PBKS vs GT: श्रेयस अय्यरला शतकापासून रोखलं पण पठ्ठ्याने पंजाबला जिंकवलं, कोण आहे शशांक सिंग?

नेमका कोण आहे शशांक सिंग?

शशांक सिंग हा छत्तीसगडचा 33 वर्षीय क्रिकेटपटू आहे, जो आयपीएलमध्ये आपल्या दमदार खेळामुळे ओळखला जातो. एक अष्टपैलू खेळाडू म्हणून त्याची गणना होते, कारण तो आक्रमक फलंदाजीबरोबरच मध्यमगती गोलंदाजीही करतो. शशांकने आपल्या क्रिकेट कारकिर्दीची सुरुवात स्थानिक क्रिकेटमधून केली आणि त्याच्या सातत्यपूर्ण कामगिरीमुळे आयपीएलमध्ये प्रवेश मिळवला.

हे ही वाचा>> LSG vs DC: हरलेला सामना जिंकून दिला, कोण आहे आशुतोष शर्मा ज्याने लखनऊच्या विजयाचा घास घेतला हिरावून

आयपीएल 2024 मध्ये पंजाब किंग्जकडून खेळताना त्याने 14 सामन्यांत 44.25 च्या सरासरीने 354 धावा केल्या होत्या. या कामगिरीमुळे पंजाबने त्याला 2025 साठी 5.5 कोटी रुपयांत रिटेन केले, ज्यामुळे त्याच्यावरील विश्वास दिसून येतो.

शशांकचा जन्म 21 नोव्हेंबर 1991 रोजी भिलाई, छत्तीसगड येथे झाला. त्याने प्रथम श्रेणी क्रिकेटमध्ये छत्तीसगड आणि मध्य प्रदेशकडून खेळताना आपली छाप पाडली होती. आयपीएलमध्ये त्याने सनरायझर्स हैदराबाद, दिल्ली कॅपिटल्स आणि कोलकाता नाईट रायडर्ससारख्या संघांकडून खेळण्याचा अनुभव घेतला, पण पंजाब किंग्जमध्ये त्याला खरी ओळख मिळाली.

सामन्याचा थरार

25 मार्च 2025 रोजी झालेल्या या सामन्यात पंजाब किंग्सने प्रथम फलंदाजी करताना कर्णधार श्रेयस अय्यरच्या नेतृत्वाखाली मजबूत पाया रचला होता. श्रेयस हा शेवटच्या षटकाआधी 97 धावांवर खेळत होता. मात्र, शेवटच्या षटकात स्ट्राईकवर असलेल्या शशांक सिंगने संपूर्ण षटक खेळून काढलं. ज्यामुळे श्रेयसला शतकच करता आलं नाही. अवघ्या तीन धावांनी श्रेयसचं शतक हुकलं.

हे ही वाचा>> CSK vs MI: मुंबई इंडियन्सच्या 4 दिग्गज फलंदाजांना माघारी पाठवणारा नूर अहमद आहे तरी कोण?

मात्र, असं असलं तरी शशांक सिंगने केलेली कामगिरी ही पंजाबसाठी बहुमूल्य होती. कारण शशांक सिंगने शेवटच्या षटकात जे पाच चौकार मारले त्यामुळेच पंजाब 243 धावांपर्यंत मजल मारू शकला. हा हाय-स्कोअरिंग सामना शेवटच्या षटकापर्यंत रंगला. पण अखेर पंजाबने यामध्ये 11 धावांनी विजय मिळवला. 

प्रत्युत्तरात गुजरात टायटन्सने देखील जबरदस्त सुरुवात केली, पण त्यांना केवळ 232 धावांपर्यंतच मजल मारता आली. त्यामुळे या सामन्याचा खरा हिरो हा शशांक सिंग हाच ठरला 

शशांक सिंगच्या या खेळीने त्याला आयपीएलमधील नवोदित स्टार बनवले आहे. त्याच्या आक्रमक फलंदाजी शैलीबरोबरच दबावात शांत राहण्याची क्षमता त्याने दाखवून दिली आहे. क्रिकेट समीक्षकांनी शशांकच्या या खेळीचे कौतुक केले आहे. 

शशांक सिंगने या सामन्यात श्रेयस अय्यरला शतकापासून रोखले तरी स्वतःच्या फलंदाजीने सामना जवळजवळ जिंकून दिला.