CM फडणवीस शिवसेनेच्या 'या' नेत्यांचा कापणार पत्ता?, कॅबिनेटमध्ये स्थानच नाही?
मुख्यमंत्री देवेंद्र फडणवीस हे आपल्या मंत्रिमंडळात शिवसेनेच्या काही दिग्गज नेत्यांचा समावेश करणार नसल्याची जोरदार चर्चा राजकीय वर्तुळात सुरू आहे. जाणून घ्या कोणत्या नेत्यांना मिळू शकतो डच्चू.
ADVERTISEMENT
मुंबई: महाराष्ट्राचे नवे मुख्यमंत्री म्हणून देवेंद्र फडणवीस यांनी काल (5 डिसेंबर) आझाद मैदानावर शपथ घेतली. त्यांच्यासोबत उपमुख्यमंत्री म्हणून अजित पवार आणि एकनाथ शिंदेंनीही शपथ घेतली. पण आता यानंतर सगळ्यांच्या नजरा या नव्या मंत्रिमंडळाकडे लागून राहिलं आहे. नव्या मंत्रिमंडळात नव्या तरूणांना संधी देण्यात येईल असं बोललं जात आहे. पण यासोबतच काही मंत्र्यांचे पत्ते कट होण्याची शक्यता आहे. त्यातही विशेषत: शिवसेनेच्या काही मंत्र्यांवर सध्या टांगती तलवार आहे. (will cm devendra fadnavis not give place to shiv sena leaders abdul sattar deepak kesarkar tanaji sawant and sanjay rathod in his cabinet)
देवेंद्र फडणवीस हे स्वच्छ प्रतिमेचे मुख्यमंत्री म्हणून ओळखले जातात. अशावेळी आपल्या मंत्रिमंडळात वादग्रस्त मंत्री असू नयेत याची त्यांच्याकडून काळजी घेण्यात येणार असल्याचं बोललं जात आहे.
शिवसेनेच्या 'या' मंत्र्यांचा फडणवीस कापणार पत्ता?
2022 साली एकनाथ शिंदे यांच्यासोबत शिवसेनेतील दिग्गज नेते आणि तत्कालीन मंत्री हे बाहेर पडले होते. ज्यानंतर शिंदेंनी सत्ता स्थापन केल्यावर त्या दिग्गज नेत्यांना मंत्रिपद देऊ केलं होतं. पण त्यावेळी एकनाथ शिंदे हे स्वत: मुख्यमंत्री होते. त्यामुळे त्यांना हव्या असणाऱ्या नेत्यांना मंत्रिमंडळात स्थान देता आलं होतं.
हे ही वाचा>> संसदेत राडा... 'या' खासदाराच्या बाकावर सापडलं नोटांचं बंडल, नेमकं प्रकरण काय?
मात्र, आता एकनाथ शिंदे हे उपमुख्यमंत्री आहेत. त्यामुळे मंत्रिमंडळात नेमका कोणचा समावेश करायचा याचा सगळे अधिकार आता त्यांच्याकडे नाही. याबाबत संपूर्ण अधिकार हे फडणवीसांकडे आहेत.
शिवसेनेतून कोणाला मंत्रिपद द्यायचं याचा निर्णय जरी एकनाथ शिंदे घेणार असले तरी त्यावर अंतिम शिक्कमोर्तब हे देवेंद्र फडणवीसांकडूनच होणार आहे. अशावेळी शिवसेनेतील काही नेत्यांना पुन्हा मंत्रिपद मिळणार नसल्याचं बोललं जात आहे.
शिवसेनेचे नेते अब्दुल सत्तार, दीपक केसरकर, तानाजी सावंत आणि संजय राठोड या 4 नेत्यांची नावं आघाडीवर आहेत की, ज्यांचा पत्ता फडणवीस कट करू शकतात.
हे ही वाचा>> Exclusive: 'DCM साठी शिंदे कसे झाले तयार, पडद्यामागे काय होतं सुरू...', CM फडणवीसांनी सगळंच सांगितलं!
अब्दुल सत्तार- शिवसेना नेते अब्दुल सत्तार हे महाविकास आघाडीमध्ये मंत्री असताना भाजप नेत्यांनी त्यांच्यावर बऱ्याचदा टीका केली होती. अशावेळी आता देवेंद्र फडणवीस हे आपल्या मंत्रिमंडळात सत्तारांना कितपत स्थान देतात हे पाहणं महत्त्वाचं ठरणार आहे.
दीपक केसरकर - शिवसेनेचे नेते आणि माजी शिक्षण मंत्री दीपक केसरकर यांची मागील टर्ममधील कामगिरी म्हणावी तितकी उजवी ठरली नव्हती. अशावेळी त्यांना पुन्हा मंत्रिमंडळात स्थान द्यावं की नाही यावर सध्या खल सुरू असल्याचं समजतं आहे.
तानाजी सावंत - शिवसेना नेते तानाजी सावंत हे त्यांच्या पहिल्या टर्मपासूनच वादग्रस्त मंत्री ठरले आहेत. आपल्या विधानांनी नवनवे वाद ओढावून घेणाऱ्या माजी आरोग्यमंत्र्यांना देवेंद्र फडणवीस आपल्या मंत्रिमंडळातून डावलू शकतात.
संजय राठोड - शिवसेनेचे मंत्री राहिलेले संजय राठोड हे नाव भाजप नेत्यांसाठी सर्वाधिक नापसंतीचं ठरू शकतं. कारण ठाकरेंच्या मंत्रिमंडळात असताना पूजा चव्हाण या तरुणीच्या आत्महत्या प्रकरणात संजय राठोड यांना मंत्रिपदाचा राजीनामा द्यावा लागला होता. ज्यासाठी भाजपने रान उठवलं होतं. अशावेळी आता देवेंद्र फडणवीस हे त्यांना आपल्या मंत्रिमंडळात स्थान देणार नसल्याचं बोललं जात आहे.
याशिवाय सर्वच पक्षातील अनेक बुजुर्ग नेत्यांना मंत्रिमंडळात स्थान द्यावं की नाही यावरही बरीच चर्चा सुरू असल्याचं बोललं जात आहे. अशावेळी देवेंद्र फडणवीस हे कशा पद्धतीने आपलं मंत्रिमंडळ बनवतात हे पाहणं आता महत्त्वाच ठरणार आहे.
हे वाचलं का?
