स्वतःचं मन शुद्ध करा, बाळासाहेबांचं स्मारक शुद्ध करणाऱ्या शिवसेनेला Narayan Rane यांनी सुनावलं

नेमकं काय म्हणाले नारायण राणे?

मी बाळासाहेब ठाकरे यांच्या स्मृतीस्थळाचं दर्शन घेतल्यानंतर मी २० ठिकाणी गेलो. मी तिथे अनेक गोष्टी बोललो. मुंबईत 32 वर्षे एकाच पक्षाची सत्ता आहे त्यांनी मुंबई कशी बकाल केली हे सांगितलं. लोकांना अनेक गोष्टी सांगितल्या. मात्र मी दादर शिवाजी पार्कहून निघाल्यानंतर मला पत्रकारांनी एकच प्रश्न विचारला आहे शुद्धीकरणाबद्दल तुमचं म्हणणं काय? मला कुणाला नमस्कार करावासा वाटतो हा प्रश्न आहे.

गोमूत्र ज्यांना शिंपडायचं आहे त्यांना शिंपडू द्या. ज्यांना प्यायचं त्यांना पिऊ द्या. त्यांना प्रश्न विचारा मला काय विचारता मला काही फरक पडत नाही. बाळासाहेब ठाकरेंचं स्मारक दलदलीत आहे. राज्याचे मुख्यमंत्री याकडे लक्ष देत नाहीत का? सुशोभीकरणाचा पत्ता नाही. बाळासाहेबांचा फोटोही सरळ दिसत नाही. जे गोमूत्र शिंपडायला आले त्यांनी जरा ती अवस्था बघा. आधी स्वतःचं मन शुद्ध करा मग कारभार करा असं म्हणत नारायण राणेंनी शिवसेनेला सुनावलं आहे.

सात हजार गुन्हे दाखल केले तरी फरक पडत नाही

आम्ही जन आशीर्वाद यात्रा काढली आहे. आम्ही जनतेचा आशीर्वाद घेण्यासाठी फिरत आहोत आणि आमच्यावर सात गुन्हे दाखल केले आहेत आम्हाला काही फरक पडत नाही. सात गुन्हे दाखल करा, सत्तर करा सात हजार गुन्हे दाखल करा काही फरक पडत नाही.

गेल्या सात वर्षांमध्ये नरेंद्र मोदी यांनी जी देशाच्या जनतेसाठी कामं केली आहेत ते सांगण्याचा प्रयत्न आम्ही जन आशीर्वाद यात्रेतून सांगतो आहे. आपला देश महासत्ता व्हावा या दृष्टीने पंतप्रधान नरेंद्र मोदी प्रयत्न करत आहेत असं वक्तव्य नारायण राणे यांनी मुंबई मधल्या पत्रकार परिषदेत केलं. 1 लाख 70 हजार कोटी रूपये तर मोदींनी गरीबांच्या अन्न योजनेसाठी खर्च केले. विविध जनहिताचे निर्णय पंतप्रधान नरेंद्र मोदी यांनी घेतले आहेत. तरूणांना रोजगार मिळावेत, उद्योग धंदे, व्यवसाय वाढावेत या दृष्टीने मी प्रयत्न करणार आहे असंही नारायण राणे यांनी म्हटलं आहे.