रिक्षा चालकाची मुलगी ते महाराष्ट्राची पहिली मुस्लिम महिला IAS,अदिबा अहमदची मार्कलिस्ट पाहिली का?

अदिबाची पार्श्वभूमी आणि संघर्ष

अदिबाचा जन्म यवतमाळमधील एका साध्या कुटुंबात झाला. तिचे वडील, शेख अश्फाक, ऑटोरिक्षा चालक आहेत, तर तिची आई गृहिणी आहे. आर्थिक परिस्थिती बेताची असूनही, अदिबाच्या वडिलांनी तिच्या शिक्षणाला नेहमीच प्राधान्य दिले. यवतमाळच्या कळंब चौकात भाड्याच्या घरात राहणाऱ्या अदिबाने लहानपणापासूनच अभ्यासात हुशारी दाखवली. तिने स्थानिक जिल्हा परिषद शाळेतून प्राथमिक शिक्षण पूर्ण केले आणि नंतर पुण्यातील अबेदा इनामदार कॉलेजमधून उच्च शिक्षण घेतलं.

हे ही वाचा>> महाराष्ट्राच्या गळ्यातील ताईत बनलेला बिरदेव डोणेची UPSC मार्कशीट पाहिली का?, मिळाले 'एवढे' Marks

घरात शिक्षणाचे विशेष वातावरण नसताना आणि आर्थिक अडचणी असतानाही, अदिबाने आपले ध्येय निश्चित केले होते. बारावीनंतर तिने UPSC परीक्षेची तयारी सुरू केली. अदिबाने यवतमाळमधील हज हाऊस आणि जामिया IAS प्रशिक्षण संस्थेतून मार्गदर्शन घेतले, तसेच पुण्यातील कोचिंग क्लासेसमधून तयारी केली. मुस्लिम समाजातील सेवा फाउंडेशननेही तिला आर्थिक आणि शैक्षणिक मदत पुरवली.

UPSC मधील यशाचा प्रवास

UPSC ही भारतातील सर्वात कठीण परीक्षांपैकी एक मानली जाते, आणि अदिबाने हा टप्पा चौथ्या प्रयत्नात पार केला. पहिल्या तीन प्रयत्नांमध्ये अंतिम यादीत स्थान मिळाले नाही, परंतु अदिबाने हार मानली नाही. तिने आपला निर्धार कायम ठेवत अभ्यासावर लक्ष केंद्रित केले. 22 एप्रिल 2025 रोजी जाहीर झालेल्या UPSC CSE 2024 च्या निकालात तिला 142 वा क्रमांक मिळला. या यशाने तिने महाराष्ट्रातील पहिल्या मुस्लिम महिला IAS अधिकारी बनण्याचा मान मिळवला.

अदिबाने यशाचे श्रेय आपल्या कुटुंबाला, विशेषत: वडिलांना आणि काकांना दिले आहे. 

किती आणि कसे गुण मिळाले?

1. मुख्य परीक्षा (Mains): यूपीएससीने जाहीर केलेल्या निकालानुसार अदिबाला मुख्य परीक्षेत 795 गुण मिळाले आहेत. मुख्य लेखी परीक्षेतील तिचे हे एकूण गुण आहेत.

2. मुलाखत (Personality Test): मुख्य परीक्षेत उत्तीर्ण झाल्यानंतर अदिबाला मुलाखतीसाठी बोलविण्यात आलं. ज्यामध्ये अदिबाला एकूण 180 गुण मिळाले.

3. एकूण गुण: अदिबाचे एकूण गुण 975 एवढे आहेत, ज्यामुळे तिला AIR 142 रँक मिळालं. यूपीएससी टॉपर शक्ती दुबे (AIR 1) हिला एकूण 1043 गुण मिळले आहेत.

हे ही वाचा>> Archit Dongre Marksheet: UPSC मध्ये महाराष्ट्रात पहिला आलेल्या पुण्याच्या अर्चित डोंगरेची मार्कशीट आणि पाहून तुम्हीही...

नाव	टक्के	लेखी परीक्षेतील गुण	मुलाखतीतील गुण	एकूण गुण
अदिबा अहमद	48.14%	795	180	975

सामाजिक प्रभाव आणि प्रेरणा

अदिबाच्या यशाने यवतमाळसह संपूर्ण महाराष्ट्रात आनंदाचे वातावरण आहे. विशेषत: आदिवासी बहुल यवतमाळ जिल्ह्यासाठी हा अभिमानाचा क्षण आहे. तिच्या यशाने अल्पसंख्याक समुदायातील, विशेषत: मुस्लिम मुलींना नागरी सेवेत सहभागी होण्यासाठी प्रोत्साहन मिळेल, अशी आशा व्यक्त केली जात आहे. 

सोशल मीडियावरही अदिबाच्या यशाची जोरदार चर्चा आहे. अनेकांनी तिच्या यशाला “प्रेरणादायी” आणि “ऐतिहासिक” संबोधले आहे. “देशात हिंदू-मुस्लिम वादाच्या पार्श्वभूमीवर अदिबाचे यश एक सकारात्मक संदेश देते,” असे एका X यूजरने म्हटलं आहे.

महाराष्ट्रासाठी अभिमानाचा क्षण

UPSC 2024 च्या निकालात महाराष्ट्रातील इतर उमेदवारांनीही उल्लेखनीय कामगिरी केली आहे. पुण्याच्या अर्चित डोंगरेने देशात तिसरा क्रमांक मिळवला, तर शक्ती दुबे हिने प्रथम आणि हर्षिता गोयल हिने दुसरा क्रमांक पटकावला. परंतु अदिबा हिचे यश तिच्या सामाजिक आणि आर्थिक पार्श्वभूमीमुळे विशेष ठरते.