मुंबई: मुंबईत काल (13 मे) अचानक आलेल्या वादळाने घाटकोपरमध्ये भलं मोठं होर्डिंग कोसळून भयंकर दुर्घटना घडली. ज्यामध्ये तब्बल 14 जणांना नाहक जीव गमवावा लागला. मात्र, असं असताना आता यावरून राजकीय आरोप-प्रत्यारोप हे सुरू झाले आहेत. या होर्डिंग दुर्घटनेबाबत एक फोटो शेअर करून भाजप आमदार राम कदम यांनी थेट या प्रकरणी शिवसेना (UBT) पक्षप्रमुख उद्धव ठाकरेंवरच खळबळ उडवून देणारा आरोप केला आहे. (mumbai hoarding collapse sensational allegations against uddhav thackeray bjp mla ram kadam and sheetal mhatre shared the photo)
ADVERTISEMENT
काल सायंकाळच्या सुमारास संपूर्ण मुंबईत सोसट्याचा वारा सुटला. वातावरणात अचानक बदल झाला आणि प्रचंड असं धुळीचे वादळ आणि पाऊस सुरू झालं. पण याच वेळी प्रचंड वारा सुटल्याने घाटकोपर येथील समता कॉलनीतील रेल्वे पेट्रोल पंप येथे असणार एक भलं मोठं होर्डिंग कोसळलं. ज्यामध्ये 14 जणांचा दुर्दैवी मृत्यू झाला तर 80 हून अधिक जण जखमी झाले.
हे ही वाचा>> घाटकोपर दुर्घटनेत 14 मुंबईकरांनी गमावला जीव, कोणावर दाखल झाला गुन्हा?
दरम्यान, याच प्रकरणावरून आता भाजपने शिवसेना (UBT)ला आणि उद्धव ठाकरेंवर थेट आरोप करणं सुरू केलं आहे. याबाबत भाजप आमदार राम कदम यांनी एक फोटो ट्वीट करून उद्धव ठाकरेंना घेरण्याचा प्रयत्न केला आहे.
राम कदम आणि शितल म्हात्रेंचे थेट उद्धव ठाकरेंवर आरोप...
14 लोकांच्या निष्पाप बळीला जबाबदार हाच तो भावेश भिडे.. श्रीमान उद्धव ठाकरे यांच्या घरात.. मनाला चीड आणणारे हे चित्र.. त्या अनधिकृत होर्डिंगला संरक्षण कोणाचे होते हे या चित्रावरून स्पष्ट होते.. टक्केवारीसाठी कोविड काळातले खिचडी चोर.. कफनचोर.. आजही टक्केवारी साठी 14 लोकांचे नाहक बळी घेता आहेत.. कुठे फेडणार हे पाप..?
असं ट्वीट राम कदम यांनी यावेळी केलं आहे. तर यासोबत शिवसेना (शिंदे गट) प्रवक्त्या शितल म्हात्रे यांनीही याबाबत ट्वीट करून ठाकरेंवर निशाणा साधला आहे.
दरम्यान, याप्रकरणी पोलिसांनी होर्डिंग मॅन्युफॅक्चरिंग एजन्सी मेसर्स इगो मीडिया आणि तिच्या मालकाविरुद्ध तक्रार नोंदवली आहे. होर्डिंग मालक भावेश भिंडे आणि इतरांविरुद्ध कलम 304, 338, 337 अन्वये पंतनगर पोलीस ठाण्यात गुन्हा दाखल करून तपास सुरू आहे.
हे ही वाचा>> भाजपसोबत युती करणार?, आदित्य ठाकरेंचं मोठं विधान; म्हणाले...
याच भावेश भिंडेचा उद्धव ठाकरे आणि शिवसेना नेते अरविंद सावंत यांच्यासोबतचा फोटो शेअर करून भाजप आणि शिवसेना (शिंदे गट) हे याप्रकरणी खळबळजनक आरोप करत आहेत.
होर्डिंगचे ऑडिट केले जाईल- मुख्यमंत्री शिंदे
दरम्यान, या दुर्घटनेनंतर मुख्यमंत्री एकनाथ शिंदे घाटकोपर परिसरात घटनेची पाहणी करण्यासाठी पोहोचले होते. जिथे त्यांनी अधिकाऱ्यांना अनेक सूचना दिल्या. लोकांना वाचवणे हे आमचे प्राधान्य असल्याचे ते यावेळी म्हणाले. या घटनेत जखमी झालेल्यांच्या उपचाराचा खर्च सरकार उचलणार आहे. मृत्यूमुखी पडलेल्यांच्या कुटुंबीयांना 5 लाख रुपये दिले जाणार आहेत. मुंबईतील अशा सर्व होर्डिंगचे ऑडिट करण्याचे निर्देशही मुख्यमंत्र्यांनी यावेळी अधिकाऱ्यांना दिले आहेत.
ADVERTISEMENT
![follow whatsapp](/assets/icons/followWhatsApp.png)