Uddhav Thackeray: 'बिनशर्ट पाठिंबा...', उद्धव ठाकरे उडवली राज ठाकरेंची खिल्ली!

'काय.. उद्धव ठाकरे नको.. मी हा बघा शर्ट काढला.. बिनशर्ट पाठिंबा देतो तुम्हाला उघड.. काही जणांनी भाजपला विरोध करण्याचं नाटक करून, ढोंग करून पाठिंबा दिला.. लढण्याचं नाटक करून केलं..' असं म्हणत उद्धव ठाकरेंनी राज ठाकरेंनी दिलेल्या पाठिंब्याची जोरदार खिल्ली उडवली. 

राज ठाकरेंनी जाहीर केलेला बिनशर्त पाठिंबा 

मनसे अध्यक्ष राज ठाकरे यांनी पाडवा मेळाव्यात जाहीर केलं होतं की, पुन्हा एकदा नरेंद्र मोदी हे पंतप्रधान व्हावेत यासाठी आपण त्यांना बिनशर्त पाठिंबा जाहीर करत आहोत. त्यांच्या या घोषणेनंतर अनेक विरोधकांनी त्यांच्यावर जोरदार टीकाही केली होती. 

कारण 2019 लोकसभा निवडणुकीच्या प्रचारात राज ठाकरेंनी पंतप्रधान नरेंद्र मोदी आणि अमित शाह यांना राजकीय क्षितीजावरून हटवा असं आवाहन मतदारांना केलं होतं. त्यामुळे जेव्हा त्यांनी मोदींना पाठिंबा जाहीर केला तेव्हा त्यांच्या या टीकेची आठवण करून देत अनेकांनी टीकेची झोड उठवली.

हे ही वाचा>> Sanjay Raut : राऊतांचा PM मोदींना टोला, ''मोदी हा ब्रँड होता, आता...''

दरम्यान, या यंदाच्या निवडणुकीत राज ठाकरेंनी महायुतीच्या उमेदवारांसाठी काही जाहीर सभा देखील होत्या. मुंबईतील देखील पंतप्रधान मोदींच्या सभेत त्यांनी भाषण केलं होतं. 

मात्र, असं असलं तरी महाराष्ट्रातील मतदारांनी यंदाच्या लोकसभा निवडणुकीत महायुतीला सपशेल नाकारलं. त्यामुळे आता विधानसभा निवडणुकीत राज ठाकरे हे काय भूमिका घेतात हे पाहणं महत्त्वाचं ठरणार आहे.