शरद पवारांसोबतच्या भेटीबद्दल अमित शाहांचं महत्वाचं विधान, म्हणाले…

काही दिवसांपूर्वी तुमची आणि शरद पवार यांची भेट झाली. २ मे नंतर मुंबईत काय होणार, महाराष्ट्र सरकारला काही धोका आहे का असा प्रश्न विचारला असता अमित शाह म्हणाले, “प्रश्न हा आहे की महाराष्ट्र सरकार कोरोनावर नियंत्रण मिळवू शकेल का? माझ्या मते या विषयावर सर्वांनी मिळून प्रयत्न करणं गरजेचं आहे. शरद पवार आणि माझ्या बैठकीबद्दल मीडियानेच बातम्या दिल्या त्यामुळे त्याची माहितीही तुमच्याकडेच असेल, माझ्याकडे त्याची काही माहिती नाही.” पुढे जाऊन राष्ट्रवादी काँग्रेस आणि भाजप महाराष्ट्रात सरकार बनवेल का असं विचारलं असता अमित शाह यांनी सध्या यावर काहीही बोलता येणार नाही असं सांगितलं.

महाराष्ट्रात गेल्या काही दिवसांपासून कोरोनाच्या रुग्णसंख्येत चिंताजनक वाढ होते आहे. अचानक महाराष्ट्रात ही वाढ का होते आहे हे महाराष्ट्र सरकार चांगल्या पद्धतीने सांगू शकतं. पण माझ्या मते केंद्र आणि राज्य सरकारने लवकरच या परिस्थितीवर नियंत्रण मिळवण्याची गरज आहे. आम्ही राज्य सरकारला सर्व मदत करण्यासाठी तयार आहोत असंही शाह यांनी स्पष्ट केलं.

महाविकास आघाडी सरकारमध्ये नवा वाद, निधी वाटपावरुन काँग्रेस नाराज

पश्चिम बंगाल, केरळ आणि अन्य राज्यांत निवडणुकीच्या प्रचारात व्यस्त असलेल्या अमित शाह यांनी विरोधी पक्षांवर जोरदार टीका केली आहे. केरळमध्ये धर्माच्या आधारावर भेदभाव न करता चांगलं सरकार येण्याची गरज आहे. हे सरकार ना डावे पक्ष देऊ शकत ना काँग्रेस देऊ शकत. भारतीय जनता पक्ष अशा पद्धतीने चांगलं सरकार देऊ शकतं असं शाह यांनी स्पष्ट केलं.