शरद पवारांच्या निर्णयानंतर अजित पवार कार्यकर्त्यांवर भडकले, सगळेच चक्रावले

अजित पवार म्हणाले, “आदरणीय साहेब… सगळ्यांच्या भावना साहेबांनी ऐकलेल्या आहेत. पाहिलेल्या आहेत. आताही पाहताहेत. सगळ्या वडिलधाऱ्यांचं, जिवाभावाची साथ देणाऱ्या सगळ्यांचं ऐकलं आहे. तुम्ही एक गैरसमज करून घेताहेत की, पवार साहेब अध्यक्ष नाही म्हणजे पक्षामध्ये नाही, अशातला भागच नाही. आज काँग्रेसमध्ये अध्यक्ष आहेत खरगे, पण काँग्रेस चालली आहे सोनियाजींकडे बघून. त्यामुळे पवारसाहेबांच्या वयाचा विचार करता, साहेबांशी आणि सगळ्यांशी चर्चा करून एका नेतृत्वाकडे आपण ही जबाबदारी देऊ पाहतोय. ते नेतृत्व साहेबांच्या मार्गदर्शनाखाली पार्टीचं काम करेल.

“शेवटी साहेब म्हणजेच पार्टी आहे, हे येड्यागबाळ्याने पण सांगण्याचं कारण नाही. त्यामुळे आपण जे सारखं सारखं सांगताहेत… आता शरद पवार साहेबांनी तो निर्णय घेतलेला आहे. पवार साहेब लोकशाहीमध्ये जनतेचं ऐकतात हेही मी बघितेलेले आहे. त्यामुळे साहेबच आपले. त्यामुळे चव्हाण प्रतिष्ठानला यायचं, सिल्व्हर ओकला यायचं किंवा आणखी कुठे कार्यक्रम असतील तर साहेब आपल्याला वेळोवेळी मार्गदर्शन करणार आहे.”

नवा अध्यक्ष शरद पवारांच्या मार्गदर्शनाखाली काम करेल -अजित पवार

“उद्याच्याला पार्टीचा अध्यक्ष जो होईल, तो साहेबांच्या मार्गदर्शनालाखाली काम करेल. त्यापेक्षा दुसरं कुठलंही काम करणार नाही. अल्पसंख्याक समाजाचं जे सांगणं आहे की, तुम्ही असं का मनात आणता की, साहेब अध्यक्ष राहिले तरच अल्पसंख्याकांच्या पाठिशी उभे राहतील. अध्यक्ष नसतील तर उभे राहणार नाही, हे साहेबांच्या रक्तात नाहीये. साहेब अध्यक्ष असो वा नसो सगळा आपला परिवार असाच पुढे चालत राहणार आहे.”

हेही वाचा >> शरद पवारांच्या निर्णयानंतर हाय होल्टेज ड्रामा! जयंत पाटील ढसाढसा रडले

“भावनिक होऊ नका. पवार साहेबांनी परवाच सांगितलं की भाकरी फिरवायची असते. तुम्ही म्हणताहेत की त्यांच्यापासून सुरूवात नको. परंतू त्यांनी निर्णय घेतलेला आहे. मी आताच काकींशी बोललो. त्या म्हणाल्या अजित अजिबात मागे घेणार नाही. आजतरी ते ठाम आहेत. ही साहेबांची भूमिका आहे. तुम्ही पण भावनिक होऊन लगेच आता आता पर्याय नाही, अमक नाही. अरे साहेब आहेतच ना. दुसरा कुणाला पर्याय आहे तुम्हाला मला? कळत नाही का?”

“किडमिड्या ज्योतिषाची गरज नाही”

“साहेबांचा मार्गदर्शनाखाली नवीन अध्यक्ष होईल. आपण त्याला साथ देऊ. आपण त्या अध्यक्षाच्या पाठिशी उभं राहू. अध्यक्ष नवनव्या गोष्टी शिकत जाईल. वेगवेगळ्या राज्यात जाणं, तिथं बैठका घेणं. राष्ट्रवादीची काही बैठक वगैरे असेल, तरीदेखील… आपण जसं आपल्या घरामध्ये वय झाल्यानंतर नवीन लोकांना संधी देतो, शिकवतो. आपल्या अधिपत्याखाली त्याला मार्गदर्शन करतो. तशा पद्धतीने सगळ्या गोष्टी होतील ना. तुम्ही कशा करिता काळजी करता.”

हेही वाचा >> शरद पवारांची घोषणा! राष्ट्रवादीच्या अध्यक्षपदाचा राजीनामा देणार

“शेवटी कुणीही अध्यक्ष झालं. प्रदेशाध्यक्ष झाले तरी साहेबांच्या जीवावरच राष्ट्रवादी काँग्रेस पक्ष चालणार आहे. हे सांगायला कुण्या किडमिड्या ज्योतिषाची गरज नाही. एक गोष्ट खरी आहे की, पवार साहेबांनी हा निर्णय घेत असताना… वेगवेगळे निर्णय नेहमी प्रमुखांना एकत्र बसवायचे आणि त्यामध्ये चर्चा करायचे. कुणाचं काय मत आहे.”

“आज आपण पुस्तक प्रकाशनाच्या निमित्ताने आलो. साहेबांनी भाषणात साधारण आढावा 1 मे 1960 पासून घेत संपवला आणि एकदम निर्णय सांगितला, हा एक शॉक आहे. लोकांना वाटलं भाकरी फिरवायची म्हणजे इतर कुठल्या तरी भाकरी फिरवायच्या अशा पद्धतीने कार्यकर्त्यांना अर्थ काढला. पण, आपण परिवारात आहोत आणि राहणार आहोत. पवारसाहेब परिवाराचे प्रमुख म्हणूनच काम करणार आहेत. प्रमुख म्हणूनच काम करणार आहेत, याबद्दल तीळमात्र शंका मनात बाळगू नका. परत परत तेच सांगू नका.”

नवा अध्यक्ष, नवी कार्यकारिणी आणि शरद पवार, अजित पवार काय म्हणाले?

“आम्ही भावनिक आहोत आणि आता असं झालंय. सगळ्यांनी साहेबांकडे बघूनच काम केलं आहे. पण, काळानुरूप काही निर्णय घ्यावे लागतात. आणि साहेबांच्या डोळ्यादेखत नवीन होणारा अध्यक्ष तयार झाला, तर तुम्हाला का नकोय रे? मला काही तुमचं कळत नाहीये. उद्याच्याला नवीन अध्यक्ष झाल्यानंतर साहेब जे काही बारकावे असतात, ते सांगतील. साहेबांनी हाक दिल्यानंतर आपण येणारच आहे. साहेब महाराष्ट्रात देशात फिरणारच आहेत. उद्या खासदारकी, आमदारकीची निवडणूक आली. नवीन होणारा अध्यक्ष, नवीन कार्यकारिणी साहेबांशी चर्चा करूनच निर्णय घेणार आहेत.”

“तुम्ही अजिबात भावनिक होऊ नका. आता राजीनामा दिल्याशिवाय गत्यंतर नाही, असंही काही नाही. हा प्रसंग कधी ना कधी येणार होता. कालच हे जाहीर करणार होते, पण 1 मे रोजी वज्रमूठ सभा होती. माध्यमांमध्ये तेच चाललं असतं म्हणून 2 तारीख ठरली. त्याप्रमाणे साहेबांनी त्यांच्या निर्णय जाहीर केलेला आहे. माझी आपल्याला विनंती आहे की, साहेबांच्या मनात आहे त्याच गोष्टी आपण करू. साहेबांच्या मनाबाहेरची यत्किंचतही गोष्ट होणार नाही.कुणी बोलावलं तर मार्गदर्शन करण्यासंदर्भातील गोष्टी होतील”, अशी भूमिका अजित पारांनी मांडली. त्यांची ही भूमिका ऐकून उपस्थितांबरोबरच राजकीय वर्तुळातील सर्वांच्याच भुवया उंचावल्या.