चंद्रपूर : पतीपासून वेगळं राहत असलेली मुलगी राहिली गर्भवती; आईने सुपारी देऊन केली हत्या

पतीपासून वेगळं राहत असलेली मुलगी गर्भवती राहिल्याने आईनेच सुपारी देऊन हत्या केल्याची घटना समोर आली आहे. तेलंगण-महाराष्ट्र सीमेवरील विरूर पोलीस ठाण्याच्या हद्दीत ही घटना घडली आहे. महाराष्ट्राच्या हद्दीत आणून मुलीची हत्या करण्यात आली. या प्रकरणात पोलिसांनी आईसह दोन नातेवाईकांना अटक केली आहे.

पतीपासून वेगळं राहत असतानाच मुलीला दिवस गेल्यानं आईने बदनामीच्या भीतीने हत्या केल्याचं समोर आलं आहे. चंद्रपूर जिल्ह्यातील विरूर पोलीस ठाण्याच्या हद्दीत उघडकीस आली. सैदा बदावत असं हत्या करण्यात आलेल्या महिलेचं नाव आहे. याप्रकरणी आई लचमीसह सिन्नू अजमेरा व शादरा अजमेरा या दाम्पत्याला अटक करण्यात आली आहे.

या तिन्ही आरोपींनी सैदा बदावत हिने आत्महत्या केल्याचं दाखवण्याचा प्रयत्न केला; पण विरूर पोलिसांनी अवघ्या ४८ तासांमध्ये गुन्ह्याचा छडा लावला. पोलिसांनी दिलेल्या माहितीनुसार, मृत सैदा बदावत ही मूळची तेलंगण राज्यातील कोंडापल्ली विजयवाडा येथील रहिवासी होती. तिचे १० वर्षांपूर्वी लग्न झाले होते. तिला ९ वर्षांची मुलगीही आहे.

मागील काही वर्षांपासून ती पतीपासून विभक्त राहत होती. आई वडिलांबरोबरही तिचा नेहमी वाद होत असे. तिनेच आपल्या वडिलांना झोपेच्या गोळ्या देऊन खून केल्याचा संशय तिची आई लचमी हिला होता. त्यातच पतीपासून वेगळं राहत असलेली सैदा ही गर्भवती राहिली. यामुळे समाजात आपली बदनामी होईल, या भीतीने सैदाचा खून करण्याचा कट तिच्या आईने रचला.

आरोपी महिलेनं नातेवाईक असलेल्या सिन्नू अजमेरा व शादरा अजमेरा या दाम्पत्याला ३० हजार रुपयांची सुपारी दिली. सैदा आणि लचमी या दोघी खंमम (तेलंगण) येथे १४ फेब्रुवारी रोजी एका लग्नासाठी आल्या होत्या. या लग्नाला सिन्नू व त्याची पत्नी शारदाही आले होते. येथेच सैदाला संपविण्याचा कट रचण्यात आला. यासाठी दाम्पत्याला लचमीने ५ हजार रूपये दिले.

गावात गर्भपात करण्यासाठी औषधी मिळत असल्याचं सांगून सिन्नू हा सैदाला घेऊन विरूर परिसरातील मुंडिगेट येथे आला. येथील विहिरीत तिला ढकलेले त्यानंतर वरून दगड फेकला.

दरम्यान, १८ फेब्रुवारी रोजी चंद्रपूर जिल्ह्यातील राजुरा तालुक्यातील कविपेठ परिसरातील आर्जनआनाम यांच्या शेतातील तिटिरींना महिलेचा मृतदेह आढळून आला. तिची ओळख पटविण्यासाठी विरुर पोलिसांनी माध्यमातून आवाहन केलं. त्यानंतर तेलगंण येथून पोलिसांना एक फोन आला.

ही महिला तेलंगणमधील कोंडापल्ली विजयवाडा येथील रहिवासी असून तिचे नाव सैदा बदावत नाव असल्याचं संबंधितांनी पोलिसांना सांगितलं. त्यानंतर पोलिसांनी सैदाच्या नातेवाईकांचा मोबाईल क्रमांक मिळवला. सैदाच्या आईला फोटो पाठवून तिची ओळख पटविण्यात आली. आईला पोलीस ठाण्यात बोलावून घेण्यात आलं.

तिच्या समक्ष सैदाच्या मृतदेहाचे शवविच्छेदन करण्यात आलं. शवविच्छेदन अहवालात सैदा गर्भवती असल्याचं निष्पन्न झालं. तेलंगणा राज्यातील महिलेने चंद्रपूर जिल्ह्यात आत्महत्या का केली असावी? असा संशय विरूर पोलिसांना येत होता. विरुर परिसरातील मुंडिगेट येथील सिन्नू अजमेरा हा तिचा नातेवाईक असल्याची माहिती समोर आली.

त्यानंतर पोलिसांनी तत्काळ त्याच्याशी संपर्क केला. आपण हैद्राबादला असल्याचं त्यानं सांगितलं. तसेच विचारलेल्या प्रश्नांनावर उडवाडवीची उत्तरं दिली. त्यामुळे पोलिसांचा त्याच्याविषयी संशय अधिक बळावला. लगेच त्याच्या फोन कॉल डिटेल्स मिळवण्यात आल्या. घटनेच्या दिवशी सिन्नू मुंडिगेट गावात येऊन गेल्याची माहिती तपासात समोर आली.

विरूर पोलिस ठाण्याचे एक पथक हैदराबाद येथे रवाना होवून त्यांनी सिन्नूचा शोध घेतला. त्याने गुन्ह्याची कबुली दिली. विरूर पोलिसांनी दोन दिवसांतच खुनाचा उलगडा केला आणि आरोपींना बेड्या ठोकल्या.