संजय राऊतांनी आग लावण्याचे धंदे बंद करावेत; नारायण राणेंचा राऊतांवर प्रहार

डिपॉझिट फर्स्ट या कार्यक्रमातंर्गत बुडीत बँकांच्या ठेवीदारांना धनादेशाचे वाटप केंद्रीय मंत्री नारायण राणे यांच्या उपस्थितीत कोल्हापुरात करण्यात आले. या कार्यक्रमानंतर राणे यांनी माध्यमांशी संवाद साधला. यावेळी त्यांना काही मुद्द्यांबद्दल भूमिका विचारण्यात आली.

‘हे सरकार अस्तित्वात आहे का इथून सुरूवात आहे. सरकार अस्तित्वात नाही. सरकार चालतंय हे कुठेही दिसत नाही. शेतकऱ्यांचे प्रश्न, मंजुरांचे प्रश्न, विद्यार्थ्यांचे प्रश्न, विकासात्मक प्रश्न, कुठेही चालू नाहीयेत. याला एवढे पैसे दिले, हे फक्त कागदावर आहे. प्रत्यक्षात विकास ठप्प झाला आहे. सरकारचा प्रमुख व्यक्ती कार्यरत नसेल, तर यंत्रणेवर कुणाचा अंकुश असणार? सध्याची राज्याची परिस्थिती कठीण आहे. हे राज्य मागच्या दोन वर्षात किमान दहा वर्षे मागे गेलं आहे”, अशी टीका केंद्रीय मंत्री नारायण राणे यांनी महाविकास आघाडी सरकारवर केली.

पेपरफुटीसंदर्भातील घटनांवर नारायण राणे म्हणाले, “आता अंकुश नाही, तर हेच होणार ना… भ्रष्टाचार किती वाढलाय? पैसे देऊनच पेपर फुटतात ना… हा मोठा भ्रष्टाचार आहे,” असं नारायण राणे यांनी म्हटलं आहे.

‘भाजपत गोपीनाथ मुंडे यांच्यासारखा एकही नेता नाही, ते असते तर युती तुटली नसती,’ असं शिवसेनेचे नेते संजय राऊत म्हणाले होते. त्यावर नारायण राणे म्हणाले, “कै. गोपीनाथ मुंडे यांचा आज जन्मदिवस आहे. मी त्यांना श्रद्धांजली वाहतो. आता कोण नेते आहेत. कुणापेक्षा कोण कमी आहे, हे मूल्यमापन मी भाजपचा असल्याने करणार नाही. गोपीनाथ मुंडेंनी राज्यात भाजप वाढवण्यासाठी फार कष्ट घेतले. संजय राऊतांनी आग लावण्याचे धंदे कमी करावेत. तुमच्या पक्षाला गळती लागलीये, पक्ष संपत चालला आहे. ते सावरावं,” असा सल्ला राणे यांनी संजय राऊतांना दिला.

संजय राऊत यांचं गोपीनाथ मुंडेंची आठवण काढत सेना,भाजप युतीवर भाष्य

संजय राऊत काय म्हणाले होते?

“गोपीनाथ मुंडे असते, तर आज राज्याचं राजकारण वेगळं असतं. महाराष्ट्रात शिवसेना-भाजपा युती राहावी, यासाठी ते शेवटपर्यंत प्रयत्न करत होते. आज राज्याचं राजकारण समजणारा, ज्याच्याशी संवाद साधता येईल आणि शिवसेना काय आहे हे माहिती असणारा गोपीनाथ मुंडे यांच्या तोडीचा नेता भाजपत दिसत नाही. आम्ही त्यांच्यासोबत 25-30 वर्ष फार जवळून काम केलं. तेसुद्धा एक लोकप्रिय नेते होते. आज बहुजन समाजाची चळवळ दिसत आहे त्याचे ते प्रणेते आहेत,” असं संजय राऊत म्हणाले होते.