Baramati Lok Sabha : सुप्रिया सुळे की, सुनेत्रा पवार... सट्टा बाजाराचा अंदाज काय सांगतोय?

बारामती लोकसभा मतदारसंघाच्या इतिहासात पहिल्यांदाच राष्ट्रवादी काँग्रेस विरुद्ध राष्ट्रवादी काँग्रेस (शरदचंद्र पवार) अशी लढत होत आहे. महत्त्वाचे म्हणजे सुप्रिया सुळे आणि सुनेत्रा पवार या लोकसभा मतदारसंघातून निवडणूक लढवत असल्या, तरी काका विरुद्ध पुतण्या असेच या लढतीकडे बघितले जात आहे. त्यामुळे या मतदारसंघातील निकालाची सगळ्यांना उत्सुकता आहे. 

सट्टा बाजाराचा अंदाज काय?

लोकसभा निवडणुकीच्या निकालाबद्दल वेगवेगळे अंदाज निवडणूक विश्लेषक आणि राजकीय अभ्यासकांकडून व्यक्त केले जात आहेत. 

आता मुंबईतील सट्टा बाजाराचा अंदाजही समोर आला आहे. सट्टा बाजाराने देशातील काही महत्त्वाच्या मतदारसंघातील निकाल काय असतील, याबद्दल अंदाज व्यक्त केले आहेत. यात बारामती लोकसभा मतदारसंघाचाही समावेश आहे.

हेही वाचा >> महाविकास आघाडी महाराष्ट्रात 'या' जागा जिंकणार? सट्टा बाजाराचा मोठा अंदाज 

सट्टा बाजाराच्या अंदाजानुसार, बारामती लोकसभा मतदारसंघाचा निकाल अजित पवारांसाठी धक्का देणारा असेल. बारामतीतून सुप्रिया सुळे विजयी होतील, असा अंदाज सट्टा बाजाराचा आहे.

त्यामुळे या मतदारसंघाच्या निकालाची उत्सुकता आणखी वाढली आहे. बारामती लोकसभा मतदारसंघात लोकसभा निवडणुकीच्या तिसऱ्या टप्प्यात मतदान झाले होते. बारामतीत 59.50 टक्के मतदान झाले आहे. 

विधानसभा मतदारसंघातील गणित, सहानुभूतीचा फॅक्टर

बारामती लोकसभा मतदारसंघात स्थानिक समीकरणे या निवडणुकीत महत्त्वाची ठरली. खडकवासला, दौंड, भोर, पुरंदर, बारामती आणि इंदापूर असे सहा विधानसभा मतदारसंघ या लोकसभा मतदारसंघात येतात. 

बारामतीची जागा जिंकण्यासाठी भाजपने स्थानिक समीकरणे जुळवून आणली होती, पण प्रत्यक्ष मतदानात त्याचा फायदा किती झाला, हे निकालातूनच समोर येणार आहे.

हेही वाचा >> शिंदे 'ही' जागा जिंकणार; सट्टा बाजाराने ठाकरेंची वाढवली चिंता

राष्ट्रवादी काँग्रेसमध्ये झालेली फूट आणि त्यानंतर अजित पवार यांनी पक्ष बळकावल्याने शरद पवारांबद्दल राज्यात सहानुभूती आहे. बारामती लोकसभा मतदारसंघातही याचा फायदा सुप्रिया सुळेंना होईल, असे विश्लेषकांचे अंदाज आहे. पण, भाजपच्या मदतीने अजित पवारांनी आखलेली रणनीती बारामती लोकसभेत किती यशस्वी होणार, हे निकालानंतरच स्पष्ट होणार आहे.