Pune: दीनानाथ रुग्णालयात 'त्या' दिवशी नेमकं घडलं तरी काय?, तनिषा भिसेंची संपूर्ण कहाणी जशीच्या तशी...

"आम्ही पैशांची व्यवस्था करतो, फक्त उपचार सुरू करा," अशी विनंती कुटुंबीयांनी केली होती, परंतु रुग्णालयाने त्याकडे दुर्लक्ष केले. तनिषा यांच्या सासूने रुग्णालयाबाहेर आक्रोश करताना सांगितले, "माझी 29 वर्षांची पोरगी मी गमावली. ती वेदनेने तडफडत होती, पण रुग्णालयाने काहीच केले नाही."

तनिषा यांच्या वहिनी प्रियांका पाटील यांनी माध्यमांशी बोलताना सांगितले, "हॉस्पिटलने सांगितले की, सातव्या महिन्यात प्रसूती होत असल्याने बाळांना NICU मध्ये ठेवावे लागेल. दोन्ही बाळांसाठी प्रत्येकी 10 लाख, म्हणजे एकूण 20 लाख रुपये खर्च येईल, असे त्यांनी सांगितले. आम्ही विनंती केल्यानंतर त्यांनी 10 लाख रुपये आधी जमा करण्यास सांगितले. पैसे नसल्यास ससून रुग्णालयात जा, असेही सुचवले. हे सर्व तनिषा यांच्यासमोरच बोलले गेले, ज्यामुळे त्यांच्यावर मानसिक दबाव आला."

हे ही वाचा>> 10 लाख रुपयांसाठी महिलेला दाखल करून न घेणाऱ्या पुण्यातील दिनानाथ रुग्णलयाचा नेमका इतिहास काय?

रुग्णालयाचे स्पष्टीकरण

दीनानाथ मंगेशकर रुग्णालयाने या आरोपांना उत्तर देताना आपली बाजू मांडली आहे. रुग्णालयाच्या म्हणण्यानुसार, तनिषा यांना 28 मार्च रोजी बाह्य रुग्ण विभागात तपासणीसाठी आणले होते. त्यावेळी त्यांची प्रकृती सामान्य होती, परंतु जुळ्या गर्भधारणेमुळे जोखीम असल्याचे डॉक्टरांनी सांगितले होते. रुग्णालयाने दाखल होण्याचा सल्ला दिला आणि खर्चाचा अंदाज सांगितला. मात्र, कुटुंबीयांनी तनिषा यांना न सांगता रुग्णालयातून काढून नेले. रुग्णालयाचे जनसंपर्क अधिकारी रवी पालेकर म्हणाले, "आम्ही संपूर्ण अहवाल शासनाला सादर करू. माध्यमांमध्ये आलेली माहिती दिशाभूल करणारी आहे."

रुग्णालयाच्या चौकशी समितीच्या अहवालात असेही नमूद आहे की, तनिषा यांनी गरोदरपणात नियमित तपासण्या केल्या नव्हत्या आणि त्यांना सहा महिन्यांपासून रुग्णालयात दाखवले गेले नव्हते. तसेच, अॅडव्हान्स रक्कम मागितल्याच्या रागातून कुटुंबीयांनी तक्रार केल्याचा दावा रुग्णालयाने केला आहे.

जनतेचा संताप आणि आंदोलने

या घटनेनंतर राज्यभरातून तीव्र प्रतिक्रिया उमटल्या. 4 एप्रिल 2025 रोजी रुग्णालयाबाहेर काँग्रेस, शिवसेना (उद्धव बाळासाहेब ठाकरे) आणि संभाजी ब्रिगेडसह अनेक संघटनांनी आंदोलने केली. "पैसा झाला मोठा, जीव झाला छोटा," अशा घोषणा देत आंदोलकांनी रुग्णालयाच्या पाटीला काळे फासले आणि डॉक्टरांवर चिल्लर फेकली. संभाजी ब्रिगेडने तर रुग्णालयाचा धर्मादाय परवाना रद्द करून जमीन सरकारने ताब्यात घ्यावी, अशी मागणी केली.

सरकारची भूमिका काय?

आरोग्यमंत्री प्रकाशर आबिटकर यांनी या घटनेला "मन सुन्न करणारी" असे संबोधले आणि दोषींवर कायदेशीर कारवाईचे आश्वासन दिले. पुणे जिल्हाधिकाऱ्यांनी सिव्हील सर्जनचा अहवाल मागवला असून, आरोग्य उपसंचालकांच्या अध्यक्षतेखाली चौकशी समिती स्थापन करण्यात आली आहे. मुख्यमंत्री देवेंद्र फडणवीस यांनीही या प्रकरणावर प्रतिक्रिया देताना रुग्णालयाच्या असंवेदनशीलतेवर आश्चर्य व्यक्त केले. ते म्हणाले, "दीनानाथ मंगेशकर हे प्रतिष्ठित रुग्णालय आहे, पण या घटनेने त्यांची प्रतिमा डागाळली आहे."

दीनानाथ मंगेशकर रुग्णालयातील ही घटना केवळ एका कुटुंबाची शोकांतिका नाही, तर आरोग्य सेवेतील संवेदनशीलता आणि आर्थिक प्राधान्य यांच्यातील तणावाचा प्रश्न उपस्थित करते. तनिषा भिसे यांच्या मृत्यूने दोन नवजात मुलींना आईच्या मायेपासून वंचित केले आहे.