कोल्हापुरात ७ वर्षांच्या मुलाचा नरबळी दिल्याचा संशय? आरोपी अटकेत

दरम्यान या घटनेनंतर सोनाळी गावात स्थानिकांमध्ये मोठ्या प्रमाणात नाराजी आहे. सात वर्षांच्या मुलाला आपले प्राण गमवावे लागल्यानंतर ग्रामस्थांनी आक्रोश व्यक्त केला असून पोलिसांनी खबरदारीचा उपाय म्हणून गावात मोठ्या प्रमाणात पोलीस फौजफाटा तैनात करण्यात आला आहे.

काय आहे नेमकं प्रकरण?

कागल तालूक्यातील रविंद्र पाटील हे जनावरांचे डॉक्टर आहेत, तसंच ते शेती व्यवसायही करतात. काही दिवसांपूर्वी रविंद्र यांच्या पत्नी पूनम यांना दुसरं अपत्य झाल्यामुळे त्या आपल्या माहेरी गेल्या होत्या. पूनम यांच्या भावाने सावर्डे गावात नवीन घर बांधल्यामुळे त्याच्या वास्तूशांतीचा कार्यक्रम ठेवण्यात आला होता. यासाठी रविंद्र पाटील आणि वरद हे सावर्डे गावात गेले होते. वास्तुशांतीचा कार्यक्रम झाल्यानंतर जेवणाचा कार्यक्रम पार पडला आणि त्यानंतर सर्वजण आपल्या कामात व्यस्त होते.

या संधीचा फायदा घेत रविंद्र पाटील यांचा गावातला मित्र मारुती वैद्यना वरदला चॉकलेटचं अमिष दाखवत त्याचं अपहरण केलं. वरद दिसून येत नसल्यामुळे त्याच्या नातेवाईकांशी शोध सुरु केला. काहीवेळाने गावकरीही यात सहभागी झाले, परंतू त्यावेळी मारुती वैद्यचा फोन बंद येत होता. परंतू आपल्यावर संशय येऊ नये म्हणून मारुती देखील काही वेळातच या शोधमोहीमेत सहभागी झाला.

वरद हरवल्याची तक्रार पोलिसांत दाखल –

प्रत्येक ठिकाणी शोध घेऊनही वरद न सापडल्यामुळे त्याच्या नातेवाईकांनी पोलिसांत तक्रार दाखल केली. तपासादरम्यान संशयाची पहिली सुई ही मारुती वैद्यकडे वळली. बुधवारी पोलिसांनी मारुती वैद्यला चौकशीसाठी ताब्यात घेतलं, परंतू संध्याकाळी त्याला सोडूनही देण्यात आलं. आज पोलिसांनी पुन्हा एकदा मारुती वैद्यला ताब्यात घेऊन त्याची कसून चौकशी केली. यावेळी पोलिसी खाक्यासमोर मारुतीने आपला गुन्हा कबुल केला.

यानंतर मारुतीला घेऊन पोलीस पथक सावर्डे गावात गेलं. वरदची हत्या करुन त्याचा मृतदेह तळ्याच्या भागातील शेतात पुरुन ठेवण्यात आला होता. यावेळी पोलिसांना वरदचा छिन्नविछीन्न अवस्थेतला मृतदेह सापडला. हा प्रकार कळताच जमाव संतप्त झाला आणि पोलिसांच्या ताब्यात असलेल्या मारुती वैद्यला फाशी देण्याची मागणी करण्यात आली.

दरम्यान वरदच्या नातेवाईकांना हा प्रकार नरबळीचा वाटत असला तरीही राज्यमंत्री सतेज पाटील यांनी हा प्रकार नरबळीचा नसल्याचं म्हटलं आहे. पोलिसांनी या प्रकरणी दोघांना ताब्यात घेतलं असून तपास सुरु आहे. तपासाअंती सर्व सत्य समोर येईल असंही सतेज पाटील म्हणाले.