मुंबई Tak Exclusive: NCP ची बँक खाती अजित पवार गटाच्या ताब्यात, मुंबईत पक्ष कार्यालयावरही दावा

निवडणूक आयोगाचा निकाल येण्याआधीच अजित पवारांच्या गटाने मुंबईतील पक्ष कार्यालय आपल्या ताब्यात घेण्यासाठी प्रयत्न सुरू केले होते. ज्यावर आता त्यांनी अधिकृतपणे दावा केला आहे. त्यामुळे आता राज्य सरकार त्यांचा हा दावा मान्य करणार का? हे पाहणं महत्त्वाचं ठरणार आहे.

अजित पवारांना पक्ष कार्यालय मिळणार?

दरम्यान, राष्ट्रवादी काँग्रेस पक्षाची कार्यालये ही राष्ट्रवादी वेल्फेअर ट्रस्टची मालमत्ता असल्याचा दावा हा सातत्याने शरद पवार गटाकडून करण्यात येत होता. पण राष्ट्रवादी काँग्रेसचं मुख्यालय हे वेल्फेअर ट्रस्टचं नसून ते पक्षाच्या मालकीचं असल्याचा दावा हा अजित पवार गटाकडून करण्यात आला आहे. त्यामुळेच आता पक्ष कार्यालय नेमकं कोणाला मिळणार हे पाहणं महत्त्वाचं ठरणार आहे.

हे ही वाचा>> सुनील प्रभू फडणवीसांची वाट पाहत थांबले, विधानभवनात काय घडलं?

शरद पवारांकडे दोन पर्याय.. 

सुरुवातीला राष्ट्रवादी काँग्रेस पक्षाचं मुख्यालय हे मंत्रालयच्या नजीक होतं. मात्र, साधारण 2015 साली मुंबईतील मेट्रोच्या कामामुळे राष्ट्रवादीचं हे कार्यालय पाडण्यात आलं. त्याऐवजी मुंबईतील बॅलार्ड पिअर परिसरात राज्य सरकारच्या वतीने त्यांना नवं कार्यालय देण्यात आलं होतं. मात्र, आता ते कार्यालय देखील शरद पवार यांना गमवावं लागू शकतं. 

आता याचबाबत शरद पवार यांच्याकडे दोन पर्याय आहेत. त्यापैकी पहिला पर्याय म्हणजे मुख्यमंत्री एकनाथ शिंदे यांच्याकडे विनंती अर्ज करावा लागेला. राष्ट्रवादी काँग्रेसचं जे बॅलार्ड पिअर येथे कार्यालय आहे ते आपल्याकडेच राहावं अशी विनंती शरद पवार गटाला मुख्यमंत्र्यांना करावी लागेल. किंवा, राज्य सरकारकडून दुसऱ्या कार्यालयाची मागणी शरद पवार यांना करावी लागेल.

हे ही वाचा>> Lok Sabha : ठाकरेंना 21, काँग्रेसला 15, पवारांना किती जागा?

जर अजित पवार  यांचा दावा राज्य सरकारने मान्य केला तर सध्या अस्तित्वात असलेल्या पक्ष कार्यालयाचा दावा शरद पवार गटाला सोडावा लागेल. जो त्यांच्यासाठी एक मोठा धक्का असणार आहे.