शरद पवारांना आज डिस्चार्ज, १५ दिवसांनी पुन्हा शस्त्रक्रिया होणार

शरद पवार यांना डॉक्टरांनी तपासलं असून त्यांची तब्येत आता स्थिर आहे. आज त्यांना हॉस्पिटलमधून डिस्चार्ज मिळतो आहे. यानंतर त्यांना पुढचे ७ दिवस पूर्णपणे विश्रांती घेण्याचा सल्ला देण्यात आला आहे. १५ दिवसांनंतर शरद पवार यांची तब्येत व्यवस्थित असेल तर त्यांच्यावर गॉलब्लॅडरची दुसरी शस्त्रक्रीया करण्यात येईल, अशी माहिती नवाब मलिकांनी दिली आहे. यावेळी नवाब मलिक यांनी राष्ट्रवादी काँग्रेसच्या कार्यकर्त्यांना शरद पवारांना पाहण्यासाठी गर्दी करु नका असा सल्ला दिला आहे.

दरम्यान ३१ तारखेला शरद पवार यांच्यावर शस्त्रक्रिया पार पडत असताना त्यांच्या कन्या आणि खासदार सुप्रिया सुळे हजर होत्या. त्यावेळी अजित पवार, आरोग्यमंत्री राजेश टोपे आणि आमदार रोहित पवार हे देखील उपस्थित होते. शस्त्रक्रिया झाल्यानंतर शरद पवार हॉस्पिटलमध्ये बसून पेपर वाचत असल्याचा फोटोही सुप्रिया सुळेंनी शेअर केला होता. शरद पवारांची तब्येत खालावल्यामुळे त्यांचे पुढील सर्व कार्यक्रम रद्द करण्यात आले आहेत.