Maratha Reservation : रात्री 12 ते पहाटे 3; मनोज जरांगेंनी उपोषण सोडण्यापूर्वी रात्रभर काय घडलं?

उपोषण सोडण्यासाठी जरांगे पाटलांनी सरकारसमोर 5 अटी ठेवल्या होत्या. त्यातली एक अट अशी होती की उपोषण सोडतेवेळी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि संपूर्ण मंत्रिमंडळाने हजर राहिलं पाहिजे… मात्र उपोषण सोडतेवेळी मुख्यमंत्री एकनाथ शिंदे, केंद्रीय मंत्री रावसाहेब दानवे, गिरीश महाजन, संदीपान भुमरे, राधाकृष्ण विखे पाटील, उदय सामंत, राजेश टोपे, नारायण कुचे, अर्जून खोतकर, मनोज जरांगे पाटील आणि ग्रामस्थ उपस्थित होते. हे सगळं झालं 14 सप्टेंबरच्या सकाळी… मात्र या आधीच्या रात्रीत काय घडलं हे खूप महत्त्वाचं आहे.

मनोज जरांगे उपोषण… अंतरवली सराटीत रात्रभर काय झाली चर्चा

12 सप्टेंबरला मनोज जरांगे पाटलांनी सरकारसमोर अटी ठेवल्या. लगेच 13 सप्टेंबरच्या रात्री सरकारचं शिष्टमंडळ अंतरवली सराटी गावात ठाण मांडून बसलं आणि जरांगे पाटलांशी चर्चा करु लागलं. ही चर्चा सुरु झाली 13 तारखेच्या मध्यरात्री 12 वाजता अंतरवली सराटीच्या ग्रामपंचायतीमध्ये. बंद दाराआड चर्चा सुरु झाली. ही चर्चा सुरु होती जरांगे पाटलांचं शिष्टमंडळ आणि आमदार नारायण कुचे, रावसाहेब दानवे, गिरीश महाजन यांच्यात… रात्री 1 वाजताच्या दरम्यान चर्चा संपवून  शिष्टमंडळ आणि आमदार जरांगे पाटलांना भेटले.

तिथे अर्धा तास चर्चा झाली. चर्चेनंतर रात्री 1 वाजून 40 मिनिटांच्या दरम्यान आमदार आणि जरांगे पाटलांचं  शिष्टमंडळ पुन्हा ग्रामपंचायत कार्यालयात गेलं. पहाटे 2.30 वाजता सगळं शिष्टमंडळ उपोषणस्थळी पोहोचलं. तिथे दानवे यांनी एक चिठ्ठी आपल्या खिश्यातून काढली, त्या चिठ्ठीचा फोटो गिरीश महाजनांनी आपल्याकडे काढून घेतला. त्या चिठ्ठीमध्ये आपण सरकारकडे केलेल्या मागण्यांची नोंद होती, असं स्पष्टीकरण जरांगे पाटलांनी दिलं. असं सगळं झाल्यानंतर पहाटे 3 वाजता चर्चा संपली आणि 14 तारखेला सकाळी मुख्यमंत्री एकनाथ शिंदे यांच्या हस्ते मनोज जरांगे पाटील यांनी उपोषण सोडलं.

जरांगे पाटील पुन्हा करणार उपोषण

सरकारसमोर काही अटी ठेवून मनोज जरांगे पाटलांनी उपोषण सोडलंय, पण मागण्या मान्य झाल्या नाहीत, तर जरांगे पाटील एक महिन्यानंतर पुन्हा सरकारविरोधात आवाज उठवणार असल्याचं स्पष्ट केलंय.