समीर वानखेडे दिल्लीतील NCB मुख्यालयात का गेले?

आज तक/इंडिया टुडेला मिळालेल्या माहितीनुसार, समीर वानखेडे जे क्रूझ ड्रग्स प्रकरणाचा तपास करत आहेत. ज्यात शाहरुख खानचा मुलगा आर्यन खान यालाही अटक करण्यात आली आहे. दरम्यान, याचवेळी समीर वानखेडे आज दिल्लीतील नार्कोटिक्स कंट्रोल ब्युरोच्या मुख्यालयात एसएन प्रधान यांची भेट घेणार आहेत.

सूत्रांच्या मते, समीर वानखेडे हे नियमित आढावा बैठकीसाठी एनसीबी प्रमुख यांची भेट घेणार आहेत. याच बैठकीसाठी समीर वानखेडे हे दिल्लीला आले असल्याचं सांगण्यात येत आहे. मात्र, असं असलं तरीही आर्यन खानचा समावेश असलेल्या क्रूझ ड्रग्स प्रकरणावर चर्चा होण्याची शक्यता देखील नाकारता येणार नाही.

काल मुंबईहून दिल्लीला पोहोचल्यानंतर समीर वानखेडे म्हणाले की, ‘मला NCB कडून बोलावण्यात आलेलं नाही. मी इथे येण्याचं कारण हे पूर्णपणे वेगळं आहे. माझ्यावर जे आरोर करण्यात आलेले आहेत ते निराधार आहेत.’

दुसरीकडे क्रूज ड्रग्स प्रकरणातील प्रमुख साक्षीदार असलेला प्रभाकर साईल याने केलेल्या आरोपानंतर समीर वानखेडेंची NCB कडून खात्यातंर्गत चौकशी केली जात आहे.

प्रभाकर साईल यांनी मुंबई तकशी बोलताना असे आरोप केले होते की, ‘आर्यन खान याला पकडून आणल्यानंतर एनसीबी अधिकारी आणि समीर वानखेडे यांनी मला पंच म्हणून कोऱ्या कागद्यावर सही करायला लावली होती. तसेच केपी गोसावी याने आर्यन खानच्या सुटकेसाठी मध्यस्थांकडे 25 कोटींची मागणी केली होती. ज्यामधील 8 कोटी हे समीर वानखेडे यांना द्यायचे होते.’

प्रभाकर साईल यांनी केलेले हे आरोप अत्यंत गंभीर आहेत. त्यामुळेच आता एनसीबीने याबाबत चौकशी देखील सुरु केली आहे. त्यामुळे आता एनसीबीचे वरिष्ठ अधिकारी समीर वानखेडे यांच्याशी नेमकी काय चर्चा करणार किंवा याप्रकरणी समीर वानखेडे यांच्यावर काय कारवाई केली जाणार हे पाहणं महत्त्वाचं ठरणार आहे.

‘स्पेशल 26’ : नवाब मलिक आज करणार आणखी एक गौप्यस्फोट; NCB च्या अधिकाऱ्याकडून आला लिफाफा

आर्यन खानच्या जामीन अर्जावर हायकोर्टात सुनावणी

2 ऑक्टोबर रोजी मुंबईच्या विशेष एनडीपीएस कोर्टाने आर्यन खानचा जामीन अर्ज फेटाळल्यामुळे त्याच्या वकिलांनी याप्रकरणी तात्काळ हायकोर्टात धाव घेतलेली. या जामीन अर्जावर तात्काळ सुनावणी घेण्यात यावी अशी मागणी आर्यन खानचे वकील सतीश मानेशिंदे यांनी केली होती. मात्र, हायकोर्टाने याप्रकरणाची सुनावणी 26 ऑक्टोबरला घेण्यात येईल असे स्पष्ट केले होते. त्यामुळे आर्यनचा तुरुंगातील मुक्काम देखील वाढला होता.

दरम्यान, आज होणाऱ्या सुनावणीत आर्यन खानच्या वकील नेमका काय युक्तीवाद करतात आणि NCB आर्यनच्या जामीन अर्जाला विरोध करताना हायकोर्टासमोर कोणते मुद्दे मांडणार हे पाहणं महत्त्वाचं ठरणार आहे. आजच्या या सुनावणीवरच आर्यनचं पुढचं भवितव्य ठरणार आहे.