Lok Sabha Election 2024: शरद पवारांच्या NCP उमेदवारांची घोषणा, पाहा संपूर्ण यादी

पाहा राष्ट्रवादी काँग्रेस - शरदचंद्र पवार पक्षाची पहिली यादी 

• वर्धा - अमर काळे
• दिंडोरी - भास्कर भगरे 
• बारामती - सुप्रिया सुळे 
• शिरूर - अमोल कोल्हे 
• अहमदनगर - निलेश लंके 

या पाच उमेदवारांच्या नावाची घोषणा पक्षाचे प्रदेशाध्यक्ष जयंत पाटील यांनी केली आहे. मुंबईत आयोजित पत्रकार परिषदेत त्यांनी याबाबत माहिती दिली. तसंच इतर मतदारसंघातील उमदेवारांच्या नावाची देखील लवकर घोषणा करण्यात येईल असं जयंत पाटील यांनी यावेळी सांगितलं.

'या' जागांवरील उमेदवारांबाबत अद्यापही सस्पेन्स कायम 

पवारांच्या राष्ट्रवादी काँग्रेसने पहिल्या यादीत केवळ पाचच उमेदवार जाहीर केले आहेत. पण त्यांच्याकडील बीड, रावेर, माढा, सातारा आणि भिवंडी येथील उमेदवार त्यांनी अद्यापही जाहीर केलेले नाहीत. या पाच पैकी चार मतदारसंघ हे शरद पवारांच्या पक्षासाठी सुटले आहेत. फक्त भिवंडीमध्ये काँग्रेससोबत त्यांची चर्चा सुरू आहे. त्यामुळे इतर चार मतदारसंघातील उमेदवार का जाहीर करण्यात आले नाहीत याविषयी आता सवाल उपस्थित केले जात आहे. 

बीड, रावेर, माढा, सातारा या जागांवर राष्ट्रवादी काँग्रेस (शरदचंद्र पवार) पक्षच लढणार हे आता जवळजवळ निश्चित झालं आहे. पण असं असलं तरीही या जागांवर नेमका कोणता उमेदवार द्यायचा यावर पक्षात सध्या खलबतं सुरू आहेत. त्यामुळेच येथील उमेदवार अद्याप जाहीर न करण्याचा निर्णय घेण्यात आल्याचं बोललं जात आहे.

हे ही वाचा>> 'ठाकरेंची साथ सोडणार का?' दानवेंनी झटक्यात संपवला विषय!

माढ्यातून भाजच्या रणजीतसिंह नाईक निंबाळकरांविरोधात महादेव जानकर यांना उतरविण्याची पवारांची खेळी होती. मात्र, ऐनवेळी महायुतीत जात जानकरांनी पवारांना धक्का दिला. त्यानंतर आता तिथे पुन्हा एकदा पवार नव्या आणि धनगर समाजातील उमेदवाराच्या शोधात आहेत. 

तर सातऱ्यात जायंट किलर ठरलेले श्रीनिवास पाटील हे यंदा निवडणुकीच्या रिंगणात नसल्याने तेथील उमेदवार अद्यापही निश्चित झालेला नाही. पण लवकरच त्याबाबत निर्णय घेतला जाणार असल्याचं पवारांनी काल (30 मार्च) साताऱ्यात घेतलेल्या पत्रकार परिषदेत सांगितलं. 

याशिवाय बीड आणि रावेरमध्ये देखील शरद पवार हे योग्य उमेदवाराच्या शोधात आहेत. त्यामुळे तेथीलही नावांची घोषणा करण्यात आलेली नाही. यापुढे जी यादी जाहीर केली जाईल त्यात पवारांकडून किती उमेदवारांची घोषणा केली जाते हे पाहणं महत्त्वाचं ठरणार आहे. 

भिवंडीच्या जागेचा नेमका वाद काय? 

भिवंडी लोकसभा मतदारसंघावरून सध्या काँग्रेस आणि राष्ट्रवादी काँग्रेसमध्ये बरीच रस्सीखेच सुरू आहे. खरं तर 2014 आणि 2019 या दोन्ही निवडणुकांमध्ये या मतदारसंघातून भाजपच्या कपिल पाटील यांनी बाजी मारली आहे. तर सलग दोनदा या जागी काँग्रेसला पराभव स्वीकारावा लागला आहे. अशावेळी ही जागा राष्ट्रवादी काँग्रेसला सोडण्यात यावी अशी शरद पवारांची आग्रही मागणी आहे.

हे ही वाचा>> Mahadev Jankar: बारामती, माढा नव्हे तर 'या' जागेवरून जानकर लोकसभा लढवणार

या मतदारसंघात पवारांच्या राष्ट्रवादी काँग्रेसकडून सुरेश म्हात्रे उर्फ (बाळ्या मामा) हे लढण्यास इच्छुक आहेत. कपिल पाटील यांचे कट्टर विरोधक म्हणून ते ओळखले जातात. 2019 लोकसभा निवडणुकीवेळी ते शिवसेनेत होते. त्यावेळी त्यांनी अपक्ष उभं राहण्याची तयारीही केली होती. मात्र, एकनाथ शिंदेंच्या मध्यस्थीनंतर त्यांनी माघार घेतली होती. 

दरम्यान, आता.. 2024 निवडणुकीच्या काही दिवस आधीच त्यांनी शरद पवारांच्या राष्ट्रवादीत प्रवेश केला असून भिवंडीतून तिकीटाची मागणी केली आहे. त्यामुळेच या जागेवरील वाद कायम आहे.