शरद पवारांवर आक्षेपार्ह पोस्ट, उच्च शिक्षित तरुणाला ठोकल्या बेड्या

कायदा हातात घ्यावा लागेल

राष्ट्रवादी काँग्रेसचे प्रमुख शरद पवार यांच्याविषयी सोशल मीडियावर विशाल गोर्डेने आक्षेपार्ह लेखन केले होते. त्यामुळे आता पुन्हा एकदा सोशल मीडिया वरील लेखन आणि राजकीय नेत्यांवरील टीकेवरून वाद रंगला आहे. उच्चशिक्षित असलेल्या विशाल गोर्डे याने शरद पवारांच्यावर आक्षेपार्ह लेखन केल्यानंतर शरद पवार गटाच्या प्रदेश सरचिटणीस भावना घाणेकर यांनी पोलिसात गोर्डे विरोधात तक्रार दाखल केली होती. त्यावेळी पोलिसांकडे त्यांनी आक्षेपार्ह लेखन करणाऱ्याला तात्काळ अटक करून त्याला शिक्षा द्यावी अशीही मागणी करण्यात आली होती.

हे ही वाचा >> Maharashtra Politics : खैरे-दानवेंनी वाढवला ठाकरेंचा ताण, मातोश्रीवरील बैठकीत काय झालं?

गोर्डेला पोलीस कोठडी

पोलिसांनी त्याला जर अटक केली नाही तर आम्हाला कायदा हातात घ्यावा लागेल असा इशाराही भावना घाणेकर यांनी दिला होता. त्यानंतर त्याच्यावर कारवाई करून त्याला वाशी न्यायदंडाधिकारी न्यायालयासमोर हजर करण्यात आले होते. त्यानंतर न्यायालयाने त्याला 14 दिवसांची पोलीस कोठडी सुनावली असून पुढील तपास पोलीस करत आहेत.

नोकरी गेल्यामुळं नैराश्य

या प्रकरणी माहिती देताना सीबीडी-बेलापूर पोलीस ठाण्याचे वरिष्ठ पोलीस निरीक्षक गिरीधर गोरे यांनी विशाल गोर्डेने जामिनासाठी अर्ज केला असल्याचेही त्यांनी सांगितले. विशाल गोर्डेला अटक केल्यानंतर त्याने पोलिसांना सांगितले की, कोरोनाच्या काळात माझी नोकरी गेली होती. त्यामुळे मी मानसिकदृष्ट्या खचलेला होतो. नोकरी गेल्यानंतर कंपन्यांना कर्मचारी पोहचवण्याचं काम मी करत होतो मात्र त्यातून पैसे मिळत नव्हते, त्याच नैराश्येतून हा प्रकार घडल्याचे त्याने पोलिसांना सांगितले.