा शकीलसह डी-कंपनीच्या सात जणांविरुद्ध एफआयआर नोंदवला होता. एनआयएच्या तपासात काही दिवसांपूर्वी असं समोर आलं होतं की, दाऊद इब्राहिम याने एक ग्रुप तयार केला आहे. ज्यामध्ये मुंबई किंवा देशाच्या दुसऱ्या भागात कायदा-सुव्यवस्था बिघडविण्याची तयारी होती. त्यात खूप लोकांशी संपर्क केला होता. त्यानंतर एनआयएने याप्रकरणी एक एफआयआर दाखल केली होती.

• 18 फेब्रुवारी 2022- कुख्यात गुंड दाऊद इब्राहिमचा भाऊ इकबाल कासकरला ठाणे कारागृहातून ED ने ताब्यात घेतलं आहे.

• 21 फेब्रुवारी 2022- मनी लाँड्रिंगप्रकरणी दाऊद इब्राहिमचा भाचा आणि हसीना पारकरचा मुलगा अली शाह पारकर याची ईडीने चौकशी केली. हसीना पारकरच्या घरातून मिळालेल्या कागदपत्रांच्या बाबतीत चौकशी करण्यासाठी अली शाह याला ईडी कार्यालयात बोलावण्यात आलं होतं.

मोठी बातमी! अल्पसंख्याक मंत्री नवाब मलिक यांना 3 मार्चपर्यंत ईडी कोठडी

• 22 फेब्रुवारी 2022- 22 फेब्रुवारीच्या मध्यरात्री नीरज गुंडे यांनी एक ट्विट केलं होतं. ज्यामध्ये असं म्हटलं होतं की, ‘सूत्रांकडून मिळालेली माहिती: दाऊद इब्राहिमचा भाऊ इक्बाल कासकर याने ईडीच्या कस्टडीत असताना महाराष्ट्रातील राजकारण्यांनी केलेल्या गुंतवणुकीचे बरेच तपशील दिले आहेत. तसेच दाऊद आणि छोटा शकीलच्या भारतातील आणि परदेशातील गुंतवणुकीचा तपशीलही दिला आहे.’

• 23 फेब्रुवारी 2022- आज पहाटेच कॅबिनेट मंत्री नवाब मलिक यांच्या घरी ईडीचं पथक पोहचलं. ज्यांनी जवळजवळ दोन तास घरातच त्यांची चौकशी केली होती. त्यानंतर त्यांना ईडी कार्यालयात नेलं आणि दुपारी तीन वाजेच्या सुमारास अटक करण्यात आली. आता या सगळ्यात असा दावा केला जात आहे की, इक्बाल कासकरने दिलेल्या काही माहितीच्या आधारेच नवाब मलिक यांना अटक करण्यात आली आहे.