Crime : भयंकर…एकाच कुटुंबातील 7 जणांची सामूहिक आत्महत्या

सूरतच्या अडाजण परीसरात राहणाऱ्या सोलंकी कुटुंबियाने सामूहिक आत्महत्या केल्याची घटना घडली. सिद्धेश्वर अपार्टमेंटमध्ये ही धक्कादायक घटना घडली आहे. सिद्धेश्वर अपार्टमेंटच्या पहिल्या माळ्यावर कनुभाई सोलंकी आपल्या कुटुंबियांसोबत राहतात. कनुभाई यांचा मुलगा मनीष उर्फ शांतु सोलंकीने पंख्याला गळफास लावून आत्महत्या केली. तर कनुभाईची पत्नी शोभनाबेन, मनीषची पत्नी रीटा, मनीषची 10 आणि 13 वर्षाच्या दिशा आणि काव्या या दोन मुली आणि छोटा मुलगा कुशलचा मृतदेह बिछान्यात पडला होता.

दरम्यान या घटनेची माहिती मिळताच पोलिसांनी घटनास्थळी दाखल होऊन तपासाला सुरूवात केली आहे. तसेच पोलिसांनी सातही मृतदेह ताब्यात घेऊन पोस्टमार्टम रिपोर्टसाठी पाठवले आहेत. या पोस्टमार्टम रिपोर्टमधून आता कुटुंबियांच्या आत्महत्ये मागचं खरं कारण समोर येणार आहे.

हे ही वाचा : Sharad Pawar : PM मोदींच्या टीकेवर पवारांचा पलटवार, कृषीमंत्री असतानाची आकडेवारी देत प्रत्युत्तर

सामूहिक आत्महत्या करणारे हे कुटुंब फर्निचरचा व्यवसाय करायचं. त्यात प्राथमिक माहितीनूसार कुटुंबिय आर्थिक विवंचनेचा सामना करत असल्याची माहिती आहे. त्यामुळे फर्निचर व्यवसायातील तोट्यामुळे कुटुंबियांनी टोकाचं पाऊल उचलल्याचे बोलले जात आहे. मात्र पोलिसांच्या तपासानंतर या सामूहिक आत्महत्ये मागचं कारण समोर येणार आहे.

सूरतमध्ये एकाच कुटुंबातील 7 जणांनी आत्महत्या केली आहे.घटनास्थळी आम्हाला एक सुसाईड नोटही सापडली आहे. पोलिसांनी मृतदेह ताब्यात घेऊन पोस्टमार्टमसाठी पाठवला आहे. तसेच या घटनेचा तपास पोलीस करीत आहे,अशी माहिती पोलीस उपायुक्त राकेश बारोट यांनी दिली आहे.

पोलिसांना घटनास्थळावरून एक सुसाईड नोट सापडली आहे. या सुसाईड नोटमध्ये नेमका काय मजकूर लिहला आहे तो अद्याप समोर आला नाही आहे. मात्र या सुसाईड नोटने सात जणांच्या आत्महत्येची गुढ उकलणार आहे. या घटनेने सध्या गुजरात हादरलं आहे.