कोण आहेत टीना डाबींचे होणारे पती प्रदीप गावंडे?, कशी सुरू झाली दोघांची लव्हस्टोरी?

डॉ. प्रदीप गावंडे यांनी ‘मुंबई Tak’शी संवाद साधला. ४१ वर्षीय प्रदीप गावंडे पहिल्यांदाच बोहल्यावर चढणार आहेत. काही माध्यमांच्या वृत्तांत हे त्यांचं दुसरं लग्न असल्याचं म्हटलं, मात्र त्यांनी हे वृत्त फेटाळून लावलं आहे. प्रदीप गावंडे हे मूळचे लातूरचे आहेत. लातूर शहरातच त्यांचा जन्म झाला आणि मराठवाड्यातच त्यांची त्यांचं शिक्षण पूर्ण केलं.

प्रदीप गावंडे यांनी लातूरमधील राजश्री शाहू महाविद्यालयातून १२वीचं (विज्ञान शाखा) शिक्षण पूर्ण केलं. त्यानंतर एमबीबीएसचं शिक्षण घेण्यासाठी ते औरंगाबादला आले. औरंगाबादमधील शासकीय वैद्यकीय महाविद्यालय आणि रुग्णालयातून (घाटी) त्यांनी एमबीबीएसचं शिक्षण पूर्ण केलं. त्यानंतर २०१३ मध्ये केंद्रीय लोकसेवा आयोगाची परीक्षा दिली. आता ते राजस्थान केडरचे अधिकारी म्हणून सनदी सेवेत आहेत.

शिक्षण घेत असताना सीनियरकडून प्रेरणा मिळाली आणि त्यामुळे आपण यूपीएससी परीक्षा देण्याचा निर्णय घेतला, असं प्रदीप गावंडे सांगतात.

प्रदीप गावंडे यांना दोन भावंडं आहेत. त्यांचे मोठे बंधूही डॉक्टर आहेत. डॉ. हेमंत गावंडे हे एमबीबीएस डॉक्टर असून, सध्या ते औरंगाबाद जिल्ह्यातील हतनूर प्राथमिक आरोग्य केंद्रात कार्यरत आहेत. त्यांची लहान बहीणही एमबीबीएस डॉक्टर आहे. लहान बहिणचं लग्न झालं असून, बहिणीचे पतीही पेशाने डॉक्टर आहेत. गावंडे यांची छोटी बहिण मुंबईतील खासगी रुग्णालयात कार्यरत आहे.

त्यांच्या आई सत्यभामा केशवराव गावंडे या सेवानिवृत्त शिक्षिका आहेत. तर त्यांच्या वडील युनियन बँकेत अधिकारी पदावर कार्यरत होते. २०१३ मध्ये गावंडे यांच्या वडिलांचं निधन झालं.

तुम्ही दोघेही आयपीएस अधिकारी आहात. तुमची मैत्री कशी झाली आणि उर्वरित आयुष्य सोबत राहण्याचा निर्णय घेण्याची प्रेरणा नेमकी काय होती?, असं प्रदीप गावंडे यांना विचारलं. त्यावर ते म्हणाले, “२०२१ मध्ये कोरोनाची दुसरी लाट आलेली असताना राज्यातील कोरोना रुग्णांवर उपचार करणाऱ्या रुग्णालयांना रेमडेसिवीर आणि ऑक्सिजन सिलिंडरच्या वितरणाची जबाबदारी आम्हा दोघांवर सोपवण्यात देण्यात आली होती.

आम्ही दोघांनीही चांगल्या पद्धतीने कठीण परिस्थिती हाताळली. याच कठीण काळात आमची एकमेकाशी ओळख झाली. टीना डाबी या डाऊन टू अर्थ स्वभावाच्या आहेत. त्यांचा विनम्र स्वभाव आणि दयाळूपणा माझ्या मनाला भावला. त्या शांत वृत्तीच्या असून, कोणत्याही समस्येतून वाट काढण्याचं त्यांचं स्वभाव वैशिष्ट्ये आहे, असं गावंडे यांनी सांगितलं.

डॉ. प्रदीप गावंडे हे राजस्थानात कार्यरत असले, तरी त्यांचे बहुतांश नातेवाईक आणि मित्र पुणे शहर आणि आजूबाजूच्या परिसरातच राहतात. त्यामुळे ते लग्न राजस्थानात तर रिसेप्शन पुण्यात करणार आहेत. २२ एप्रिल रोजी दोघेही विवाहबद्ध होणार असून, २४ एप्रिल रोजी रिसेप्शन असणार आहे.