MCA election : संदीप पाटील विरुद्ध अमोल काळे : चर्चेच्या केंद्रस्थानी आलेली ‘एमसीए’ची निवडणूक आज

संदीप पाटील यांच्यासमोर पवार-शेलार पॅनलचं आव्हान असल्याने अध्यक्षपदासाठीच्या निवडणुकीत चुरस पाहायला मिळणार आहे.

एमसीएच्या अध्यक्षपदाबरोबरच कार्यकारी मंडळाच्या जागांसाठीही थेट लढत होत आहे. त्यामुळे निवडणुकीतील रंगात आणखी वाढण्याची शक्यता आहे.राज्यातल्या सत्तांतरानंतर राजकीय आरोप-प्रत्यारोपाच्या फैरी झाडताना दिसत आहेत. भाजप, बाळासाहेबांची शिवसेना युती विरुद्ध शिवसेना उद्धव बाळासाहेब ठाकरे गट, राष्ट्रवादी काँग्रेस आणि काँग्रेस महाविकास आघाडी असं राजकीय चित्र बघायला मिळत आहे. त्यात एमसीए निवडणुकीत मात्र सर्वच पक्ष आणि नेते एकवटले आहेत. राष्ट्रवादी काँग्रेस, भाजप, शिंदे गट, ठाकरे गट अशा विविध राजकीय पक्षांचे नेते एकत्र येऊन पवार-शेलार गटातून एमसीएची निवडणूक लढवत आहेत. त्यामुळेच ‘एमसीए’ निवडणुकीबाबत सर्वत्र चर्चा होत आहे. एमसीएच्या सहसचिवपदासाठी दीपक पाटील यांच्याविरुद्ध कुणीही उमेदवारी अर्ज केलेला नसल्याने त्यांची निवड बिनविरोध होणार आहे, तर सचिवपदासाठी अजिंक्य नाईक विरुद्ध ‘एमसीए’चे माजी अध्यक्ष रवी सावंत यांचे पुत्र नील सावंत विरुद्ध मयांक खांडवाला अशी तिरंगी लढत होत आहे.

एमसीए निवडणुकीच्या रिंगणात कोण कोण?
‘एमसीए’च्या कोषाध्यक्षपदासाठी जगदीश आचरेकर, संजीव खानोलकर आणि अरमान मल्लिक यांनी उमेदवारी दाखल केलेली आहे. कार्यकारी परिषदेच्या जागांसाठी राष्ट्रवादी काँग्रेसचे आमदार जितेंद्र आव्हाड आणि माजी मुख्यमंत्री उद्धव ठाकरे यांचे निकटवर्तीय मिलिंद नार्वेकरही रिंगणात आहेत.

एमसीए निवडणूक : शरद पवार, देवेंद्र फडणवीस, एकनाथ शिंदे एकाच व्यासपीठावर
‘एमसीए’ निवडणुकीच्या पार्श्वभूमीवर बुधवारी (19 ऑक्टोबर) निवडणूक पूर्वसंध्येला स्नेहभोज कार्यक्रम आयोजित करण्यात आला होता. यावेळी मुख्यमंत्री एकनाथ शिंदे, उपमुख्यमंत्री देवेंद्र फडणवीस, राष्ट्रवादी काँग्रेसचे अध्यक्ष शरद पवार, मुंबई भाजपचे अध्यक्ष आणि बीसीसीआयचे नवनिर्वाचित कोषाध्यक्ष आशिष शेलार उपस्थित होते. एमसीएच्या निवडणुकीनिमित्त बहुसंख्य राजकीय नेते एकत्र आल्याने ही निवडणूक प्रसिद्धीच्या झोतात आहे.