“जातीयवादी कोण?”, मीरा रोड हत्याकांडावरून अंधारे, आव्हाड का संतापले?

मीरा रोडमधील लिव्ह इन पार्टनर हत्याकांडावर आता शिवसेना उपनेत्या सुषमा अंधारे यांनी संतप्त प्रतिक्रिया देत सत्ताधाऱ्यांना धारेवर धरले आहे. लव जिहादच्या बोंबा ठोकून सामाजिक वातावरण दुषित करणारे नितेश राणे,नवनीत राणा किंवा मोहित कंबोज यांना सरस्वती वैद्य हत्याकांडाबद्दल काही बोलायचे आहे का? असा सवाल सुषमा अंधारे यांनी उपस्थित केला. अशा घटना वारंवार का घड़तायत? गृहमंत्री देवेंद्र फडणवीस पुन्हा अपयशी ठरत आहेत, यावर जाहीरपणे बोलणार का ? असा सतप्त सवाल देखील अंधारे यांनी विचारला आहे.

हे ही वाचा :  हत्याकांड घडलेला ‘तो’ फ्लॅट आमदार गीता जैन यांच्या पतीचा

सुषमा अंधारे यांच्यासह जितेंद्र आव्हाड यांनी देखील सरकारवर टीका केली आहे. एक काळ असा होता, जेव्हा गुन्हेगारांचे नाव आणि ओळख गुप्त ठेवली जायची. पण 2014 नंतर प्रसार माध्यमांनी लोकशाहीच्या चौथ्या स्तंभापासून सरकारच्या प्रचार यंत्रणेत आपली भूमिका बदलली आणि प्रसारमाध्यमांनी जातीयवादी कोन इत्यादी आणण्यासाठी गुन्हेगारांची नावे दाखवण्यावर लक्ष केंद्रित केल्याची टीका जितेंद्र आव्हाड यांनी सरकार आणि माध्यमांवर केली.

जितेंद्र आव्हाड यांनी एएनआयचे एक ट्विट रिट्वीट करत ‘दक्षिण आशियातील सर्वात मोठी वृत्तसंस्था’ गुन्हेगाराची आडनावे दुरुस्त करण्यात कशी व्यस्त आहे, अशी टीका आव्हाड यांनी केली. तसेच सरकारच्या उत्तरदायित्वावर खरा प्रश्न विचारत नाही,अशी खंत देखील आव्हाड यांनी व्यक्त केली. गेल्या 9 वर्षात लोकशाही म्हणून आपली किती अधोगती झाली, याचे हे उदाहरण असल्याचे देखील त्यांनी सांगितले आहे.