Badlapur News: आता वामन म्हात्रे म्हणतात, 'त्या लोकांना बदलापूरमध्ये दंगल घडवायची होती'

शिवसेनेचे शिंदे गटाचे पदाधिकारी वामन म्हात्रे यांनी बदलापुरातील आंदोलक स्थानिक नसून ते बाहेरचे होते, त्यांचा उद्देश हा बदलापुरात दंगल घडवून आणण्याचा होता आणि ते सर्व उद्धव ठाकरे गटाचे कार्यकर्ते होते असा खळबळजनक आरोप केला आहे.

पाहा वामन म्हात्रे नेमकं काय म्हणाले... 

'मी संगीता (संगिता चेंदवणकर, मनसे कार्यकर्ता) यांना सांगितले की, लोक आंदोलन करत आहेत, आपण प्रशासनाशी चर्चा करून आंदोलन थांबवलं पाहिजे, पण त्या म्हणाल्या की, 'मला मारायला बाहेरून लोक आले आहेत.' 

'उद्धव ठाकरेंच्या वाहनावर मनसेने दगडफेक केली तेव्हा संगिता या तिथे हजर होत्या. त्याच गोष्टीचा बदला घेण्यासाठी उद्धव ठाकरे गटाचे कार्यकर्ते बदलापुरात आले होते. पण संगिता यांनी सावधगिरी बाळगली आणि त्या तिथून वेळीच निघून गेल्या.'

हे ही वाचा>> Badlapur News: '2000 रुपये आमच्याकडून घ्या, तुमची लाडकी बहीण योजना नको...' शिंदे सरकारवर बदलापूरकर संतापले!

'त्यानंतर उद्धव ठाकरेंच्या शिवसैनिकांनी आंदोलनात भाग घेऊन बदलापूरमध्ये दंगल घडवण्याचा प्रयत्न केला. स्थानिक डीसीपी, एसीपी, पोलीस आणि लोकप्रतिनिधींनी मिळून माननीय मुख्यमंत्र्यांच्या वतीने पीडित मुलीला 3 महिन्यांत न्याय मिळवून देऊ, असे सांगून स्थानिक आंदोलक शांत केले. पण बाहेरून आलेल्या आंदोलकांना बदलापूरमध्ये दंगल घडवायची होती.'

'इथे त्यांचे जिल्हाध्यक्ष फिरत होते, तसेच काही नगरसेवकही उपस्थित होते. मी नाव घेणार नाही, पण तुमच्या सीसीटीव्ही फुटेजमध्ये ते आले असावे. मी चार मुलांना विचारलं की, तुम्ही कुठून आलात... तेव्हा त्यांनी सरळ-सरळ सांगितलं की, मी  कल्याणहून आलो आहे, मी चेंबूरहून आलो आहे.. असा 15 जणांचा ग्रुप होता. जे मुख्यमंत्र्यांविरोधात घोषणाबाजी करत होते.' 

'मी त्यांना सांगितले की, मुख्यमंत्री साहेबांनी याबाबत निर्णय घेतला आहे. पण ते इथे येणार नाहीत. मात्र तोपर्यंत काही लोक दगडफेक करण्याची तयारी करत होते. मात्र पोलिसांनी त्यांना तिथून हुसकावून लावलं.' असं म्हणत वामन म्हात्रे यांनी या प्रकरणी आता नवे आरोप केले आहेत.

 ''तू अशा बातम्या देत आहेस, जणू तुझ्यावरच बलात्कार झालाय'', वामन म्हात्रेंनी महिला पत्रकाराला वापरलेले अपशब्द?

दरम्यान, लैेगिक अत्याचार प्रकरणाचं वार्तांकन करण्यासाठी गेलेल्या महिला पत्रकाराला वामन म्हात्रे यांनी अपशब्द वापरल्याचा आरोप त्यांच्यावर करण्यात आला होता.

हे ही वाचा>> Badlapur News : ''तू अशा बातम्या देत आहेस, जणू तुझ्यावरच बलात्कार झालाय'', CM शिंदेंच्या नेत्याची मुजोरी

''तू अशा बातम्या देत आहेस, जणू तुझ्यावरच बलात्कार झालाय'', अशी अशोभनीय भाषा वापरल्याचा आरोप महिला पत्रकाराने वामन म्हात्रेंवर करण्यात आला होता.

एक महिला पत्रकार ही बदलापूर अत्याचार प्रकरणाच वार्तांकन करत असताना बदलापूरचे माजी नगराध्यक्ष आणि शिंदेच्या सेनेचे शहरप्रमुख वामन म्हात्रे यांनी ''तू अशा बातम्या देत आहेस, जणू तुझ्यावरच बलात्कार झालाय'' अशी अर्वाच्च भाषा वापरली होती. या प्रकरणी महिला पत्रकाराने पोलीस ठाण्यात धाव घेतली होती.