सुनील तटकरेंचा पत्ता होणार कट? भाजपचा रायगड लोकसभेसाठी प्लॅन काय?

सुनील तटकरे रायगड लोकसभा मतदारसंघाचे खासदार आहेत आणि अजित पवारांनी आगामी लोकसभेच्या अनुषंगाने या मतदारसंघावर दावाही केला आहे. पण या मतदारसंघावर भाजपचा डोळा असल्याची चर्चा स्थानिक राजकारणात सुरू आहे. या चर्चेला हवा मिळाली ती उद्धव ठाकरेंनी रायगड दौऱ्यात केलेल्या विधानामुळे!

सुनील तटकरे राज्यसभेसाठी इच्छुक?

1 फेब्रुवारी रोजी उद्धव ठाकरे रायगडच्या जिल्ह्याच्या दौऱ्यावर होते. पेण येथील जनसंवाद सभेत बोलताना उद्धव ठाकरेंनी तटकरेंबद्दल विधान केले. घराणेशाहीच्या मुद्द्यावरून पंतप्रधान मोदींना आव्हान देताना ठाकरे तटकरेंचं नाव घेऊन बोलले. ते काय म्हणाले तेही वाचा…

“कल्याणमध्ये मी गेलो, त्याच्या एक-दोन दिवस आधी मोदीजी येऊन गेले आणि घराणेशाहीवर बोलून गेले. घराणेशाही… मी दुसऱ्या दिवशी गेलो आणि म्हटलं की घराणेशाहीला विरोध आहेच. पण, कल्याणमध्ये आणि योगायोग इथे (रायगड), पलिकडे कोकणात सुद्धा घराणेशाही… घराणेशाहीच नाही, तर गद्दारांची घराणेशाही आहे.”

“मोदींजीच्या भाषेत… आता जे खासदार निवडून दिलेत, इकडे पालकमंत्री आहेत… भाजपने जाहीर करावं की आम्ही त्यांना तिकीट देणार नाही, ही घराणेशाही आम्ही इकडेच बंद करणार. हिंमत असेल, तर करा. ना राज्यसभेत पाठवणार, ना विधान परिषदेत पाठवणार.”

“अशीही कुजबूज येतेय… त्यांना आता कळलंय की, लोकसभेत तर आता निवडून येऊच शकत नाही, मग मागच्या दारातून तटकरे राज्यसभेत जाण्याचा प्रयत्न करतील. मोदींनी सांगायला पाहिजे गेट आऊट. मला घराणेशाही चालणार नाही. पालकमंत्री असेल, तर तू पालक आणि तुझी मुलगी घरी काय ते करा… इथे माझ्या पक्षात स्थान नाही.”

सुनील तटकरे लोकसभेचा राजीनामा देऊन राज्यसभेत जाणार का? अशी चर्चा सुरू असतानाच उद्धव ठाकरेंनी केलेल्या या विधानाने चर्चेला हवा दिली आहे.

रायगड लोकसभा मतदारसंघामध्ये काय सुरूये?

जशी महाविकास आघाडीतील तिन्ही पक्षांमध्ये काही मतदारसंघांसाठी रस्सीखेच सुरू आहे, तशीच ती महायुतीमध्येही सुरू आहे. यात एक मतदारसंघ रायगडचाही आहे.

हेही वाचा >> भाजप 400 जागा जिंकू शकतं का? प्रशांत किशोरांची मोठी भविष्यवाणी

रायगड लोकसभा मतदारसंघावर सर्वात आधी अजित पवारांनी दावा केला होता. त्यानंतर मतदारसंघावर शिंदे यांच्या शिवसेनेने दावा केला. तर भाजपने पेणचे माजी आमदार धैर्यशील पाटील यांचे नाव लोकसभेसाठी पुढे केले आहे. अलिबागमध्ये झालेल्या महायुतीच्या मेळाव्यात हे दिसून आलं होतं.

हेही वाचा >> शरद पवार राष्ट्रवादीचे सदस्यच नाहीत, अध्यक्ष कसे?; अजित पवार गटाची अखेरची खेळी

रायगड लोकसभा मतदारसंघाचे खासदार सुनील तटकरे आहेत. त्यांना राज्यसभेवर पाठवून तो मतदारसंघ स्वतःकडे घेण्याचे भाजपचे प्रयत्न असल्याची चर्चा स्थानिक राजकीय वर्तुळात सुरू आहे. तटकरेंना राज्यसभेवर पाठवून हा मतदारसंघ स्वतःकडे घ्यायचा आणि अजित पवार गटाला दुसरा मतदारसंघ द्यायचा, असा भाजपचा प्लॅन असल्याचेही बोलले जात आहे.