Covid Centre scam : ठाकरेंच्या नेत्यांना अडचणीत आणणारं ‘हे’ प्रकरण काय?

मुंबईतील कथित कोविड सेंटर घोटाळा प्रकरणाची सुरूवात झाली ती माजी खासदार किरीट सोमय्या यांनी दिलेल्या तक्रारीने! ही तक्रार समजून घेतली हे संपूर्ण प्रकरण लक्षात येतं. किरीट सोमय्या यांनी 24 ऑगस्ट 2022 मध्ये मुंबईतील आझाद मैदान पोलीस ठाण्यात तक्रार दिली. त्यानंतर या प्रकरणात ठाकरेंच्या शिवसेनेतील नेते अडकत गेले.

लाईफलाईन हॉस्पिटल मॅनेजमेट सर्व्हिसेस विरुद्ध किरीट सोमय्या

किरीट सोमय्यांच्या आरोपानुसार लाईफलाईन हॉस्पिटल मॅनेजमेंट सर्व्हिसेस फर्मच्या भागीदारांनी वैद्यकीय सेवा पुरवण्याचा कोणताही अनुभव नसताना बनावट कागदपत्रे मुंबई महापालिका आणि पीएमआरडीएला दिली आणि जम्बो कोविड सेंटर चालवण्याचे कंत्राट मिळवले.

हेही वाचा >> Suraj Chavan : आदित्य ठाकरेंच्या निकटवर्तीय नेत्यांच्या घरासह 16 ठिकाणी ED चे छापे

पुण्यातील शिवाजीनगर येथील जम्बो कोविड सेंटरला वैद्यकीय सेवा व स्टाफ पुरवण्याचे काम लाईफलाईन हॉस्पिटल मॅनेजमेंट सर्व्हिसेसकडे होते. पण, तिथे मोठा भ्रष्टाचार करण्यात आला. याच केंद्रात पत्रकाराचा मृत्यू झाल्यानंतर पुणे महापालिका आणि सरकारने समिती नेमली. चौकशीत या कंपनीला वैद्यकीय सेवा पुरवण्याचा अनुभव नसल्याचे समोर आले. त्यामुळे कंपनीचे कंत्राट रद्द करतानाच समितीने या कंपनीला कंत्राट न देण्याचे बजावले होते. असं असतानाही मुंबई महापालिकेने जम्बो कोविड सेंटरचे कंत्राट या कंपनीला दिले.

सोमय्यांचे आरोप… लाईफलाईन हॉस्पिटल मॅनेजमेट कुणाची?

माजी खासदार सोमय्या यांच्या आरोपानुसार या कंपनीची स्थापना 26 जून 2022 रोजी झालेली आहे. या फर्मचे भागीदार डॉ. हेमंत रामशरण गुप्ता, सुजित मुकुंद पाटकर, संजय मदनलाल शाह, राजू साळुंखे आहेत. या संस्थेची नोंदणी मुंबईतील वांद्रे यथील कार्यालयात करण्यात आलेली आहे.

नेमका आरोप काय?

लाईफलाईन हॉस्पिटल मॅनेजमेंटने वरळीतील एनएससीआय जम्बो कोविड सेंटर आणि दहिसर जम्बो कोविड सेंटरचे कंत्राट मिळवले. सोमय्यांच्या आरोपानुसार कंपनीने कोविड सेंटरला पुरवलेल्या सेवेबद्दल मुंबई महापालिकेकडे 38 कोटींचे बिले दिली आणि पैसे मिळवले.

या कंपनीने बनावट कागदपत्रांच्या आधारेच मुंबईतील महालक्ष्मी रेसकोर्स जम्बो कोविड सेंटर आणि मुलुंड जम्बो कोविड सेंटरचेही कंत्राट मिळवले.

हेही वाचा >> सोमय्यांच्या आरोपांची BMCने काढली हवा? 100 कोटी घोटाळ्यावर मोठा खुलासा

सोमय्यांच्या म्हणण्यानुसार दुसरीकडे इटर्नल हेल्थ केअर मॅनेजमेंट सर्व्हिसेस एलएलपी या फर्मनेही जम्बो कोविड सेंटरचे कंत्राट मिळवण्यासाठी निविदा सादर केल्या. या कंपनीमध्ये सुजित मुकुंद पाटकर आणि राजू नंदकुमार सांळुखे हे भागीदार आहेत. यात संदिप हरिशंकर गुप्ता, योगेश्वर भूमेश्वर उल्लेंगल्ला, अपर्णा श्रीकांत पंडितही भागीदार असल्याचा दावा सोमय्यांनी केलेला आहे.

कोविड रुग्णांच्या मृत्यूला लाईफलाईन हॉस्पिटल मॅनेजमेट जबाबदार?

सोमय्यांनी पोलिसांत दिलेल्या तक्रारीत म्हटलेले आहे की, वैद्यकीय सेवा पुरवण्याचा अनुभव नसताना खोटी, बनावट कागदपत्रे सादर करून लाईफलाईन हॉस्पिटल मॅनेजमेंटने जम्बो कोविड सेंटरची कंत्राट मिळवली. त्याचबरोबर या फर्मवर बंदी घालण्यात आली होती. ती बाब लपवून कंत्राट मिळवलं. अटी शर्थींनुसार सेवा न पुरवल्यामुळे कोविड रुग्णांचा मृत्यू झाला आणि याला लाईफलाईन हॉस्पिटल मॅनेजमेंट जबाबदार आहे, असा सोमय्यांचा आरोप आहे.

हेही वाचा >> ‘शिवसेनेतून राणे गेले तेव्हाच बाहेर पडलो असतो..’, गुलाबराव पाटलांचं मोठं विधान

लाईफलाईन हॉस्पिटल मॅनेजमेंटने मुंबई महापालिकेकडून 38 कोटी रुपये मिळवले आणि महापालिका आणि शासनाची फसवणूक केली. किरीट सोमय्यांनी नंतर घेतलेल्या पत्रकार परिषदांमध्ये लाईफलाईन हॉस्पिटल मॅनेजमेंटने शंभर कोटींचा घोटाळा केल्याचा आरोपही केलेला आहे. त्यामुळे या प्रकरणाचा तपास मुंबई पोलीस आर्थिक गुन्हे शाखा आणि ईडी स्वतंत्रपणे करत आहे.