Pune Accident: पुणे अपघात प्रकरणात मोठा ट्विस्ट, ससून रुग्णालयातला एक कर्मचारी गायब

पुण्यातील कल्याणीनगर भागात बिल्डरपुत्राने पोर्शे कारने दोन जणांना चिरडल्याची घटना घडली होती. या घटनेनंतर अल्पवयीन आरोपीला ताब्यात घेतले होते. मंद्यधुंद अवस्थेत अल्पवयीन मुलाकडून हे कृत्य घडल्याने पोलिसांनी त्याला रक्त चाचणीसाठी ससून रूग्णालयात पाठवले होते. मात्र ससून रूग्णालयात केलेल्या रक्त चाचणीत आरोपीने अल्कोहोल न घेतल्याचे दिसून आले होते. त्यामुळे या प्रकरणात रक्ताचे नमुने बदलल्याचे पोलिसांच्या लक्षात आले होते. त्यामुळे पोलिसांनी चौकशी करून डॉ. अजय तावरे आणि डॉ. श्रीहरी हळणोर या दोन डॉक्टरांसह शिपाई अतुळ घटकांबळे यांना पुणे पोलिसांच्या गुन्हे शाखेने अटक केली होती. 

हे ही वाचा : बिल्डरच्या तालावर नाचली व्यवस्था, पुण्यात यंत्रणेची लक्तरं..

पुणे पोलिसांच्या या कारवाईनंतर रक्त चाचणी विभागातील एक कर्मचारी गायब झाला होता. हा कर्मचारी सध्या नॉटरिचेबल असल्याची माहिती आहे. त्यामुळे पोलीस या कर्मचाऱ्याचा शोध घेत आहे. यासाठी पोलिसांनी ससून रूग्णालयाचे सीसीटीव्ही फुटेजही ताब्यात घेतले आहे. त्यानंतर रक्त चाचणी विभागाच्या परिसरात असणाऱ्या व्यक्तींची चौकशी केली जाण्याची शक्यता आहे. सीसीटीव्ही फुटेजमध्ये दिसणाऱ्या सर्व संबंधितांना आम्ही चौकशीसाठी बोलावणार आहोत. जो कर्मचारी चौकशीला येणार नाही, त्याला जबरदस्तीने आणले जाईल, अशी माहिती पुणे पोलिसांच्या गुन्हे शाखेने दिली आहे. 

दरम्यान आता ससून रूग्णालयातला हा कर्मचारी का गायब झाला आहे? त्याचा या प्रकरणात काय सहभाग आहे. याचा तपास आता पोलीस करतायत. 

नेमकं प्रकरण काय? 

ड्रंक अँड ड्राइव्हची ही घटना 19 मे रोजी घडली होती. पुण्यातील कल्याणीनगर भागात रिअल इस्टेट डेव्हलपर विशाल अग्रवाल याच्या 17 वर्षीय मुलाने दोन दुचाकीस्वार (तरूण आणि तरूणी) इंजिनीअर्सना त्याच्या स्पोर्ट्स कार पोर्शने चिरडले. यामध्ये दोघांचा मृत्यू झाला. ही घटना घडल्यानंतर 14 तासांच्या आतमध्ये, आरोपी अल्पवयीन व्यक्तीला काही अटींसह न्यायालयातून जामीन मिळाला, न्यायालयाने त्याला 15 दिवस वाहतूक पोलिसांसोबत काम करण्याचे आणि रस्ते अपघातांचे परिणाम आणि उपाय यावर 300 शब्दांचा निबंध लिहिण्याचे निर्देश दिले होते. 

हे ही वाचा : "महायुतीला 20 जागांचा फटका, मविआला...", यादवांनी वाढवलं भाजपचं टेन्शन

मात्र, आरोपी दारूच्या नशेत असून सुसाट वेगाने कार चालवत असल्याचे पोलीस तपासात निष्पन्न झाले आहे. अल्पवयीन सध्या सुधारगृहात आहे. नुकतेच या घटनेत सहभागी असलेल्या दोन पोलिसांवर निष्काळजीपणाचा आरोप झाला होता. 

घटनेनंतर हे दोन अधिकारी सर्वप्रथम घटनास्थळी पोहोचले. मात्र दोघांनीही या घटनेची माहिती वरिष्ठांना आणि नियंत्रण कक्षाला दिली नाही. येरवडा पोलीस ठाण्याच्या या दोन पोलीस अधिकाऱ्यांना पुणे आयुक्तांनी निलंबित केले. पोलीस निरीक्षक राहुल जगदाळे आणि एपीआय विश्वनाथ तोडकरी अशी त्यांची नावे आहेत.